‘પાકિસ્તાનના ગોળીબારથી પ્રભાવિત પૂંછ અને અન્ય વિસ્તારો માટે રાહત પેકેજ...', રાહુલ ગાંધીએ PM મોદીને લખ્યો પત્ર

કોંગ્રેસના સાંસદ અને લોકસભામાં વિપક્ષના નેતા રાહુલ ગાંધીએ વડાપ્રધાન નરેન્દ્ર મોદીને એક પત્ર લખીને જમ્મુ-કાશ્મીરના પુંછ અને અન્ય સરહદી વિસ્તારોમાં પાકિસ્તાનની ગોળીબારીથી પ્રભાવિત લોકો માટે વ્યાપક રાહત અને પુનર્વસન પેકેજની માંગ કરી છે. આ પત્રમાં રાહુલ ગાંધીએ પીડિતોના દુઃખ અને તેમના જીવનને ફરીથી બેઠું કરવા માટે સરકારી સહાયની જરૂરિયાત પર ભાર મૂક્યો છે.

પુંછની તાજેતરની મુલાકાત અને પીડિતો સાથે સંવાદ

રાહુલ ગાંધીએ તાજેતરમાં પુંછનો પ્રવાસ કર્યો હતો, જ્યાં પાકિસ્તાનની ગોળીબારીમાં 4 બાળકો સહિત 14 લોકોનાં મોત થયાં હતાં અને ડઝનબંધ લોકો ઘાયલ થયા હતા. આ હુમલાએ સ્થાનિક વિસ્તારોમાં વ્યાપક નુકસાન પહોંચાડ્યું છે. સેંકડો ઘરો, દુકાનો, શાળાઓ અને ધાર્મિક સ્થળો ધ્વસ્ત થયાં છે. રાહુલ ગાંધીએ પોતાના પત્રમાં લખ્યું કે, "આ અચાનક અને આંધળો હુમલો એક મોટી ત્રાસદી છે. પીડિતોએ મને જણાવ્યું કે તેમની વર્ષોની મહેનત એક જ પળમાં બર્બાદ થઈ ગઈ."

‘શાંતિ અને ભાઈચારાને સમર્થન આપનારા લોકોની સહાય જરૂરી’

રાહુલ ગાંધીએ પોતાના પત્રમાં ઉલ્લેખ કર્યો કે પુંછ અને સરહદી વિસ્તારોના લોકો દાયકાઓથી શાંતિ અને ભાઈચારાને પ્રોત્સાહન આપતા આવ્યા છે. આવા કપરા સમયમાં તેમના દુઃખને સમજવું અને તેમના જીવનને ફરીથી બેઠું કરવા માટે સરકારે તાત્કાલિક પગલાં લેવા જોઈએ. તેમણે ભારપૂર્વક જણાવ્યું કે, "આપણું કર્તવ્ય છે કે આ લોકોને દરેક સંભવ સહાય પૂરી પાડવામાં આવે.’

સરકાર પાસે ઉદાર રાહત પેકેજની માંગ

રાહુલ ગાંધીએ ભારત સરકારને આગ્રહ કર્યો છે કે પુંછ અને અન્ય પ્રભાવિત વિસ્તારો માટે એક મજબૂત અને ઉદાર રાહત તેમજ પુનર્વસન પેકેજ તૈયાર કરવામાં આવે. તેમણે આ પેકેજ દ્વારા પીડિતોના ઘરો, આજીવિકા અને ઈન્ફ્રાસ્ટ્રક્ચરની પુનઃસ્થાપના માટે ઝડપી પગલાં લેવાની જરૂર પર ભાર મૂક્યો છે.