અમેરિકામાં પણ મફતની રેવડી કલ્ચર: ચૂંટણી જીતશે તો ડોનાલ્ડ ટ્રમ્પ દરેક નાગરિકને આપશે 4.2 લાખ રૂપિયા! જાણો ક્રૂડ ઓઇલ વિશે શું કહી મોટી વાત

US Elections, Freebies in US politics: અમેરિકાના રાજકારણમાં અત્યારે ભારે ગરમાવો જોવા મળી રહ્યો છે. ભારતમાં ચૂંટણી સમયે જે રીતે 'મફતની રેવડી' કલ્ચર જોવા મળે છે, કંઈક એવો જ માહોલ હવે અમેરિકામાં પણ બની રહ્યો છે. અમેરિકન પ્રમુખ ડોનાલ્ડ ટ્રમ્પે બે એવા મોટા નિવેદનો આપ્યા છે, જેનાથી રાજકીય અને આર્થિક જગતમાં ભારે ચર્ચા શરૂ થઈ ગઈ છે. એક તરફ તેમણે નાગરિકોને સીધી રોકડ રકમ આપવાનું વચન આપ્યું છે, તો બીજી તરફ ઈરાન સાથેના યુદ્ધ અને ક્રૂડ ઓઇલના ભાવ પર મહત્વની વાત કહી છે. આ બંને મુદ્દાઓ સીધા અમેરિકાની અર્થવ્યવસ્થા સાથે જોડાયેલા છે.

દરેક નાગરિકને મળશે $5000

ટ્રમ્પે એક મોટી જાહેરાત કરતા કહ્યું છે કે જો રિપબ્લિકન પાર્ટી 'હાઉસ ઑફ રિપ્રેઝન્ટેટિવ્સ' અને 'સેનેટ' બંનેની ચૂંટણી જીતી જશે, તો અમેરિકાના દરેક પુખ્ત નાગરિકને $5000 (આશરે 4.2 લાખ રૂપિયા) નું ડિવિડન્ડ આપવામાં આવશે. તેમણે આ યોજનાની સરખામણી એક સફળ કંપની સાથે કરી હતી. જેમ કોઈ કંપની નફો કરે ત્યારે તેના શેરધારકોને કેશ ડિસ્ટ્રિબ્યુશન આપે છે, તેવી જ રીતે અમેરિકાની આર્થિક સફળતાનો સીધો લાભ તેના નાગરિકોને મળવો જોઈએ.

સૈનિકોને આપ્યા હતા $1776

આ નવી જાહેરાત વખતે ટ્રમ્પે ગત વર્ષનો એક કિસ્સો પણ યાદ કર્યો. તેમણે જણાવ્યું કે અગાઉ સૈન્ય જવાનોને $1775 આપવામાં આવ્યા હતા. પરંતુ અમેરિકાની આઝાદીનું વર્ષ 1776 છે, તેથી આ રકમને આઝાદીના વર્ષ સાથે જોડવા માટે ટ્રમ્પે પોતાની તરફથી $1 ઉમેરીને સૈનિકોને કુલ $1776ની રકમ ચૂકવી હતી.

ઈરાન યુદ્ધ અને ક્રૂડ ઓઇલના ભાવમાં ભડકો

પોતાના બીજા નિવેદનમાં ટ્રમ્પે અમેરિકા અને ઈરાન વચ્ચે ચાલી રહેલા યુદ્ધ વિશે વાત કરી હતી. આ બંને દેશો વચ્ચેના તીવ્ર હુમલાઓને કારણે આંતરરાષ્ટ્રીય બજારમાં બ્રેન્ટ ક્રૂડ ઓઇલના ભાવમાં 3 ટકાથી વધુનો ઉછાળો જોવા મળ્યો છે. આ સ્થિતિના કારણે જુલાઈ મહિના પછી પહેલીવાર ક્રૂડના ભાવ $100 ને પાર કરી ગયા છે.