ભારતીય જનતા પાર્ટીના સંગઠનમાં એક મોટો અને મહત્વપૂર્ણ ફેરફાર જોવા મળ્યો છે. ભાજપના રાષ્ટ્રીય અધ્યક્ષ નીતિન નવીને પોતાની નવી ટીમની સત્તાવાર જાહેરાત કરી દીધી છે. સોમવારે સવારથી જ અટકળો ચાલી રહી હતી કે નવી ટીમમાં કોને સ્થાન મળશે, જેનો હવે અંત આવ્યો છે.
ભાજપમાં મોટો ફેરફાર: નીતિન નવીનની નવી ટીમ જાહેર, વસુંધરા રાજે અને સ્મૃતિ ઈરાનીને મળી મોટી જવાબદારી
ભાજપના રાષ્ટ્રીય અધ્યક્ષ નીતિન નવીને તેમની નવી ટીમની જાહેરાત કરી છે. આ સંગઠનાત્મક ફેરફારમાં વસુંધરા રાજે, સ્મૃતિ ઈરાની અને પીયૂષ ગોયલ સહિતના દિગ્ગજોને મોટી જવાબદારી સોંપવામાં આવી છે. સંપૂર્ણ લિસ્ટ અહીં જુઓ.
MoneyControl Newsઅપડેટેડ Aug 17, 2026 પર 4:08 PM
આ નવી ટીમમાં રાજસ્થાનના પૂર્વ મુખ્યમંત્રી વસુંધરા રાજે અને પૂર્વ કેન્દ્રીય મંત્રી સ્મૃતિ ઈરાનીને પાર્ટી દ્વારા ખૂબ જ મહત્વપૂર્ણ જવાબદારીઓ સોંપવામાં આવી છે. ચાલો જાણીએ કયા દિગ્ગજ નેતાને સંગઠનમાં કયું પદ આપવામાં આવ્યું છે.
કોને કયું પદ મળ્યું? જુઓ સંપૂર્ણ લિસ્ટ
નીતિન નવીનની આ નવી ટીમમાં અનુભવી નેતાઓ અને યુવા ચહેરાઓનો શાનદાર સમન્વય કરવામાં આવ્યો છે.
રાષ્ટ્રીય ઉપાધ્યક્ષ : વસુંધરા રાજે સિંધિયા, તીરથ સિંહ રાવત, રામ માધવ, બૈજયંત જય પાંડા અને રેખા વર્માને રાષ્ટ્રીય ઉપાધ્યક્ષ બનાવવામાં આવ્યા છે.
રાષ્ટ્રીય મહામંત્રી : સ્મૃતિ ઈરાની, વિનોદ તાવડે, સતીશ પુનિયા, ગજેન્દ્ર પટેલ, હરીશ દ્વિવેદી અને સંજય ભાટિયાને મહામંત્રી તરીકેની મોટી જવાબદારી સોંપાઈ છે.
રાષ્ટ્રીય કોષાધ્યક્ષ : વરિષ્ઠ નેતા પીયૂષ ગોયલને પાર્ટીના રાષ્ટ્રીય કોષાધ્યક્ષ બનાવવામાં આવ્યા છે.
સંગઠન મહામંત્રી: બી. એલ. સંતોષ તેમના જનરલ સેક્રેટરી ઓર્ગેનાઈઝેશનના પદ પર યથાવત રહેશે.
યુપી અને ગુજરાતના નેતાઓને પણ મળ્યું મહત્વ
આ ટીમમાં ઉત્તર પ્રદેશ અને ગુજરાતના નેતાઓને ખાસ ધ્યાનમાં રાખવામાં આવ્યા છે. આવતા વર્ષે યુપીમાં ચૂંટણી હોવાથી બસ્તીથી આવતા હરીશ દ્વિવેદીને બ્રાહ્મણ ચહેરા તરીકે પ્રમોટ કરી મહામંત્રી બનાવાયા છે.
જ્યારે ગુજરાત માટે મોટા સમાચાર એ છે કે વડોદરાના લોકસભા સાંસદ હેમાંગ જોશીનું મોટું પ્રમોશન થયું છે. યુવાનોને પાર્ટીની વિચારધારા સાથે જોડવાની અને પાર્ટીની નજીક લાવવાની મોટી જવાબદારી હેમાંગ જોશીને સોંપવામાં આવી છે. આ ઉપરાંત સુનીલ બંસલ પણ આ ટીમનો હિસ્સો રહેશે. હરિયાણાથી આવતા અને મનોહર લાલ ખટ્ટરના નજીકના મનાતા ABVP ના પૂર્વ કાર્યકર સંજય ભાટિયાને પણ મહામંત્રી બનાવાયા છે.
2027 થી 2029 સુધીની મોટી અગ્નિપરીક્ષા
ભાજપે પોતાના આગામી મિશન માટે અત્યારથી જ નીતિન નવીનની આગેવાનીમાં ફોજ તૈયાર કરી દીધી છે. 7 મહિના પહેલા જ પાર્ટીની કમાન સંભાળનાર નીતિન નવીન સામે હવે મોટા પડકારો છે.તેમની સૌથી પહેલી અને મોટી અગ્નિપરીક્ષા વર્ષ 2027 માં થશે. વર્ષ 2027 માં ઉત્તર પ્રદેશ સહિત 7 રાજ્યોમાં વિધાનસભા ચૂંટણીઓ યોજાવાની છે. યુપીમાં જીતની હેટ્રિક લગાવવી એ પાર્ટી માટે સૌથી મોટો પડકાર રહેશે.
ત્યારબાદ વર્ષ 2028 માં મધ્યપ્રદેશ, રાજસ્થાન, કર્ણાટક અને તેલંગાણા સહિત કુલ 9 રાજ્યોમાં ચૂંટણીઓનો સંગ્રામ જામશે. આ તમામ રાજ્યોની ચૂંટણીઓ પાર કર્યા બાદ નીતિન નવીનની ટીમ સામે અંતિમ અને સૌથી મોટો પડકાર વર્ષ 2029 ની લોકસભા ચૂંટણીનો રહેશે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.