NSE IPO Impact: ન્યૂ ઇન્ડિયા એશ્યોરન્સ કંપનીના શેરમાં 14% નો જંગી ઉછાળો, જાણો NSEના મેગા આઈપીઓ સાથે શું છે કનેક્શન

NSE IPO Impact : શેરબજારના રોકાણકારો જેની લાંબા સમયથી રાહ જોઈ રહ્યા હતા તે નેશનલ સ્ટોક એક્સચેન્જના મેગા આઈપીઓની હિલચાલ શરૂ થઈ ગઈ છે. આ સમાચાર આવતાની સાથે જ 18 જૂનના રોજ માર્કેટ ખુલતા વેંત ન્યૂ ઇન્ડિયા એશ્યોરન્સ કંપનીના શેરમાં જાણે પાંખો આવી ગઈ હોય તેમ 14 ટકાનો મોટો ઉછાળો જોવા મળ્યો હતો.

દેશના સૌથી મોટા સ્ટોક એક્સચેન્જ ગણાતા NSE એ પોતાના 30,000 કરોડ રૂપિયાના બમ્પર આઈપીઓ માટે માર્કેટ રેગ્યુલેટર SEBI પાસે જરૂરી દસ્તાવેજો (પેપર્સ) ફાઈલ કરી દીધા છે. આ ભારતનો અત્યાર સુધીનો સૌથી મોટો આઈપીઓ બની શકે છે, જેની સીધી અને સકારાત્મક અસર શેરબજારની અમુક સરકારી કંપનીઓ પર પડી રહી છે.

ન્યૂ ઇન્ડિયા એશ્યોરન્સના શેરમાં કેમ આવી તેજી?

સવારે 10:10 વાગ્યાની આસપાસ New India Assurance Companyનો શેર 13.45 ટકાના જબરદસ્ત ઉછાળા સાથે 187.72 રૂપિયા પર ટ્રેડ કરી રહ્યો હતો. આ પાછળનું મુખ્ય કારણ એ છે કે, NSE દ્વારા સેબીને જે ડ્રાફ્ટ રેડ હેરિંગ પ્રોસ્પેક્ટસ સોંપવામાં આવ્યો છે, તેમાં ન્યૂ ઇન્ડિયા એશ્યોરન્સનું નામ પણ સામેલ છે.

આ કંપની NSE ના આઈપીઓમાં પોતાનો હિસ્સો વેચવા જઈ રહી છે. ન્યૂ ઇન્ડિયા આ ઓફર ફોર સેલ હેઠળ પોતાના 1.05 કરોડ શેર્સ વેચશે. સૌથી રસપ્રદ વાત એ છે કે, કંપનીએ આ શેર્સ સરેરાશ માત્ર 0.32 રૂપિયા પ્રતિ શેરના અત્યંત નજીવા ભાવે ખરીદ્યા હતા, જેથી હવે તેમને આ ડીલથી જંગી નફો થવાની પૂરી શક્યતા છે.

આ આઈપીઓ સંપૂર્ણપણે ઓફર ફોર સેલ હશે

નેશનલ સ્ટોક એક્સચેન્જે 17 જૂનના રોજ સેબી સમક્ષ પોતાના શરૂઆતી દસ્તાવેજો રજૂ કર્યા હતા. 30,000 કરોડ રૂપિયાના આ વિશાળ ઈશ્યુમાં કોઈ નવા શેર બહાર પાડવામાં આવશે નહીં. આ આઈપીઓ 100 ટકા ઓફર ફોર સેલ પર આધારિત હશે, જે અંતર્ગત કુલ 14.89 કરોડ શેર વેચાણ માટે મુકાશે.