Edelweiss Mutual Fundની ચમકદાર સફર: ત્રણ વર્ષમાં AUM 1.64 લાખ કરોડ પહોંચ્યું, SIPમાં 500 કરોડનો માઈલસ્ટોન!

Edelweiss Mutual Fund: મ્યુચ્યુઅલ ફંડની દુનિયામાં આજકાલ ઝડપી વૃદ્ધિનો સમય ચાલી રહ્યો છે. આમાં Edelweiss Mutual Fundએ ત્રણ વર્ષમાં અદ્ભુત કમાલ કરી બતાવી છે. ફંડ હાઉસનું કુલ AUM (એસેટ્સ અંડર મેનેજમેન્ટ) 31 ઓક્ટોબર 2025 સુધીમાં 1.64 લાખ કરોડ રૂપિયા પહોંચી ગયું છે. આ 2022ના ઓક્ટોબરમાં 91,000 કરોડનું હતું, એટલે કે માત્ર ત્રણ વર્ષમાં 80%થી વધુનો વધારો થયો છે. આ સફળતાની વાત એડલવેઇસની MD અને CEO રાધિકા ગુપ્તાએ સોશિયલ મીડિયા પ્લેટફોર્મ X પર શેર કરી છે.

રાધિકા ગુપ્તાએ તેમના પોસ્ટમાં લખ્યું, "એડલવેઇસ MFના આ આંકડા ખૂબ જ રસપ્રદ છે. અમારા રોકાણકારો અને વિતરણ ભાગીદારોને આભાર કે અમે 500 કરોડની SIP બુકનો માઈલસ્ટોન પાર કર્યો." તેઓએ 2022 અને 2025ની તુલના કરીને જણાવ્યું કે ઇક્વિટી અને હાઇબ્રિડ AUM લગભગ ચાર ગણું વધીને 21,000 કરોડથી 84,000 કરોડ થયું છે. આ બતાવે છે કે રોકાણકારો લાંબા ગાળાના ધન વૃદ્ધિ માટે મ્યુચ્યુઅલ ફંડ તરફ વધુ આકર્ષાઈ રહ્યા છે.

SIP (સિસ્ટમેટિક ઇન્વેસ્ટમેન્ટ પ્લાન)માં પણ ગઝબનો ગ્રોથ જોવા મળ્યો છે. માસિક SIP બુક 2022માં 142 કરોડ હતી, જે 2025માં 513 કરોડ થઈ ગઈ. આ રોકાણકારોના વધતા વિશ્વાસ અને નિયમિત રોકાણનું પરિણામ છે. રોકાણકારોની ફોલિયો સંખ્યા 10.93 લાખથી વધીને 31.5 લાખ થઈ ગઈ, જે ત્રણ ગણાથી પણ વધુ છે. SIP ફોલિયો પણ 3.50 લાખથી ચાર ગણા વધીને 13.8 લાખ પહોંચ્યા છે.

અન્ય આંકડા જુઓ તો, 30 સપ્ટેમ્બર 2025 સુધીમાં એડલવેઇસ MFનું AUM 1.79 લાખ કરોડ હતું અને તે 67 સ્કીમ્સનું સંચાલન કરે છે. આમાં 28 ઇક્વિટી, 5 હાઇબ્રિડ, 19 ડેટ, 3 કોમોડિટી આધારિત અને 12 અન્ય સ્કીમ્સ (જેમાં પેસિવ ફંડ્સ પણ સામેલ) છે. રાધિકા ગુપ્તાએ રોકાણકારો અને ભાગીદારોને આ સફળતા માટે વારંવાર આભાર માન્યો છે. આ વૃદ્ધિ મ્યુચ્યુઅલ ફંડ ઇન્ડસ્ટ્રીના ભાવિના સંકેત તરીકે જોવામાં આવે છે, જ્યાં નાના રોકાણકારો પણ મોટા લાભની તરફ આગળ વધી રહ્યા છે.

આ પણ વાંચો-  કાર્તિક પૂર્ણિમા 2025: આજે માટીની આ 4 વસ્તુઓ ખરીદો, મા લક્ષ્મીની સમૃદ્ધિ કૃપા વરસશે!