શેરબજારમાં સળંગ 3 દિવસની રજા, 2 ઓક્ટોબરે ગાંધી જયંતિ નિમિત્તે BSE-NSE અને બેંકો રહેશે બંધ, જાણો ક્યારે ખુલશે માર્કેટ

Stock Market Holiday: શેરબજારમાં રોકાણ કરતા અને રોજબરોજ ટ્રેડિંગ કરતા લોકો માટે એક જરૂરી સમાચાર છે. શુક્રવાર, 2 ઓક્ટોબરના રોજ શેરબજારમાં કોઈ જ કામકાજ નહીં થાય. ગાંધી જયંતિના રાષ્ટ્રીય પર્વ નિમિત્તે બોમ્બે સ્ટોક એક્સચેન્જ અને નેશનલ સ્ટોક એક્સચેન્જ સંપૂર્ણપણે બંધ રહેશે.

રોકાણકારો માટે સળંગ 3 દિવસની રજા

શેરબજાર અઠવાડિયામાં માત્ર પાંચ દિવસ જ ખુલ્લું રહે છે. ગુરુવારે 1 ઓક્ટોબરે આ સપ્તાહનો છેલ્લો ટ્રેડિંગ દિવસ હતો. હવે 2 ઓક્ટોબરે શુક્રવારની જાહેર રજા છે અને ત્યારબાદ 3 ઓક્ટોબર (શનિવાર) તથા 4 ઓક્ટોબર (રવિવાર) ની માર્કેટની નિયમિત રજા રહેશે. આનો સીધો અર્થ એ છે કે હવે શેરબજાર સીધું સોમવારે એટલે કે 5 ઓક્ટોબરના રોજ તેના નિયમિત સમયે ખુલશે.

કોમોડિટી માર્કેટ અને બેંકો પણ રહેશે બંધ

માત્ર શેરબજાર જ નહીં, પરંતુ કોમોડિટી એક્સચેન્જ પણ ગાંધી જયંતિના દિવસે બંધ રહેશે. MCX માં સવાર અને સાંજ એમ બંને સત્રમાં ટ્રેડિંગ થશે નહીં. અહીં પણ સોમવાર, 5 ઓક્ટોબરથી સામાન્ય કામકાજ શરૂ થશે. આ ઉપરાંત, તમામ સરકારી અને ખાનગી ઓફિસો સહિત દેશની તમામ બેંકો બંધ રહેશે. જેમાં સરકારી, પ્રાઇવેટ, કો-ઓપરેટિવ, ક્ષેત્રીય ગ્રામીણ બેંક અને વિદેશી બેંકોની શાખાઓનો સમાવેશ થાય છે.

બેંકિંગ સેવાઓ પર અસર

બેંકોમાં રજા હોવાથી શુક્રવારે ચેક ક્લિયરિંગનું કામ અટકેલું રહેશે. જોકે, ગ્રાહકોને કોઈ મુશ્કેલી ન પડે તે માટે એટીએમ અને નેટ બેન્કિંગની સુવિધાઓ રાબેતા મુજબ ચાલુ રહેશે.