Stock Market : શેરબજારમાં ઉથલપાથલ- સેન્સેક્સ 300 અંક તૂટ્યો, રિલાયન્સ અને અદાણી ગ્રીનના પરિણામો પર રહેશે સૌની નજર

Stock Market : ભારતીય શેરબજાર માટે સપ્તાહનો અંતિમ દિવસ એટલે કે શુક્રવાર, 24 April ભારે ઉતાર-ચઢાવ વાળો સાબિત થઈ રહ્યો છે. શરૂઆતી સંકેતો પોઝિટિવ હોવા છતાં બજાર ખુલતાની સાથે જ દબાણ જોવા મળ્યું હતું. સેન્સેક્સમાં 300 અંકોનો ઘટાડો નોંધાયો છે, જ્યારે નિફ્ટી 24100 ની મહત્વની સપાટી તોડીને નીચે સરકી ગયો છે.

ગિફ્ટ નિફ્ટીના પોઝિટિવ સંકેતો છતાં બજાર નરમ

સવારે ગિફ્ટ નિફ્ટી ફ્યુચર્સમાં 92 અંકનો ઉછાળો જોવા મળ્યો હતો અને તે 24250 ના સ્તર પર ટ્રેડ કરી રહ્યો હતો. આ સંકેતો જોતા અપેક્ષા હતી કે બજાર મજબૂતી સાથે ખુલશે, પરંતુ પ્રોફિટ બુકિંગ અને વૈશ્વિક અનિશ્ચિતતાને કારણે બજારે શરૂઆતી તેજી ગુમાવી દીધી હતી.

યુદ્ધવિરામ અને વૈશ્વિક સ્થિતિની અસર

વૈશ્વિક મોરચે એક રાહતના સમાચાર એ છે કે ઈઝરાયેલ અને લેબનાન વચ્ચેના યુદ્ધવિરામને વધુ 3 સપ્તાહ માટે લંબાવવામાં આવ્યો છે. વ્હાઇટ હાઉસમાં રાષ્ટ્રપતિ ડોનાલ્ડ ટ્રમ્પ સાથેની બેઠક બાદ આ નિર્ણય લેવાયો છે. જોકે, બીજી તરફ અમેરિકા અને ઈરાન વચ્ચેની વાતચીતમાં અવરોધ આવતા હોરમુઝની ખાડીમાંથી થતી એનર્જી સપ્લાય ખોરવાવાની ભીતિ સેવાઈ રહી છે, જેની અસર એશિયન માર્કેટ પર જોવા મળી છે.

ક્રૂડ ઓઈલ $107 ને પાર

મોંઘવારીના મોરચે ભારતીય અર્થતંત્ર માટે ચિંતાજનક સમાચાર છે. આંતરરાષ્ટ્રીય બજારમાં બ્રન્ટ ક્રૂડ ઓઈલની કિંમત 107 ડોલર પ્રતિ બેરલ સુધી પહોંચી ગઈ છે. હોરમુઝ જળડમરુમધ્યમાં નાકેબંધીને કારણે સપ્લાય ચેઈન પ્રભાવિત થઈ છે, જેની સીધી અસર તેલના ભાવ પર પડી રહી છે.