Stock Market Crash: મિડલ ઈસ્ટમાં યુદ્ધના ભણકારા વચ્ચે શેરબજારમાં હાહાકાર, રોકાણકારોના 8 લાખ કરોડ ડૂબ્યા, આ 10 શેરો પર સીધી અસર

Iran Israel conflict impact on market: ઈરાન અને મિડલ ઈસ્ટ (પશ્ચિમ એશિયા) માં યુદ્ધ જેવી સ્થિતિ ઊભી થતાં તેની સીધી અસર ભારતીય શેરબજાર પર જોવા મળી છે. 2 માર્ચના રોજ શેરબજાર ખૂલતાની સાથે જ ભારે વેચવાલી (Sell-off) શરૂ થઈ ગઈ હતી. શરૂઆતની થોડી જ મિનિટોમાં રોકાણકારોના 8 લાખ કરોડ રૂપિયાથી વધુ સ્વાહા થઈ ગયા હતા. સેન્સેક્સમાં પણ 1400 પોઈન્ટ જેટલો મોટો કડાકો જોવા મળ્યો હતો.

મિડલ ઈસ્ટમાં તણાવ વધવાને કારણે એવી કંપનીઓના શેરમાં સૌથી વધુ ઘટાડો જોવા મળ્યો છે, જેમનો બિઝનેસ અથવા ઓર્ડર બુક આ વિસ્તાર સાથે જોડાયેલી છે. બીજી તરફ, યુદ્ધના માહોલના કારણે અમુક કંપનીઓના શેરમાં મોટો ઉછાળો પણ નોંધાયો છે. ચાલો જોઈએ એવા 10 શેરોની લિસ્ટ, જેના પર આ સંકટની સૌથી મોટી અસર પડી છે:

આ શેરોમાં જોવા મળ્યો મોટો ઘટાડો:

લાર્સન એન્ડ ટુબ્રો (L&T): દેશની સૌથી મોટી ઇન્ફ્રાસ્ટ્રક્ચર કંપનીના શેરમાં શરૂઆતી કારોબારમાં 5% થી વધુનો ઘટાડો નોંધાયો. કંપનીની કુલ ઓર્ડર બુકનો લગભગ 35% હિસ્સો મિડલ ઈસ્ટમાંથી આવે છે, જેના કારણે રોકાણકારો ચિંતામાં મુકાયા છે.

વીએ ટેક વાબેગ (VA Tech Wabag): આ કંપનીના શેરમાં પણ 4% થી વધુનું ગાબડું પડ્યું. આ કંપની મિડલ ઈસ્ટમાં, ખાસ કરીને સાઉદી અરેબિયામાં ઘણા મોટા પ્રોજેક્ટ્સ ચલાવી રહી છે.

કલ્પતરુ પ્રોજેક્ટ્સ (Kalpataru Projects): કંપનીના શેર 3% થી વધુ તૂટ્યા છે. ચાલુ નાણાકીય વર્ષના પહેલા 9 મહિનામાં કંપનીની 11% ઓર્ડર બુક મિડલ ઈસ્ટ સાથે જોડાયેલી રહી છે. આ વિસ્તારમાં મોટા પ્રોજેક્ટ્સ માટે આ કંપની સૌથી ઓછી બોલી લગાવવા માટે જાણીતી છે.

એફએમસીજી અને ચોખાની નિકાસ કરતી કંપનીઓ: મિડલ ઈસ્ટ એ ભારતીય બાસમતી ચોખા માટેનું બહુ મોટું માર્કેટ છે. KRBL ને તેની બાસમતી ચોખાની નિકાસની આવકનો 61% હિસ્સો મિડલ ઈસ્ટ અને GCC વિસ્તારમાંથી મળે છે, જેના કારણે તેનો શેર 2% તૂટ્યો. આ ઉપરાંત LT Foods નો શેર 8% અને ચમન લાલ સેતિયા એક્સપોર્ટ્સનો શેર 4% ના ઘટાડા સાથે ટ્રેડ થતો જોવા મળ્યો. નાણાકીય વર્ષ 2025 માં LT Foods ની 9% આવક મિડલ ઈસ્ટમાં એક્સપોર્ટ કરવાથી આવી હતી.