Elon Muskને ઝટકો! ભારત સરકારે Starlinkની આ ખાસ એપ્લિકેશન કરી રદ, જાણો શું છે Gen 2 જેનાથી સીધા ફોનમાં આવતા સિગ્નલ?

Elon Musk Starlink India: ભારતમાં ઈન્ટરનેટની દુનિયામાં ક્રાંતિ લાવવા માટે તૈયાર એલોન મસ્કની કંપની 'સ્ટારલિંક'ને એક મોટો ઝટકો લાગ્યો છે. ભારત સરકારે સ્ટારલિંકની ડાયરેક્ટ-ટુ-ડિવાઇસ (Direct-to-Device) કનેક્ટિવિટી માટેની અરજીને મંજૂરી આપી નથી. ભારતીય અંતરિક્ષ નિયમનકાર IN-SPACe દ્વારા કંપનીની Gen 2 એપ્લિકેશનને ફગાવી દેવામાં આવી છે. જોકે, રાહતની વાત એ છે કે ટ્રેડિશનલ બ્રોડબેન્ડ સેવાઓ એટલે કે Gen 1 માટે મંજૂરી મળી ગઈ છે.

શું છે સમગ્ર મામલો?

સરકારી અધિકારીઓના જણાવ્યા મુજબ, સ્ટારલિંકે ભારતમાં પોતાની સેવાઓ શરૂ કરવા માટે Gen 1 અને Gen 2 એમ બંને પ્રકારની મંજૂરી માટે અરજી કરી હતી. IN-SPACe એ માત્ર Gen 1 ને લીલી ઝંડી આપી છે.

Gen 1: આ મંજૂરી હેઠળ કંપની તેના 4,408 લો અર્થ ઓર્બિટ (LEO) સેટેલાઇટ દ્વારા ભારતમાં સામાન્ય બ્રોડબેન્ડ સેવાઓ પૂરી પાડી શકશે.

કેમ રદ કરવામાં આવી Gen 2 ની અરજી?

આ અરજી રદ થવા પાછળ મુખ્યત્વે ટેકનિકલ અને નિયમનકારી કારણો જવાબદાર છે. ઈકોનોમિક ટાઈમ્સના રિપોર્ટ મુજબ, IN-SPACe ના ચેરમેન પવન કુમાર ગોયન્કાએ સ્પષ્ટ કર્યું છે કે Gen 2 માટે હાલ મંજૂરી અપાઈ નથી. એક અધિકારીએ જણાવ્યું કે, "જ્યારે સ્ટારલિંકે 3-4 વર્ષ પહેલા અરજી કરી હતી, ત્યારે D2D (ડાયરેક્ટ ટુ ડિવાઇસ) કનેક્ટિવિટી વિશે બહુ ઓછી જાણકારી હતી અને આ ટેકનોલોજી નવી હતી. Gen 2 માં એવા ઘણા ફીચર્સ અને ફ્રિકવન્સી બેન્ડ્સ છે, જેની ભારતમાં હજુ સુધી પરવાનગી નથી. આ કારણોસર જ આ એપ્લિકેશન રિજેક્ટ કરવામાં આવી છે." હવે જ્યારે કંપની આ માટે ફરીથી અરજી કરશે ત્યારે તેનું નવેસરથી મૂલ્યાંકન કરવામાં આવશે.

શું છે આ D2D કનેક્ટિવિટી?

સરળ ભાષામાં કહીએ તો, D2D કનેક્ટિવિટી એટલે અંતરિક્ષમાં રહેલા સેટેલાઇટમાંથી સીધા જ તમારા મોબાઈલ ફોનમાં સિગ્નલ આવવા. આ માટે કોઈ ટાવર કે રાઉટરની જરૂર પડતી નથી. ભારતમાં હાલ આ ટેકનોલોજી માટે કોઈ ચોક્કસ પોલિસી કે પ્લાનિંગ તૈયાર નથી. દૂરસંચાર વિભાગ અને સેક્ટર રેગ્યુલેટર હાલમાં આ સેવાઓ માટે કયા સ્પેક્ટ્રમ બેન્ડનો ઉપયોગ કરવો જોઈએ, તેના પર વિચારણા કરી રહ્યા છે. જ્યાં સુધી સરકારની રણનીતિ નક્કી ન થાય ત્યાં સુધી આ પ્રકારની સેવાઓને મંજૂરી મળવી મુશ્કેલ છે.

Gen 2 સેટેલાઇટ કેટલા પાવરફુલ છે?

તમને જણાવી દઈએ કે, એલોન મસ્કની કંપની સ્ટારલિંકને અમેરિકન રેગ્યુલેટર FCC પાસેથી 7,500 Gen 2 સેટેલાઇટ લોન્ચ કરવાની મંજૂરી મળી ચૂકી છે. આ સાથે જ દુનિયાભરમાં તેમના કુલ સેટેલાઇટની સંખ્યા 15,000 સુધી પહોંચી જશે. Gen 2 સેટેલાઇટ અત્યાધુનિક ટેકનોલોજીથી સજ્જ છે અને તે વધુ સારી સ્પીડ અને કનેક્ટિવિટી આપવા માટે સક્ષમ છે. હવે જોવાનું એ રહેશે કે સ્ટારલિંક ભારતમાં પોતાની આ એડવાન્સ સેવાઓ માટે ફરી ક્યારે અરજી કરે છે અને સરકાર તેના પર શું નિર્ણય લે છે.

આ પણ વાંચો-Budget 2026: સોનાની દાણચોરીમાં તગડો નફો! 1 કિલો પર 11.5 લાખની કમાણી, શું બજેટમાં થશે મોટો ફેરફાર?