રઘુરામ રાજનની મોટી ભવિષ્યવાણી: બસ આ એક 'ટ્રિગર' દબાય એટલે ભારતીય શેરબજારમાં આવશે તેજીનો ભૂકંપ

Raghuram Rajan Indian Stock Market: ભારતીય રિઝર્વ બેંક (RBI)ના પૂર્વ ગવર્નર રઘુરામ રાજને ભારતીય શેરબજારના ભવિષ્યને લઈને એક મહત્વપૂર્ણ અને રસપ્રદ વાત કરી છે. તેમનું માનવું છે કે છેલ્લા એક વર્ષથી જે બજાર લગભગ સ્થિર રહ્યું છે, તેમાં જોરદાર તેજી આવવાની સંભાવના છે, પરંતુ તેના માટે માત્ર એક જ 'ટ્રિગર'ની જરૂર છે. જો તે સફળ થશે, તો વિદેશી રોકાણકારો ફરીથી ભારત તરફ આકર્ષાશે.

બજારની તેજી પાછળનું મુખ્ય કારણ શું રહેશે?

રઘુરામ રાજને સ્પષ્ટપણે જણાવ્યું કે, ભારતીય શેરબજાર ત્યારે જ મજબૂત બનશે જ્યારે અમેરિકા સાથેનો વેપાર કરાર સફળતાપૂર્વક પાર પડશે. તેમણે ભારપૂર્વક કહ્યું કે હાલમાં ભારત દ્વારા વસૂલવામાં આવતો ટેરિફ (આયાત ડ્યૂટી) ઘણો વધારે છે, જે ઘટાડવાની સખત જરૂર છે. તેમણે સૂચન આપ્યું કે, "આ ટેરિફ 20% કરતા ઓછો હોવો જોઈએ. જો આપણે તેને આપણા સ્પર્ધક દેશોની બરાબરીમાં લાવીને 10%થી 20%ની વચ્ચે કરી દઈએ, તો ભારતની વિકાસની અપેક્ષાઓ ફરીથી આસમાને પહોંચશે."

રોકાણકારોનો ઉત્સાહ ભારતથી અમેરિકા તરફ કેમ?

છેલ્લા કેટલાક સમયથી ભારતીય બજાર દબાણમાં છે, જ્યારે અમેરિકન બજારમાં જબરદસ્ત ઉછાળો જોવા મળ્યો છે. આ તફાવતનું કારણ સમજાવતા રાજને આર્ટિફિશિયલ ઇન્ટેલિજન્સ (AI)નો ઉલ્લેખ કર્યો. તેમણે કહ્યું, "સીધી વાત એ છે કે ભારતમાંથી ઉત્સાહ અમેરિકા તરફ વળ્યો છે." તેમણે ઇન્ટરનેટના શરૂઆતી દિવસોનું ઉદાહરણ આપતા કહ્યું, "જ્યારે પણ કોઈ નવી ટેકનોલોજી આવે છે, ત્યારે શરૂઆતમાં ખૂબ ઉત્સાહ હોય છે, જે પછીથી નિરાશામાં ફેરવાય છે, પણ અંતે તે વાસ્તવિકતા બને છે. એમેઝોન ડોટ-કોમ બૂમ વખતે ખૂબ ચાલ્યું, પછી ગગડ્યું, પણ જો ત્યારે કોઈએ રોકાણ કર્યું હોત તો આજે તે માલામાલ હોત. આજે AIને કારણે એમેઝોન ફરી ઉંચાઈ પર છે."

ભારતનું અર્થતંત્ર અને રોકાણકારો માટે સલાહ

રઘુરામ રાજને સ્વીકાર્યું કે ભારત સારી ગતિથી વિકાસ કરી રહ્યું છે, પરંતુ ઊંચા ટેરિફ વિકાસ પર કાળા વાદળ સમાન છે. જો ટેરિફ ઘટશે અને અમેરિકા સાથે ડીલ થશે તો વિદેશી રોકાણકારોનો વિશ્વાસ વધશે અને બજાર સારું પ્રદર્શન કરશે.