ભારતીય રાજકારણના એક યુગનો અંત: પૂર્વ ગૃહમંત્રી અને 7 વખત સાંસદ રહેલા શિવરાજ પાટિલનું 90 વર્ષની વયે નિધન

Shivraj Patil Died: ભારતીય રાજકારણના એક અનુભવી અને શાંત સ્વભાવના નેતા, પૂર્વ કેન્દ્રીય ગૃહમંત્રી અને લોકસભાના ભૂતપૂર્વ અધ્યક્ષ શિવરાજ પાટિલનું શુક્રવારે લાતૂરમાં અવસાન થયું છે. 90 વર્ષની વયે તેમણે તેમના નિવાસસ્થાને સવારે લગભગ 6:30 વાગ્યે અંતિમ શ્વાસ લીધા. તેઓ લાંબા સમયથી બીમારીનો સામનો કરી રહ્યા હતા અને તેમની સારવાર ઘરે જ ચાલી રહી હતી. તેમના નિધન સાથે જ કોંગ્રેસ પાર્ટી અને ભારતીય રાજકારણમાં એક મોટી ખોટ પડી છે, અને સમગ્ર રાજકીય વર્તુળમાં શોકનો માહોલ છે.

શિવરાજ પાટિલની રાજકીય કારકિર્દી

શિવરાજ પાટિલની રાજકીય કારકિર્દી અત્યંત પ્રભાવશાળી અને લાંબી રહી હતી. તેમનો જન્મ 12 ઓક્ટોબર 1935ના રોજ મહારાષ્ટ્રના લાતૂર જિલ્લાના ચાકુર ગામમાં થયો હતો. કાયદામાં સ્નાતકની ડિગ્રી મેળવ્યા બાદ તેમણે રાજકારણમાં ઝંપલાવ્યું હતું. તેમની રાજકીય સફરની શરૂઆત 1967માં લાતૂર નગરપાલિકાથી થઈ હતી, જ્યાંથી તેમણે લોકોની સેવા કરવાનો પ્રારંભ કર્યો.

પાટિલની રાષ્ટ્રીય રાજકારણમાં પ્રવેશ 1980માં થયો, જ્યારે તેઓ પહેલીવાર લાતૂર લોકસભા બેઠક પરથી સાંસદ તરીકે ચૂંટાયા. આ પછી તેમણે પાછું વળીને જોયું નહીં અને સતત 7 વખત આ બેઠક પરથી જીત મેળવીને સંસદમાં પહોંચ્યા. તેમની આ સિદ્ધિએ તેમને મહારાષ્ટ્રના સૌથી કદાવર નેતાઓમાંના એક બનાવ્યા. ઈન્દિરા ગાંધી અને રાજીવ ગાંધીની સરકારોમાં તેમણે સંરક્ષણ, વાણિજ્ય, વિજ્ઞાન અને ટેકનોલોજી, પરમાણુ ઊર્જા અને અવકાશ જેવા અત્યંત મહત્ત્વપૂર્ણ વિભાગોમાં રાજ્યમંત્રી તરીકેની જવાબદારી નિભાવી હતી.

લોકસભાના સ્પીકર

તેમની કારકિર્દીનો સૌથી ઉચ્ચતમ પડાવ 1991માં આવ્યો, જ્યારે તેમને લોકસભાના સ્પીકર તરીકે પસંદ કરવામાં આવ્યા. આ પદ પર તેઓ 1996 સુધી રહ્યા અને પોતાની શાંત અને સંયમિત કાર્યશૈલીથી સૌના દિલ જીત્યા. 2004ની લોકસભા ચૂંટણીમાં હારનો સામનો કરવા છતાં, કોંગ્રેસની આગેવાની હેઠળની યુપીએ સરકારે તેમની પ્રતિભા અને અનુભવને માન આપીને તેમને રાજ્યસભાના સભ્ય બનાવ્યા અને દેશના ગૃહમંત્રી જેવી મહત્ત્વપૂર્ણ જવાબદારી સોંપી.

જોકે, 2008માં મુંબઈમાં થયેલા આતંકવાદી હુમલા બાદ તેમણે નૈતિક જવાબદારી સ્વીકારીને પોતાના પદ પરથી રાજીનામું આપી દીધું હતું, જે તેમની રાજકીય પ્રામાણિકતા દર્શાવે છે. ત્યારપછી, 2010 થી 2015 સુધી તેમણે પંજાબના રાજ્યપાલ અને ચંદીગઢના વહીવટકર્તા તરીકે પણ સેવા આપી હતી. શિવરાજ પાટિલને હંમેશા એક મહેનતુ, સંયમિત અને બૌદ્ધિક નેતા તરીકે યાદ કરવામાં આવશે, જેમનું યોગદાન ભારતીય રાજકારણમાં અમૂલ્ય છે.