ગુજરાતમાં 68 લાખ મતદારોના નામ ગાયબ! વિવાદ વધતાં ચૂંટણી પંચે શરૂ કર્યું ડેમેજ કંટ્રોલ, જાણો ક્યારે યોજાશે ખાસ કેમ્પ

Election Commission damage control: ગુજરાતમાં તાજેતરમાં મતદાર યાદીને લઈને એક મોટો રાજકીય અને સામાજિક વિવાદ ઊભો થયો છે. ડિસેમ્બર 2025 માં સ્પેશ્યલ ઈન્ટેન્સિવ રિવિઝન (SIR) પ્રક્રિયા દરમિયાન રાજ્યના 68 લાખથી વધુ મતદારોના નામ યાદીમાંથી અચાનક ગાયબ થઈ ગયા છે. અનેક કિસ્સાઓમાં મતદારોની જાણ બહાર જ બારોબાર ફોર્મ-7 ભરીને તેમના નામ રદ કરી દેવામાં આવ્યા છે, જેના કારણે લોકોમાં ભારે રોષ જોવા મળી રહ્યો છે.

ચૂંટણી પંચનું ડેમેજ કંટ્રોલ શરૂ

બેવડાં, ગેરહાજર, સ્થળાંતરિત અને મૃત્યુ પામેલા લોકોના નામ હટાવવાના નામે જે રીતે આડેધડ કાતર ફરી છે, તેનો દેશભરમાં વિરોધ થઈ રહ્યો છે. અન્ય રાજ્યોમાં પણ આ મુદ્દે મુખ્ય ચૂંટણી કમિશનર જ્ઞાનેશકુમારના રાજીનામાની માંગ સાથે આંદોલનો શરૂ થયા છે. આ વધતા જતા વિરોધવંટોળ અને ત્રણ ચૂંટણી કમિશનરો વચ્ચેના કથિત મતભેદ બાદ, આખરે સરકાર અને ચૂંટણી પંચ સફાળા જાગ્યા છે. વિવાદને ઠંડો પાડવા માટે પંચે 'મતદાર યાદી સંક્ષિપ્ત સુધારણા કાર્યક્રમ' નામે ડેમેજ કંટ્રોલની કવાયત શરૂ કરી છે.

રદ થયેલા નામો ફરી ઉમેરવા માટે ખાસ કેમ્પનું આયોજન

આ કેમ્પની મહત્વની વિગતો નીચે મુજબ છે:

કઈ તારીખોએ યોજાશે કેમ્પ? 11 ઓક્ટોબર, 18 ઓક્ટોબર, 25 ઓક્ટોબર અને 1 નવેમ્બર (આ ચાર રવિવારે).

સમય: સવારે 10 વાગ્યાથી સાંજે 5 વાગ્યા સુધી.

સ્થળ: રાજ્યના તમામ મતદાન મથકો (બૂથ) પર.

કોણ હાજર રહેશે? બૂથ લેવલ ઓફિસર (BLO) અને અન્ય નિયુક્ત અધિકારીઓ ત્યાં હાજર રહીને દાવા-વાંધાની અરજીઓ સ્વીકારશે.

ગુજરાતમાં SIRનું આંકડાકીય ગણિત

ચૂંટણી પંચના સત્તાવાર આંકડાઓ અને ડેટા પર નજર કરીએ તો મતદારોના ઘટાડાનું ચિત્ર એકદમ સ્પષ્ટ થાય છે:

* SIR પહેલાં ગુજરાતમાં કુલ મતદારો: 5,08,43,436

* ડ્રાફ્ટ તબક્કે થયેલો ઘટાડો: 73,73,327

* ડ્રાફ્ટ બાદ નવા ઉમેરાયેલા નામ: 9,56,121

* ડ્રાફ્ટ બાદ ફરીથી રદ થયેલા નામ: 3,95,555

* અંતિમ ફાઇનલ મતદાર યાદી: 4,40,30,725

* પહેલાં કરતા થયેલો કુલ ઘટાડો: 68,12,711

આ ઉપરાંત અમદાવાદ, સુરત, વડોદરા અને રાજકોટ જેવા મોટા મહાનગરો અને જિલ્લાઓમાં પણ જૂના મતદારોની સંખ્યામાં મોટો ફેરફાર નોંધાયો છે, જેનાથી સમગ્ર ચૂંટણી તંત્રની કામગીરી સામે સવાલો ઉભા થયા છે.

આ પણ વાંચો - CEC જ્ઞાનેશ કુમારની મુશ્કેલી વધી: 20 વર્ષ જૂના ભ્રષ્ટાચાર અને એન્જિનિયરની આત્મહત્યા કેસમાં કેરળ સરકાર કરશે વિજિલન્સ તપાસ, દેશભરમાં રાજીનામાની માંગ

જો તમે ગુજરાતના જાગૃત નાગરિક અને મતદાર છો, તો આ વિશેષ ઝુંબેશનો લાભ લેવો અત્યંત જરૂરી છે. ચૂંટણી પંચ દ્વારા જાહેર કરવામાં આવેલી તારીખો પર તમારા નજીકના મતદાન મથકે જઈને તમારું અને તમારા પરિવારનું નામ મતદાર યાદીમાં છે કે નહીં તેની ખાતરી ચોક્કસ કરી લેવી જોઈએ, જેથી મતદાનના દિવસે કોઈ મુશ્કેલીનો સામનો ન કરવો પડે.

આ પણ વાંચો- IPO માર્કેટમાં ડબ્બા ટ્રેડિંગ જેવું નવું કૌભાંડ: ફેક ગ્રે માર્કેટ પ્રીમિયમની લાલચમાં રોકાણકારો બરબાદ!