HDFC Bank Share Price: 45 કરોડના વ્યાજની ચૂકવણીમાં ગરબડ, અહેવાલ આવતા જ શેરમાં 2%નો કડાકો, જાણો શું છે વિવાદ

HDFC Bank Share Price: ભારતની સૌથી મોટી પ્રાઇવેટ બેંકોમાંની એક એવી HDFC Bank હાલમાં એક મોટા વિવાદમાં સપડાઈ છે. બુધવારના ટ્રેડિંગ સેશનમાં બેંકના શેરમાં લગભગ 2 ટકાનો મોટો ઘટાડો જોવા મળ્યો છે. આ ઘટાડા પાછળનું મુખ્ય કારણ એક રિપોર્ટ છે, જેમાં 45 કરોડ રૂપિયાના વ્યાજની ચૂકવણીને લઈને બેંકની આંતરિક તપાસનો ખુલાસો થયો છે.

શું છે 45 કરોડ રૂપિયાનો આખો મામલો?

27 મે ના રોજ 'ઇન્ડિયન એક્સપ્રેસ' દ્વારા પ્રસિદ્ધ કરવામાં આવેલા એક રિપોર્ટ મુજબ, બેંકમાં 45 કરોડ રૂપિયાના 'ડિફરન્શિયલ ઇન્ટરેસ્ટ' પેમેન્ટને લઈને આંતરિક વિજિલન્સ તપાસ કરવામાં આવી હતી. આ પેમેન્ટ મહારાષ્ટ્ર સ્ટેટ રોડ ડેવલપમેન્ટ કોર્પોરેશનની જમા રકમ પર કરવામાં આવ્યું હતું.

આરોપ એવો છે કે આ વ્યાજની રકમ સીધી MSRDC ના ખાતામાં જમા કરવાને બદલે બેંકના માર્કેટિંગ વિભાગ મારફતે મોકલવામાં આવી હતી. આ રકમને 4 લોકલ વેન્ડર (એજન્સી) દ્વારા 'માર્ગ સુરક્ષા જાગૃતિ અભિયાન' માં આપેલા ફાળા તરીકે દર્શાવવામાં આવી હતી.

સિનિયર અધિકારીઓ પર સવાલ અને પૂર્વ ચેરમેનનું રાજીનામું

માર્કેટિંગ વિભાગના આંતરિક ઓડિટમાં આ શંકાસ્પદ લેવડ-દેવડ પકડાતા બોર્ડની ઓડિટ કમિટીએ 12 માર્ચના રોજ તપાસના આદેશ આપ્યા હતા. આ મામલામાં બેંકના MD અને CEO શશિધર જગદીશન સહિત અનેક ઉચ્ચ અધિકારીઓની જવાબદારી નક્કી કરવામાં આવી હોવાનું કહેવાય છે.

સૌથી ચોંકાવનારી વાત એ છે કે આ તપાસ શરૂ થયાના થોડા દિવસો બાદ જ 18 માર્ચે બેંકના પૂર્વ ચેરમેન અતનુ ચક્રવર્તીએ અચાનક રાજીનામું આપી દીધું હતું. તેમણે રાજીનામું આપતી વખતે સ્પષ્ટ કહ્યું હતું કે, બેંકના કામકાજની રીત અને અંદરની કેટલીક ઘટનાઓ તેમના અંગત મૂલ્યો અને નૈતિકતા સાથે મેળ ખાતી નથી.