વોટર આઈડી બનાવનારાઓ માટે મોટા સમાચાર: ચૂંટણી પંચે અડધી રાતે ફોર્મ 6 માંથી SIR ઘોષણા પત્ર હટાવ્યું, જાણો શું થશે ફાયદો

Voter ID online apply: નવું વોટર આઈડી બનાવવા માંગતા નાગરિકો માટે એક મોટા અને રાહતના સમાચાર છે. ચૂંટણી પંચે અડધી રાત્રે એક મહત્વનો નિર્ણય લેતા ઓનલાઈન ECINET પોર્ટલ પરથી ફોર્મ 6 માં આવતું વધારાનું 'SIR ઘોષણા પત્ર' હટાવી દીધું છે.

આ નવો ફેરફાર એવા રાજ્યોમાં તાત્કાલિક અસરથી લાગુ પડશે જ્યાં SIRની પ્રક્રિયા સંપૂર્ણપણે પૂરી થઈ ગઈ છે. ચૂંટણી પંચના આ પગલાથી હવે વોટર લિસ્ટમાં નવું નામ ઉમેરવું કે નવું ચૂંટણી કાર્ડ બનાવવું લોકો માટે એકદમ સરળ અને ઝડપી બની ગયું છે.

ફોર્મ 6 અને SIR વચ્ચે શું કનેક્શન હતું?

જ્યારે પણ કોઈ યુવાન પહેલીવાર મતદાતા બને છે, ત્યારે તેનું નામ વોટર લિસ્ટમાં નોંધાવવા માટે ફોર્મ 6 ભરવું પડે છે. તાજેતરમાં, પંચ દ્વારા ECINET પોર્ટલ પર આ ફોર્મ સાથે એક વધારાનું SIR ઘોષણા પત્ર જોડવામાં આવ્યું હતું. આ પત્રમાં નવા અરજદારે પોતાના પરિવારની જેમ કે માતા-પિતા કે દાદા-દાદી જૂના વોટર રેકોર્ડની માહિતી આપવી પડતી હતી. એટલે કે, તેમનું નામ અગાઉની કોઈ વોટર લિસ્ટમાં હતું કે નહીં તે જણાવવું પડતું હતું.

26 સપ્ટેમ્બરના રોજ કરાયેલી આ નવી જોગવાઈનો ભારે વિરોધ થયો હતો. આ વિવાદ પાછળ મુખ્યત્વે બે કારણો જવાબદાર હતા:

કાનૂની મર્યાદા: ચૂંટણી પંચના આ પગલા સામે ખુદ બે ચૂંટણી આયુક્તોએ વાંધો ઉઠાવ્યો હતો. તેમનું સ્પષ્ટ માનવું હતું કે ફોર્મ 6 એ એક કાનૂની અને વૈધાનિક ફોર્મ છે. તેમાં કોઈપણ ફેરફાર કરવા માટે નિયમોમાં સુધારો કરવો પડે. માત્ર પંચના એક આદેશથી આ રીતે ફોર્મમાં કોઈ નવો બદલાવ કરી શકાય નહીં.

ટેકનિકલ ખામી: ઓનલાઇન પોર્ટલ પર આ વધારાની માહિતી આપવી 'નોન-મેન્ડેટરી' (Non-mandatory - મરજિયાત) છે એવું દર્શાવવામાં આવ્યું હતું. પરંતુ, વાસ્તવમાં અરજદારો આ માહિતી ભર્યા વગર ફોર્મ આગળ સબમિટ જ નહોતા કરી શકતા. આ ટેકનિકલ ખામીના કારણે સામાન્ય લોકોને ભારે હાલાકી ભોગવવી પડી રહી હતી.

લોકોની મુશ્કેલીઓ અને આંતરિક વિરોધને ધ્યાનમાં રાખીને, 26 સપ્ટેમ્બરની જાહેરાતના માત્ર 4 દિવસ બાદ જ ચૂંટણી પંચે આ વિવાદિત ઘોષણા પત્ર હટાવવાનો નિર્ણય લીધો છે. હવે જે રાજ્યોમાં SIR પ્રક્રિયા પૂર્ણ થઈ ગઈ છે, ત્યાં 'નિર્વાચક રજીસ્ટ્રીકરણ નિયમ, 1960' મુજબના જૂના અને સામાન્ય ફોર્મ 6 નો જ ઉપયોગ થશે, જેથી નાગરિકો વિના કોઈ અડચણે પોતાનું વોટર આઈડી કઢાવી શકશે.

આ પણ વાંચો- સુરતથી ઉદયપુર માટે નવી વંદે ભારત ટ્રેનની ભેટ: માત્ર 7.30 કલાકમાં પહોંચાડશે રાજસ્થાન, જાણો રૂટ અને ટાઈમટેબલ