Mutual Fund Investment: છેલ્લા થોડા સમયથી શેરબજાર જાણે રોલર કોસ્ટર રાઈડ પર હોય તેવું વર્તન કરી રહ્યું છે. ક્યારેક બજાર સડસડાટ ઉપર ભાગે છે, તો ક્યારેક અચાનક પટકાય છે. બજારની આ ઉથલપાથલની સીધી અસર સામાન્ય રોકાણકારોના મનોબળ પર પડી છે.
Mutual Fund Investment: શેરબજારની ઉથલપાથલથી રોકાણકારો ગભરાયા? ઇક્વિટી ફંડમાં ઘટાડો અને Gold ETFમાં 106% નો જંગી ઉછાળો!
Mutual Fund Investment: જાન્યુઆરી 2026માં શેરબજારની અસ્થિરતાને કારણે ઇક્વિટી મ્યુચ્યુઅલ ફંડમાં રોકાણ ઘટ્યું છે, જ્યારે સુરક્ષિત વિકલ્પ તરીકે Gold ETFમાં 106%નો રેકોર્ડબ્રેક વધારો થયો છે. જાણો AMFI ના લેટેસ્ટ આંકડા અને રોકાણકારોનો બદલાયેલો મૂડ.
MoneyControl Newsઅપડેટેડ Feb 11, 2026 પર 1:49 PM
એસોસિએશન ઓફ મ્યુચ્યુઅલ ફંડ્સ ઈન ઈન્ડિયા (AMFI) દ્વારા જાહેર કરવામાં આવેલા જાન્યુઆરી 2026ના આંકડાઓ કંઈક એવો જ ઈશારો કરે છે. આ વર્ષના પહેલા મહિનામાં ઇક્વિટી મ્યુચ્યુઅલ ફંડ્સમાં રોકાણ ઘટ્યું છે, જ્યારે સુરક્ષિત ગણાતા ‘ગોલ્ડ ETF' તરફ લોકોનો ઝુકાવ જબરદસ્ત વધ્યો છે. નવાઈની વાત એ છે કે આ વખતે ઇક્વિટી કરતા ગોલ્ડ ETFમાં વધારે રકમનું રોકાણ થયું છે.
જાન્યુઆરી મહિનામાં કેટલું રોકાણ આવ્યું?
AMFIના ડેટા મુજબ, જાન્યુઆરી 2026માં ઇક્વિટી મ્યુચ્યુઅલ ફંડ્સમાં કુલ 24,028 કરોડ રૂપિયાનું રોકાણ આવ્યું હતું. જો આપણે આની સરખામણી ડિસેમ્બર 2025 સાથે કરીએ, તો ત્યારે 28,054 કરોડ રૂપિયા આવ્યા હતા. એટલે કે એક જ મહિનામાં રોકાણમાં સીધો 14%નો ઘટાડો નોંધાયો છે.
જો આપણે ગયા વર્ષના જાન્યુઆરી (2025) સાથે તુલના કરીએ તો સ્થિતિ વધુ ગંભીર લાગે છે. ગયા વર્ષે જાન્યુઆરીમાં 39,687 કરોડ રૂપિયાનું રોકાણ આવ્યું હતું, જેની સામે આ વર્ષે 39% નો ઘટાડો જોવા મળ્યો છે.
રોકાણકારોની પહેલી પસંદ કયો ફંડ?
ભલે ઇક્વિટીમાં રોકાણ ઘટ્યું હોય, પરંતુ અમુક કેટેગરીમાં હજુ પણ લોકોનો વિશ્વાસ અકબંધ છે:
ફ્લેક્સીકેપ ફંડ (Flexicap Fund): આ કેટેગરી રોકાણકારોની ફેવરિટ રહી છે, જેમાં સૌથી વધુ 7,672 કરોડ રૂપિયાનું રોકાણ આવ્યું.
મિડકેપ અને સ્મોલકેપ: મિડકેપ ફંડમાં 3,185 કરોડ અને સ્મોલકેપ ફંડમાં 2,942 કરોડ રૂપિયા આવ્યા. જોકે, ગત મહિનાની સરખામણીમાં આ બંને કેટેગરીમાં અનુક્રમે 24% અને 23% નો ઘટાડો થયો છે.
ELSS ફંડ: ટેક્સ સેવિંગ માટે જાણીતા ELSS ફંડમાંથી રોકાણકારોએ 593 કરોડ રૂપિયા ઉપાડી લીધા (Outflow) છે.
બીજી તરફ, ફોકસ્ડ ફંડમાં રોકાણ 47% વધ્યું છે અને લાર્જકેપ ફંડમાં પણ 28% નો વધારો જોવા મળ્યો છે.
ગોલ્ડ ETF બન્યું સુપરહીરો: 100%થી વધુનો વધારો
શેરબજારની વોલેatિલિટી વચ્ચે સોનાએ ફરી પોતાની ચમક બતાવી છે. જાન્યુઆરી મહિનામાં ગોલ્ડ ETF (Gold ETFs) માં ઐતિહાસિક ઉછાળો આવ્યો છે. જાન્યુઆરીમાં ગોલ્ડ ETF માં કુલ 24,039 કરોડ રૂપિયાનું જંગી રોકાણ આવ્યું. આ આંકડો ડિસેમ્બર મહિના કરતા 106% વધારે છે. સોનાના ભાવમાં થઈ રહેલા સતત વધારાને કારણે રોકાણકારો હવે શેરબજાર કરતા સોનામાં રોકાણ કરવાનું વધુ સુરક્ષિત માની રહ્યા છે. આંકડાઓ દર્શાવે છે કે આ મહિને ઇક્વિટી ફંડ કરતા પણ વધુ પૈસા ગોલ્ડ ETF માં રોકાયા છે.
ડેટ ફંડમાં પણ સારા દિવસો પાછા આવ્યા
છેલ્લા બે મહિનાથી (નવેમ્બર-ડિસેમ્બર 2025) ડેટ ફંડમાંથી પૈસા બહાર જઈ રહ્યા હતા, પરંતુ જાન્યુઆરીમાં ચિત્ર બદલાયું છે. જાન્યુઆરી 2026માં ડેટ ફંડમાં (Debt Fund) કુલ 74,827 કરોડ રૂપિયાનું રોકાણ આવ્યું. સૌથી વધુ રોકાણ ‘ઓવરનાઈટ ફંડ'માં 46,280 કરોડ રૂપિયા આવ્યું છે. જોકે, કોર્પોરેટ બોન્ડ ફંડમાંથી રોકાણકારોએ 11,472 કરોડ રૂપિયા પાછા ખેંચી લીધા છે.
હાઈબ્રિડ ફંડ અને વિદેશી ફંડમાં તેજી
હાઈબ્રિડ ફંડ: ઓછા જોખમ સાથે રિટર્ન મેળવવા માંગતા રોકાણકારોએ હાઈબ્રિડ ફંડમાં 17,356 કરોડ રૂપિયાનું રોકાણ કર્યું, જે ડિસેમ્બર કરતા 61% વધુ છે. મલ્ટી-એસેટ એલોકેશન ફંડમાં સૌથી વધુ 10,485 કરોડ આવ્યા.
આર્બિટ્રાજ ફંડ: આમાં તો ગજબનો ઉછાળો જોવા મળ્યો છે. રોકાણ 2,507% વધીને 3,293 કરોડ પર પહોંચી ગયું છે.
વિદેશી ફંડ: વિદેશોમાં રોકાણ કરતા ફંડ-ઓફ-ફંડ્સમાં પણ 501% નો ઉછાળો આવ્યો છે અને તેમાં 881 કરોડ રૂપિયાનું રોકાણ થયું છે.
એકંદરે AMFI ના આંકડા સ્પષ્ટ કરે છે કે જાન્યુઆરી મહિનામાં રોકાણકારો થોડા સાવધ થયા છે. શેરબજારની અનિશ્ચિતતાને કારણે તેઓ ઇક્વિટીમાંથી થોડું અંતર રાખીને સોના (Gold) અને ડેટ ફંડ (Debt Fund) જેવા સુરક્ષિત વિકલ્પો તરફ વળ્યા છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.