શેરબજારમાં જોરદાર તેજી: સેન્સેક્સ 800 પોઈન્ટથી વધુ ઉછળ્યો, નિફ્ટી 24200ને પાર

ભારતીય શેરબજારમાં બુધવારે રોકાણકારો માટે દિવાળી જેવો માહોલ જોવા મળ્યો છે. એશિયાઈ બજારોના પોઝિટિવ સંકેતો અને મોટી કંપનીઓના શાનદાર ત્રિમાસિક પરિણામોને કારણે શેરબજારમાં જબરદસ્ત ઉછાળો આવ્યો છે. બ્લૂ-ચિપ શેરોમાં ખરીદી વધતા સેન્સેક્સ અને નિફ્ટી બંને મહત્વના સ્તરો પાર કરી ગયા છે.

બજારની આજની હિલચાલ

બુધવારે સવારે 30 શેરો ધરાવતો BSE સેન્સેક્સ 77,245 પોઈન્ટ પર ખુલ્યો હતો, જે મંગળવારે 76,886 પોઈન્ટ પર બંધ થયો હતો. બપોરે 1:48 વાગ્યે સેન્સેક્સ 871.05 પોઈન્ટ અથવા 1.13% ના વધારા સાથે 77,757.96 પર ટ્રેડ કરી રહ્યો હતો.

બીજી તરફ, નેશનલ સ્ટોક એક્સચેન્જનો નિફ્ટી-50 પણ 24,096 પર ખૂલ્યા બાદ તરત જ 24,100 ની સપાટી વટાવી ગયો હતો. બપોરે 1:48 વાગ્યે નિફ્ટી 265.35 પોઈન્ટ અથવા 1.11% ના ઉછાળા સાથે 24,261.05 પર જોવા મળ્યો હતો. બજારને ઉપર લઈ જવામાં આઈટી સ્ટોક્સ અને ઈન્ડેક્સ હેવીવેઈટ રિલાયન્સ ઈન્ડસ્ટ્રીઝના શેરનો મોટો ફાળો રહ્યો છે.

વૈશ્વિક બજારોની સ્થિતિ અને તેલના ભાવ

ગ્લોબલ માર્કેટમાં અત્યારે મિશ્ર પ્રતિસાદ જોવા મળી રહ્યો છે. સંયુક્ત આરબ અમીરાત (UAE) દ્વારા પેટ્રોલિયમ નિકાસ કરતા દેશોના સંગઠન (OPEC) માંથી બહાર નીકળવાના સમાચારની અસર બજાર પર જોવા મળી રહી છે.

હોંગકોંગનો હેંગસેંગ ઈન્ડેક્સ 1.25% વધ્યો છે, જ્યારે કોસ્પી અને એસએન્ડપી એએસએક્સમાં મામૂલી ઘટાડો નોંધાયો છે.