Closing Bell: દિવસના હાઈથી સેન્સેક્સમાં મોટો કડાકો, નિફ્ટી 23,650 આસપાસ બંધ; Grasim શેર 6% ઉછળ્યો

Closing Bell: ભારતીય શેરબજારમાં આજે ભારે ઉતાર-ચઢાવ જોવા મળ્યો. શરૂઆતમાં સેન્સેક્સ અને નિફ્ટી બંનેમાં સારી તેજી હતી, પરંતુ ઊંચા સ્તરે પ્રોફિટ બુકિંગ શરૂ થતા બજાર ધીમે ધીમે લાલ નિશાનમાં સરકી ગયું. દિવસ દરમિયાન સેન્સેક્સે 75,945 નો ઇન્ટ્રાડે હાઈ બનાવ્યો હતો, પરંતુ બાદમાં તે 74,996 સુધી લપસી ગયો. એટલે કે દિવસના ઊંચા સ્તરેથી બજારમાં મોટો કડાકો જોવા મળ્યો.

કારોબારના અંતે સેન્સેક્સ 135.03 અંક એટલે કે 0.18% ઘટીને 75,183.36 પર બંધ થયો. બીજી તરફ નિફ્ટી 4.30 અંક એટલે કે 0.02% ના ઘટાડા સાથે 23,654.70 પર બંધ રહ્યો.

શરૂઆતની તેજી કેમ ટકી નહીં?

બજાર ખુલ્યા બાદ શરૂઆતમાં બુલ્સનો દબદબો જોવા મળ્યો હતો. એક સમયે સેન્સેક્સ 327.74 અંક વધીને 75,646.13 પર પહોંચ્યો હતો, જ્યારે નિફ્ટી 111.75 અંકની તેજી સાથે 23,772.05 સુધી ગયો હતો. સવારે લગભગ 10:40 વાગ્યે પણ સેન્સેક્સ 147.43 અંક વધીને 75,465.82 પર અને નિફ્ટી 76.95 અંક વધીને 23,735.95 પર ટ્રેડ થઈ રહ્યો હતો. જોકે ઊંચા લેવલ પર રોકાણકારોએ નફો બુક કરવાનું શરૂ કર્યું અને પછી બજારની દિશા બદલાઈ ગઈ.

વિદેશી સંસ્થાકીય રોકાણકારો એટલે કે FII દ્વારા વેચવાલી પણ બજાર પર દબાણનું કારણ બની. બુધવારે FII એ 1,597.35 કરોડ રૂપિયાના શેર વેચ્યા હતા.

Grasim નિફ્ટીનો ટોપ ગેનર

નબળા બજાર વચ્ચે પણ કેટલાક શેરોમાં મજબૂત ખરીદી જોવા મળી. Grasim Industries નો શેર 6.17% ઉછળી નિફ્ટીમાં ટોપ ગેનર બન્યો. આ સિવાય InterGlobe Aviation માં 3.25% અને Apollo Hospitals માં 2.85% નો વધારો જોવા મળ્યો.