Share Market : સેન્સેક્સ 753 પોઈન્ટ ઉછળ્યો, રોકાણકારોની સંપત્તિમાં રુપિયા 3 લાખ કરોડનો તોતિંગ વધારો

Share Market : અમેરિકા અને ઈરાન વચ્ચે યોજાનારી બીજા રાઉન્ડની શાંતિ વાર્તા પહેલા આજે ભારતીય શેરબજારમાં ભારે ઉત્સાહ જોવા મળ્યો હતો. સતત ત્રીજા ટ્રેડિંગ દિવસે સેન્સેક્સ અને નિફ્ટી ગ્રીન ઝોનમાં બંધ થયા છે. આજે નિફ્ટીની વીકલી એક્સપાયરી હોવાથી બજારમાં ભારે હલચલ જોવા મળી હતી, પરંતુ તેજીનો દબદબો કાયમ રહ્યો હતો.

રોકાણકારો પર થઈ રૂપિયાની મહેરબાની

બજારમાં આવેલી આ તેજીને કારણે BSE પર લિસ્ટેડ કંપનીઓનું માર્કેટ કેપ આજે 3 લાખ કરોડ રૂપિયા વધી ગયું છે. એટલે કે માત્ર એક જ દિવસમાં રોકાણકારોની સંપત્તિમાં 3.03 લાખ કરોડ રૂપિયાનો જંગી વધારો થયો છે. કારોબારના અંતે સેન્સેક્સ 753.03 પોઈન્ટ અથવા 0.96% વધીને 79,273.33 પર બંધ થયો હતો, જ્યારે નિફ્ટી 50 ઇન્ડેક્સ 211.75 પોઈન્ટ અથવા 0.87% ની મજબૂતી સાથે 24,576.60 ના સ્તર પર સ્થિર થયો હતો.

આ સેક્ટર્સમાં રહી સૌથી વધુ રોનક

આજના દિવસે એફએમસીજી (FMCG), પ્રાઈવેટ બેન્ક અને રિયલ્ટી શેરોએ બજારને મોટો સપોર્ટ આપ્યો હતો. નિફ્ટી એફએમસીજીમાં અંદાજે 3% નો ઉછાળો રહ્યો. નિફ્ટી રિયલ્ટી ઇન્ડેક્સ 2% થી વધુ મજબૂત થયો. તો નિફ્ટી પ્રાઈવેટ બેન્કમાં પણ 1.5% ની તેજી જોવા મળી હતી. બીજી તરફ, માત્ર ફાર્મા અને કન્ઝ્યુમર ડ્યુરેબલ્સ ઇન્ડેક્સમાં જ મામૂલી ઘટાડો નોંધાયો હતો.

સેન્સેક્સના દિગ્ગજ શેરોની સ્થિતિ

સેન્સેક્સના 30 શેરોમાંથી 17 શેરો ગ્રીન ઝોનમાં બંધ થયા હતા. ટ્રેન્ટ, એચયુએલ (HUL) અને આઈસીઆઈસીઆઈ બેન્ક આજે ટોપ ગેનર્સ રહ્યા હતા. જ્યારે ટાઈટન અને બીઈએલ (BEL) માં સૌથી વધુ ઘટાડો જોવા મળ્યો હતો.