Nestle India Q4 Results: નેસ્લે ઇન્ડિયાના નફામાં 26% નો બમ્પર ઉછાળો, રોકાણકારો માટે ડિવિડન્ડની લોટરી લાગી

Nestle India Q4 Results: એફએમસીજી સેક્ટરની દિગ્ગજ કંપની નેસ્લે ઇન્ડિયાએ 21 એપ્રિલના રોજ પોતાના ચોથા ક્વાર્ટરના પરિણામો જાહેર કર્યા છે. કંપનીએ અપેક્ષા કરતા ઘણું સારું પ્રદર્શન કરીને રોકાણકારોને ખુશ કરી દીધા છે. માર્ચ ક્વાર્ટરમાં નેસ્લે ઇન્ડિયાનો સ્ટેન્ડઅલોન નેટ પ્રોફિટ વાર્ષિક ધોરણે 26% વધીને 1,114.1 કરોડ રૂપિયા પર પહોંચી ગયો છે.

અંદાજ કરતા વધુ રહ્યો નફો અને રેવન્યુ

શેરબજારના વિશ્લેષકોએ અંદાજ લગાવ્યો હતો કે કંપનીનો નફો 12.7% વધીને 998 કરોડ રૂપિયા આસપાસ રહેશે, પરંતુ નેસ્લેએ આ આંકડાને પાર કરી દીધો છે. ઓપરેશન્સથી કંપનીની રેવન્યુ પણ 22.6% વધીને 6,747.8 કરોડ રૂપિયા રહી છે, જે અગાઉ 6,250 કરોડ રહેવાનો અંદાજ હતો.

રોકાણકારોને મળશે ડિવિડન્ડ

સારા નફાની સાથે જ કંપનીએ પોતાના શેરધારકો માટે પ્રતિ શેર 5 રૂપિયા ડિવિડન્ડની જાહેરાત કરી છે. આ જાહેરાત બાદ બજારમાં નેસ્લેના શેરમાં જોરદાર લેવાલી જોવા મળી હતી. કંપનીના ચેરમેન અને એમડી મનીષ તિવારીએ જણાવ્યું કે, માર્ચ ક્વાર્ટરમાં ટોટલ સેલ્સમાં 23.4% અને ડોમેસ્ટિક સેલ્સમાં 23.1% નો વધારો થયો છે. ખાસ વાત એ છે કે કંપનીના તમામ પ્રોડક્ટ્સે આ શાનદાર દેખાવમાં મહત્વનું યોગદાન આપ્યું છે.

શેરબજારમાં નેસ્લેનો દબદબો

પરિણામોની સીધી અસર કંપનીના શેરના ભાવ પર જોવા મળી હતી. બપોરે 3 વાગ્યાની આસપાસ નેસ્લે ઇન્ડિયાનો શેર 6.24% ના ઉછાળા સાથે 1,366 રૂપિયા પર પહોંચી ગયો હતો. છેલ્લા એક મહિનામાં આ શેરે રોકાણકારોને અંદાજે 17% જેટલું વળતર આપ્યું છે.