Gujarat Local Body Election 2026: ગુજરાતમાં સ્થાનિક સ્વરાજની ચૂંટણીના પરિણામો 28 એપ્રિલે જાહેર થઈ ગયા છે. આ વખતે પણ રાજ્ય કેસરિયા રંગમાં રંગાઈ ગયું છે. ભાજપે એકવાર ફરી ઈતિહાસ રચ્યો છે. આ વખતે 15 મનપા, 84 નગરપાલિકા, 34 જિલ્લા પંચાયત અને 260 તાલુકા પંચાયત માટે ચૂંટણી યોજાઈ હતી. કુલ 10,005 સીટમાંથી 732 સીટ બિનહરીફ થઈ હતી. મતગણતરી બાદ જે પરિણામો સામે આવ્યા તે ભાજપના પક્ષમાં રહ્યા છે.
Gujarat Local Body Election 2026: 10 હજાર સીટના પરિણામમાં ભાજપની ભવ્ય જીત, 15 મનપા સહિત 90 ટકાથી વધુ સીટ કબજે
Gujarat local body election results 2026: ભાજપે 15 મનપા, 84 નગરપાલિકામાં 78, 34 જિલ્લા પંચાયતમાં 33 અને 260 તાલુકા પંચાયતમાં 253 સીટ જીતી. PM મોદીએ આભાર માન્યો.
MoneyControl Newsઅપડેટેડ Apr 28, 2026 પર 10:47 PM
મનપામાં સફાયો
ભાજપે તમામ 15 મનપા પર જીત મેળવી છે. આ ઉપરાંત 84 નગરપાલિકામાંથી 78 પર કબ્જો કર્યો છે. કોંગ્રેસને માત્ર 6 નગરપાલિકામાં જ સીમિત સફળતા મળી છે.
જિલ્લા અને તાલુકા પંચાયતમાં પણ દબદબો
જિલ્લા પંચાયતની 34 સીટમાંથી ભાજપે 33 પર જીત મેળવી છે. તાલુકા પંચાયતની 260 સીટમાંથી ભાજપને 253 મળી છે. કોંગ્રેસ અને આપને માત્ર 7 સીટ મળી છે.
આપને મોટો ફટકો
સુરત મનપામાં 2021માં 27 સીટ જીતનારી આમ આદમી પાર્ટી આ વખતે માત્ર 4 સીટ પર સીમિત રહી ગઈ છે. સુરતમાં ભાજપે 115 સીટ જીતીને સત્તા ફરી કબ્જે કરી છે.
અમરેલીમાં ઈતિહાસ રચ્યો
અમરેલી જિલ્લાની બગસરા તાલુકા પંચાયત કબ્જે કરી આપે ઈતિહાસમાં પહેલીવાર પંચાયત સ્તરે સત્તા મેળવી છે. આ ભાજપની એકમાત્ર હાર જેવું ગણાઈ શકે છે.
PM મોદીએ માન્યો આભાર
પ્રધાનમંત્રી નરેન્દ્ર મોદીએ ગુજરાતની જનતાનો આભાર માન્યો છે. તેમણે કહ્યું કે લોકોએ સુશાસન અને શ્રેષ્ઠ કામગીરીને આશીર્વાદ આપ્યા છે. આવનારા સમયમાં ગુજરાતને નવી ઊંચાઈએ લઈ જઈશું.
પંચાલે પાટીલનો રેકોર્ડ તોડ્યો
ભાજપ પ્રદેશ અધ્યક્ષ જગદીશ પંચાલ માટે આ પહેલી ચૂંટણી હતી. 2021માં સી આર પાટીલના નેતૃત્વમાં 90 ટકા સીટ જીતવાનો રેકોર્ડ હતો. પંચાલે આ પરીક્ષામાં પાસ થઈને 90 ટકાથી વધુ સીટ જીતીને વધુ સારું પ્રદર્શન કર્યું છે.
ચૂંટણી રણનીતિ
ભાજપે આ ચૂંટણી માટે બૂથ લેવલથી વોટ બેન્ક સુધી પહોંચવા સંપૂર્ણ પ્લાનિંગ કર્યું હતું. ડોર ટૂ ડોર પ્રચાર સાથે ગ્રૂપ મીટિંગ પર ભાર મૂકવામાં આવ્યો હતો. જગદીશ પંચાલે જાતે માઈક્રો મેનેજમેન્ટ કર્યું હતું.
ઈતિહાસ અને વર્તમાન
2021ની સ્થાનિક સ્વરાજની ચૂંટણીમાં મળેલી જીતના આધારે ભાજપે 2022ની વિધાનસભા ચૂંટણીમાં 156 સીટ જીતી હતી. ત્યાર બાદ કોંગ્રેસના 4 અને એક અપક્ષ ધારાસભ્યને ભેળવી લેતા હાલ ભાજપ પાસે 161 ધારાસભ્યો છે. હવે ફરી 90 ટકાથી વધુ જીત મળતા 2027ની ચૂંટણી માટે ભાજપ મજબૂત સ્થિતિમાં છે.
આમ, ગુજરાતમાં સ્થાનિક સ્વરાજની ચૂંટણીના પરિણામોએ ભાજપના કાર્યકરોમાં ઉત્સાહ ભર્યો છે. પક્ષે એકવાર ફરી સાબિત કર્યું કે ગુજરાતમાં તેની સ્થિતિ મજબૂત છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.