ચીનમાં Appleનો ડંકો! ઘર આંગણે જ Xiaomi અને Huaweiને આપી પછડાટ, iPhone 17એ મચાવી ધૂમ

Apple China Sales: ચીન, જે દુનિયાનું સૌથી મોટું સ્માર્ટફોન માર્કેટ ગણાય છે, ત્યાં હવે અમેરિકન કંપની Apple એ પોતાનો દબદબો બનાવી લીધો છે. ચીની કંપનીઓને તેમના જ ઘરમાં પછડાટ આપીને Apple હવે ત્યાંનું ‘કિંગ’ બની ગયું છે. ડિસેમ્બર ક્વાર્ટરમાં Apple એ ચીનના સ્માર્ટફોન બજારમાં જબરદસ્ત પ્રદર્શન કર્યું છે, જેના કારણે Xiaomi અને Huawei જેવી સ્થાનિક કંપનીઓને મોટો ફટકો પડ્યો છે.

Appleનો જબરદસ્ત ગ્રોથ અને હરીફોને નુકસાન

છેલ્લા રિપોર્ટ મુજબ, પાછલા ક્વાર્ટરમાં Appleના વેચાણમાં સીધો 28%નો ઉછાળો જોવા મળ્યો છે. આ આંકડો એટલા માટે પણ ચોંકાવનારો છે કારણ કે આ સમયે ચીનનું ઓવરઓલ સ્માર્ટફોન માર્કેટ 1.6% જેટલું ઘટ્યું હતું. તેમ છતાં, Apple એ મુશ્કેલ સમયમાં પણ પોતાની પકડ મજબૂત રાખી છે.

આ સફળતા પાછળ સૌથી મોટો હાથ iPhone 17 સીરીઝનો છે. ડિસેમ્બર ક્વાર્ટરમાં ચીનમાં વેચાયેલા દર પાંચ સ્માર્ટફોનમાંથી એક iPhone હતો. બીજી તરફ, Xiaomi અને Huawei જેવી દિગ્ગજ કંપનીઓના વેચાણમાં બે આંકડામાં (double-digit) ઘટાડો નોંધાયો છે.

એક રિપોર્ટ અનુસાર, હાલમાં આખી દુનિયાની ટેક કંપનીઓ મેમરી સેમિકન્ડક્ટરની અછતનો સામનો કરી રહી છે. સ્માર્ટફોનમાં ડેટા સ્ટોર કરવા માટે આ ચિપ ખૂબ જ મહત્વની છે. આ અછતનું મુખ્ય કારણ Nvidiaના AI ચિપ્સ તરફનો ઝુકાવ છે. ચિપ બનાવતી કંપનીઓ અત્યારે પોતાની ક્ષમતાનો મોટો ભાગ AI માટેની હાઈ-એન્ડ મેમરી ચિપ બનાવવામાં લગાવી રહી છે. જેના કારણે સામાન્ય સ્માર્ટફોન માટે ચિપનો સપ્લાય ઓછો થઈ ગયો છે અને તેના ભાવ વધી ગયા છે.

કાઉન્ટરપોઈન્ટના એનાલિસ્ટ્સનું માનવું છે કે 2026ના પહેલા ક્વાર્ટર સુધીમાં મેમરી ચિપ્સના ભાવમાં 40-50% અને બીજા ક્વાર્ટરમાં 20% નો વધારો થઈ શકે છે. આ મોંઘવારીને કારણે કંપનીઓ સસ્તા ફોન બનાવવાનું ઓછું કરી શકે છે.

મોંઘા ફોન પર અસર ઓછી: Apple ને ફાયદો

TSMCના CEO સી.સી. વેઈના જણાવ્યા મુજબ, મેમરી ચિપની અછતની અસર દરેક ફોન પર સરખી નથી થતી. ખાસ કરીને મોંઘા અથવા પ્રીમિયમ સ્માર્ટફોન્સ પર તેની બહુ અસર પડી નથી. Apple ના ફોન પ્રીમિયમ કેટેગરીમાં આવે છે, તેથી કંપની આ સંકટનો સામનો વધુ સારી રીતે કરી શકી છે. જો આખા વર્ષની વાત કરીએ તો, Apple અને Huawei બંનેએ ચીનમાં લગભગ સમાન 17% માર્કેટ શેર મેળવ્યો હતો, પરંતુ Appleના વાર્ષિક વેચાણમાં 7.5%ની વૃદ્ધિ કંપનીની મજબૂતી દર્શાવે છે.

iPhone Airનું નબળું પ્રદર્શન

જોકે, Apple માટે બધું જ સારું નહોતું રહ્યું. રિપોર્ટ મુજબ, iPhone Air મોડલ ચીનમાં ખાસ કમાલ કરી શક્યું નથી. આ મોડલ મોડું લોન્ચ થયું હતું અને ફોનને પાતળો બનાવવાના ચક્કરમાં કંપનીએ તેના ફીચર્સમાં કાપ મૂક્યો હતો, જે ગ્રાહકોને પસંદ ન આવ્યો. જોકે, iPhone 17ના બાકીના મોડલ્સની સફળતાએ આ નુકસાનની ભરપાઈ કરી દીધી હતી.

આગળનો રસ્તો કોના માટે કઠિન?

ચીનના બજારમાં હવે ટ્રેન્ડ બદલાઈ રહ્યો છે. મેમરી ચિપની અછતની અસર આવનારા સમયમાં મિડ-રેન્જ (સસ્તા અને મધ્યમ કિંમતના) સ્માર્ટફોન પર વધારે જોવા મળશે. Apple જેવી કંપનીઓ, જેમના મોંઘા ફોન લોકપ્રિય છે, તેમને આનો ફાયદો મળતો રહેશે. નિષ્ણાતોનું માનવું છે કે Huawei અને Xiaomi જેવી કંપનીઓએ Appleની આક્રમક માર્કેટિંગ અને પ્રોડક્ટ સ્ટ્રેટેજી સામે ટકી રહેવા માટે પોતાની રણનીતિ જલ્દી બદલવી પડશે.

આ પણ વાંચો-Budget 2026: મિડલ ક્લાસને મળશે મોટી રાહત? સેવિંગ્સ અને FDના વ્યાજ પર ટેક્સમાં ફેરફારની પ્રબળ શક્યતા