મ્યુચ્યુઅલ ફંડમાં રોકાણકારોનો જબરદસ્ત ભરોસો: SIP AUM 23% વધીને 18.62 લાખ કરોડને પાર, જાણો લેટેસ્ટ ડેટા

Mutual Fund India: આજના સમયમાં સામાન્ય માણસથી લઈને મોટા રોકાણકારો સુધી દરેક માટે મ્યુચ્યુઅલ ફંડ રોકાણનો એક ફેવરિટ વિકલ્પ બની ગયું છે. ખાસ કરીને સિસ્ટમેટિક ઇન્વેસ્ટમેન્ટ પ્લાન દ્વારા લોકો શેરબજારમાં રોકાણ કરવાનું વધુ પસંદ કરી રહ્યા છે. અમદાવાદ સહિત દેશભરમાં SIP નો ક્રેઝ એટલી ઝડપથી વધી રહ્યો છે કે મ્યુચ્યુઅલ ફંડ ઇન્ડસ્ટ્રી સતત નવા રેકોર્ડ બનાવી રહી છે.

SIP રોકાણમાં આવ્યો જંગી ઉછાળો

ફ્રેન્કલિન ટેમ્પલટનના તાજેતરના રિપોર્ટ અનુસાર, ઓગસ્ટ 2026માં મ્યુચ્યુઅલ ફંડમાં SIP દ્વારા મેનેજ થતી એસેટ્સ વાર્ષિક ધોરણે 23% વધીને 18.62 લાખ કરોડ રૂપિયા સુધી પહોંચી ગઈ છે. સતત આવતા નવા ફંડ અને નવા ખૂલી રહેલા ખાતાઓને કારણે આ અદભુત ગ્રોથ જોવા મળ્યો છે.

છેલ્લા કેટલાક વર્ષોમાં માસિક SIP રોકાણ 19,187 કરોડ રૂપિયાથી વધીને ઓગસ્ટ 2026માં 32,297 કરોડ રૂપિયાના આંકડાને સ્પર્શી ગયું છે. એટલે કે માત્ર એક જ વર્ષમાં માસિક રોકાણમાં 14% નો સીધો વધારો નોંધાયો છે. ખાતાઓની વાત કરીએ તો, SIP એકાઉન્ટ્સની સંખ્યા 12.1% વધીને 10.75 કરોડને પાર કરી ગઈ છે. ઓગસ્ટ 2026માં પૂરા થયેલા 12 મહિનામાં કુલ SIP રોકાણ 17% વધીને 3.70 લાખ કરોડ રૂપિયા થઈ ગયું છે.

રોકાણકારો હવે સીધા શેરબજારમાં રિસ્ક લેવા કરતા મ્યુચ્યુઅલ ફંડ દ્વારા ઇક્વિટીમાં રોકાણ કરવાનું વધુ સુરક્ષિત માને છે. ડેટા દર્શાવે છે કે કુલ ઇક્વિટી ફંડના AUM માં SIP નો હિસ્સો ઓગસ્ટ 2026માં 30.7% ના બે વર્ષના સૌથી ઉચ્ચ સ્તરે પહોંચ્યો છે, જે ઓગસ્ટ 2024માં માત્ર 27.4% હતો.

આ ઉપરાંત, કુલ ઇક્વિટી રોકાણોમાં પણ SIPનો હિસ્સો 2024ના 24%થી વધીને 2026માં 43% થઈ ગયો છે. આ આંકડાઓ સાબિત કરે છે કે ઇક્વિટી માર્કેટમાં સંપત્તિ બનાવવા માટે SIP એક સૌથી પાવરફુલ ટૂલ બની ગયું છે.

સમગ્ર મ્યુચ્યુઅલ ફંડ ઇન્ડસ્ટ્રીનો વિકાસ

માત્ર SIP જ નહીં, મ્યુચ્યુઅલ ફંડ ઉદ્યોગના અન્ય સેક્ટરમાં પણ સારી એવી તેજી છે. ઓગસ્ટ 2026માં સમગ્ર મ્યુચ્યુઅલ ફંડ ઉદ્યોગની AUM વાર્ષિક ધોરણે 15.8% વધી છે. આ સમયગાળામાં ઇક્વિટી અને હાઇબ્રિડ ફંડ્સની AUM માં 18.5% નો વધારો જોવા મળ્યો છે, જ્યારે પેસિવ ફંડ્સ 27.2% ના દરે વધ્યા છે. રોકાણકારો કોમોડિટીઝમાં પણ રસ દાખવી રહ્યા છે. ગોલ્ડ ETF ના AUM માં 2.6 ગણો અને સિલ્વર ETF ના AUM માં 3.3 ગણો અધધ વધારો જોવા મળ્યો છે.

NFOમાં પણ રેકોર્ડ બ્રેક રોકાણ

મ્યુચ્યુઅલ ફંડ કંપનીઓએ ઓગસ્ટ 2026માં નવી ફંડ ઓફર દ્વારા પણ બજારમાંથી મોટી રકમ એકઠી કરી છે. આ મહિનામાં NFO મારફતે કુલ 7,110 કરોડ રૂપિયા એકત્ર કરવામાં આવ્યા છે, જે છેલ્લા 11 મહિનામાં કોઈ એક મહિનામાં એકત્ર થયેલી સૌથી મોટી રકમ છે.

એક નજરમાં: SIPની વધતી ગતિ

SIP AUM: 18.62 લાખ કરોડ રૂપિયા (વાર્ષિક 23%નો વધારો)

માસિક કુલ SIP રોકાણ: 32,297 કરોડ રૂપિયા (વાર્ષિક 14%નો વધારો)

SIP ખાતાઓની સંખ્યા: 10.75 કરોડ (વાર્ષિક 12.1%નો વધારો)

છેલ્લા 12 મહિનાનું કુલ રોકાણ: 3.70 લાખ કરોડ રૂપિયા (17%નો વધારો)

આ આંકડાઓ સ્પષ્ટ કરે છે કે ભારતીય રોકાણકારો હવે લાંબા ગાળાના આયોજન પર ફોકસ કરી રહ્યા છે. શેરબજારની ચઢ-ઉતર વચ્ચે પણ રોકાણકારોએ SIP પર પોતાનો ભરોસો કાયમ રાખ્યો છે, જે ભારતીય અર્થવ્યવસ્થા અને મ્યુચ્યુઅલ ફંડ ઉદ્યોગ બંને માટે એક ખૂબ જ સકારાત્મક સંકેત છે.

આ પણ વાંચો-IIP Growth: ઓગસ્ટમાં ઇન્ડસ્ટ્રીયલ પ્રોડક્શન 8% વધ્યું, મેન્યુફેક્ચરિંગ સેક્ટરમાં જબરદસ્ત તેજી