Stock Market Recovery: બે મોટા સેક્ટરના દબાણને ફાર્માએ એકલા હાથે સંભાળ્યું, સેન્સેક્સ અને નિફ્ટી ફરી લીલા નિશાનમાં

Stock Market Recovery: શરૂઆતી ઘટાડા બાદ ભારતીય શેર બજારે શાનદાર વાપસી કરી છે. નિફ્ટીની વીકલી એક્સપાયરીના દિવસે સેન્સેક્સ અને નિફ્ટી 50 લાલ નિશાનમાં ખુલ્યા હતા, પરંતુ ટૂંક સમયમાં જ રિકવર થઈને લીલા નિશાનમાં આવી ગયા છે. આ રિકવરી પાછળ એક ખાસ સેક્ટરે સૌથી મોટો રોલ ભજવ્યો છે, જેને કારણે બે અન્ય મોટા સેક્ટરમાં વેચવાલી હોવા છતાં બજારે નીચલા સ્તરેથી મજબૂત વાપસી કરી.

સવારે 10:09 વાગ્યાના આંકડા મુજબ, સેન્સેક્સ 68.59 પોઈન્ટ (0.09%) ના સામાન્ય વધારા સાથે 77,162.66 પર ટ્રેડ કરી રહ્યો હતો. જ્યારે નિફ્ટી 50 ઈન્ડેક્સ 22.95 પોઈન્ટ (0.10%) ના વધારા સાથે 24,125.85 ના સ્તરે પહોંચી ગયો હતો. ઈન્ટ્રા-ડે કારોબારમાં સેન્સેક્સ 76,878.66 ના નીચલા સ્તરે પહોંચી ગયો હતો, જ્યાંથી તે 313.97 પોઈન્ટ રિકવર થઈને 77,192.6 સુધી ગયો. એ જ રીતે નિફ્ટી પણ 24,040.05 સુધી ગગડ્યા બાદ 95.45 પોઈન્ટની શાનદાર રિકવરી સાથે 24,135.50 ની સપાટીને સ્પર્શી ગયો હતો. બ્રોડર માર્કેટમાં પણ રોનક જોવા મળી રહી છે, જ્યાં નિફ્ટી મિડકેપ 100 માં અડધા ટકાથી ઓછો અને નિફ્ટી સ્મોલકેપ 100 માં અડધા ટકાથી વધુનો ઉછાળો છે.

બજારમાં શાનદાર રિકવરી પાછળના 4 મુખ્ય કારણો

ફાર્મા સેક્ટરે બજારને ઉપર ખેંચ્યું

બજારમાં આજે નિફ્ટી આઈટીમાં 1.5 ટકાથી વધુ અને મેટલ સેક્ટરમાં 1 ટકાથી વધુનો ઘટાડો નોંધાયો હતો. પરંતુ આ દબાણને એકલા ફાર્મા સેક્ટરે સંભાળી લીધું, જેનો નિફ્ટી ઈન્ડેક્સ 2 ટકાથી વધુ મજબૂત થયો છે. આ ઉપરાંત નિફ્ટી પીએસયુ બેંકમાં ભલે ઘટાડો હોય, પરંતુ રિયલ્ટી સેક્ટરમાં 1 ટકાથી વધુનો ઉછાળો જોવા મળ્યો છે.

ક્રૂડ ઓઈલના ભાવમાં નરમાશ

અમેરિકા અને ઈરાન વચ્ચે શાંતિ સમજૂતીની વાતચીત આગળ વધતા ક્રૂડ ઓઈલનો સપ્લાય ફરીથી સામાન્ય થવાની આશા બંધાઈ છે. યુદ્ધના ભય વચ્ચે 120 ડોલર પ્રતિ બેરલની નજીક પહોંચી ગયેલો બ્રેન્ટ ક્રૂડનો ભાવ હવે ઘટીને 78 ડોલરની પણ નીચે આવી ગયો છે, જે બજાર માટે ખૂબ સારા સમાચાર છે.