AAPમાં મોટો ભૂકંપ: રાઘવ ચઢ્ઢા સહિત 7 સાંસદો ભાજપમાં જોડાશે, અરવિંદ કેજરીવાલ માટે હવે કયો રસ્તો બાકી?

Raghav Chadha joins BJP: પંજાબ વિધાનસભાની ચૂંટણી પહેલા આમ આદમી પાર્ટી (AAP)માં જબરદસ્ત રાજકીય ભૂકંપ આવ્યો છે. પાર્ટીના બે-તૃતીયાંશ (2/3) રાજ્યસભા સાંસદોએ સાથ છોડીને ભારતીય જનતા પાર્ટી (BJP)માં જોડાવાનો નિર્ણય કર્યો છે. આ ઘટનાએ દિલ્હીથી લઈને પંજાબ સુધીના રાજકારણમાં ગરમાવો લાવી દીધો છે.

રાઘવ ચઢ્ઢા સહિત 7 સાંસદોનો મોટો નિર્ણય

શુક્રવારે દિલ્હીમાં એક પ્રેસ કોન્ફરન્સ દરમિયાન રાઘવ ચઢ્ઢા, સંદીપ પાઠક અને અશોક મિત્તલે AAP છોડીને ભાજપમાં ભળવાની જાહેરાત કરી હતી. રાઘવ ચઢ્ઢાએ જણાવ્યું હતું કે, "અમે રાજ્યસભામાં AAPના 2/3 સભ્યોએ બંધારણીય જોગવાઈઓનો ઉપયોગ કરીને ભાજપમાં વિલય કરવાનો નિર્ણય લીધો છે."

AAP Crisis

ચઢ્ઢાએ વધુમાં દાવો કર્યો હતો કે તેમની સાથે સ્વાતિ માલીવાલ, હરભજન સિંહ, રાજીન્દર ગુપ્તા અને વિક્રમજીત સિંહ સાહની પણ ભાજપમાં સામેલ થયા છે. આ 7 સાંસદોના ગયા પછી હવે રાજ્યસભામાં AAP પાસે માત્ર 3 સાંસદો જ બચ્યા છે, જેમાં સંજય સિંહ, એનડી ગુપ્તા અને બલબીર સિંહ સીચેવાલનો સમાવેશ થાય છે.

ભ્રષ્ટાચારના આરોપ લગાવી પક્ષ છોડ્યો

રાઘવ ચઢ્ઢાએ પોતાની જૂની પાર્ટી પર પ્રહાર કરતા કહ્યું કે, જે પાર્ટી ભ્રષ્ટાચાર સામે લડવાના વાયદા સાથે સત્તામાં આવી હતી, તે હવે પોતાની નૈતિકતા ગુમાવી ચૂકી છે. તેમણે કહ્યું કે, "મેં 15 વર્ષ સુધી જે પાર્ટીને લોહી-પરસેવો પાડીને સીંચી હતી, તે હવે દેશહિતને બદલે પોતાના અંગત ફાયદા માટે કામ કરી રહી છે. હું AAPથી દૂર જઈ રહ્યો છું અને જનતાની પાસે આવી રહ્યો છું."

હવે કેજરીવાલ પાસે કયા વિકલ્પો?

આ આખી ઘટના બાદ આમ આદમી પાર્ટીમાં કાયદાકીય ખેંચતાણ શરૂ થઈ શકે છે. કાયદાના નિષ્ણાતોના મતે, પક્ષપલટા વિરોધી કાયદા (Anti-Defection Law)થી બચવા માટે કોઈપણ જૂથ પાસે 2/3 બહુમતી હોવી જરૂરી છે. AAPના કુલ 10 રાજ્યસભા સાંસદોમાંથી 7 સાંસદો અલગ થયા હોવાથી, તેઓ આ કાયદાકીય કાર્યવાહીથી બચી શકે છે અને પોતાની સદસ્યતા જાળવી રાખી શકે છે.

શું આ મામલો ચૂંટણી પંચમાં જશે?

જો અલગ થયેલું આ જૂથ પોતાને ‘અસલી AAP' તરીકે ઓળખાવે, તો મામલો ચૂંટણી પંચ (EC) સુધી પહોંચી શકે છે. આવી સ્થિતિમાં માત્ર સાંસદોની સંખ્યા જ નહીં, પણ પાર્ટીનું સંગઠન, રાષ્ટ્રીય પરિષદ અને પદાધિકારીઓ કોની સાથે છે તે પણ જોવામાં આવશે.

શું પક્ષપલટા વિરોધી કાયદો (Anti-Defection Law) નડશે?

ના, આ સાંસદોને આ કાયદો નડવાની શક્યતા નહિવત્ છે. ભારતીય બંધારણની 10મી અનુસૂચિ (10th Schedule) મુજબ, જો કોઈ પક્ષના 2/3 (બે-તૃતીયાંશ) કે તેથી વધુ ચૂંટાયેલા સભ્યો અન્ય પક્ષમાં ભળી જાય (Merger), તો તેમના પર પક્ષપલટા વિરોધી કાયદો લાગુ પડતો નથી અને તેમને ગેરલાયક ઠેરવી શકાતા નથી. રાજ્યસભામાં AAPના કુલ 10 સાંસદો છે, જેમાંથી 7 સાંસદો (એટલે કે 70%) ભાજપમાં જોડાયા હોવાનો દાવો કરવામાં આવ્યો છે. આ આંકડો 2/3 બહુમતીને પાર કરી જતો હોવાથી, કાયદાકીય રીતે તેઓ સુરક્ષિત છે.

લોકસભાના સાંસદો બનશે ‘કિંગમેકર’?

હાલમાં AAP પાસે લોકસભામાં 3 સાંસદો છે. જો આ 3 માંથી 2 સાંસદો (એટલે કે 2/3 બહુમતી) પણ અલગ જૂથ સાથે જાય, તો સંસદમાં તેમની સ્થિતિ વધુ મજબૂત બનશે અને તેમને અયોગ્ય જાહેર કરવા મુશ્કેલ બનશે. ચૂંટણી પંચના નિર્ણયમાં આ આંકડાઓ ખૂબ જ મહત્વના સાબિત થશે.

કેજરીવાલ માટે પડકાર

પંજાબ વિધાનસભા ચૂંટણીઓ નજીક છે ત્યારે પાર્ટીના કોર રણનીતિકારો (જેમ કે સંદીપ પાઠક કે જેમણે પંજાબ અને ગુજરાતમાં સંગઠન બનાવ્યું હતું) અને રાઘવ ચઢ્ઢાનું જવું એ માત્ર આંકડાકીય નુકસાન નથી, પરંતુ મનોવૈજ્ઞાનિક રીતે પણ પાર્ટીના કાર્યકરોનું મનોબળ તોડનારું છે.

આ પણ વાંચો - શેરબજારમાં ભૂકંપ: સેન્સેક્સ 999 પોઈન્ટ તૂટ્યો, નિફ્ટી 23,900ની નીચે સરક્યો; જાણો રોકાણકારોના પૈસા ડૂબવા પાછળના 5 મોટા કારણો