Share Market: IT સેક્ટરના વળતા પાણી? નિફ્ટીમાં વેઇટેજ ઘટીને 26 વર્ષના તળિયે, રોકાણકારોમાં ફફડાટ

Nifty 50 IT Sector Weightage: ભારતીય શેરબજારમાં જે સેક્ટર હંમેશા રોકાણકારોનું માનીતું રહ્યું છે, તેવા આઈટી (IT) સેક્ટરમાં અત્યારે ભારે મંદીનો માહોલ જોવા મળી રહ્યો છે. છેલ્લા કેટલાક દિવસોથી દેશની દિગ્ગજ આઈટી કંપનીઓ જેવી કે ટાટા કન્સલ્ટન્સી સર્વિસીસ (TCS), ઈન્ફોસીસ, વિપ્રો અને HCL ટેકના શેરોમાં જે રીતે વેચવાલી નીકળી છે, તેના કારણે એક મોટો રેકોર્ડ તૂટ્યો છે. નિફ્ટી 50 ઈન્ડેક્સમાં આઈટી સેક્ટરનું વજન (વેઇટેજ) ઘટીને છેક 26 વર્ષના તળિયે પહોંચી ગયું છે.

માર્ચ 1999 પછીની સૌથી નીચી સપાટી

આંકડાઓ પર નજર કરીએ તો, હાલમાં નિફ્ટી 50માં આઈટી સર્વિસીસ સેક્ટરનું કુલ વેઇટેજ ઘટીને માત્ર 8.8 ટકા રહી ગયું છે. તમને જાણીને નવાઈ લાગશે કે આ સ્તર માર્ચ 1999 પછીનું સૌથી નીચું સ્તર છે. એ સમયે ઈન્ડેક્સમાં આઈટી સેક્ટરનું યોગદાન માત્ર 7.1 ટકા હતું.

આ ઘટાડો કેટલો મોટો છે તે સમજવા માટે આપણે થોડા પાછળ જવું પડશે. કોરોના મહામારીના સમયમાં એટલે કે માર્ચ 2021માં આ સેક્ટરનું વેઇટેજ 16.2 ટકાની ટોચ પર હતું. જ્યારે ગયા વર્ષે માર્ચના અંતમાં તે 11.7 ટકા હતું, જે હવે સીધું 8.8 ટકા પર આવી ગયું છે.

બીજા નંબરનું સ્થાન પણ ગુમાવ્યું

છેલ્લા 6 વર્ષમાં આવું પહેલીવાર બન્યું છે કે આઈટી સેક્ટર હવે બેન્ચમાર્ક ઈન્ડેક્સમાં બીજા નંબરનું સૌથી મોટું સેક્ટર નથી રહ્યું. આ સ્થાન હવે 'ઓઈલ એન્ડ ગેસ' સેક્ટરે લઈ લીધું છે. જેમાં રિલાયન્સ ઈન્ડસ્ટ્રીઝ જેવી કંપનીઓનો સમાવેશ થાય છે. ઓઈલ એન્ડ ગેસ સેક્ટરનું વેઇટેજ હવે 9.2 ટકા છે.

જ્યારે પહેલા નંબર પર ‘બેન્કિંગ અને ફાઈનાન્શિયલ સર્વિસીસ' (BFSI) સેક્ટરનો દબદબો કાયમ છે, જેનું વેઇટેજ 36.5 ટકા છે. આમ, નિફ્ટીમાં હવે IT સેક્ટર ત્રીજા ક્રમે ધકેલાઈ ગયું છે.