ચીનની હવે ખેર નથી! બાંગ્લાદેશથી બંગાળની ખાડી સુધી ભારતની લોખંડી કિલ્લેબંધી, જળ-જમીન અને આકાશથી ઘેરાશે દુશ્મન

China vs India: ચીન હવે ભારત સામે આંખ ઉઠાવીને જોવાની પણ હિંમત નહીં કરે. પાડોશી દેશ બાંગ્લાદેશમાં બદલાયેલી રાજકીય સ્થિતિ અને ત્યાં ચીનની વધતી દખલગીરીને જોતા ભારતે હવે આરપારના મૂડમાં તૈયારીઓ શરૂ કરી દીધી છે. બંગાળની ખાડી હોય કે પછી જમીની સરહદ, ભારતીય સેનાએ જળ, જમીન અને આકાશ એમ ત્રણેય મોરચે દુશ્મનોને ઘેરવાનો પ્લાન બનાવી લીધો છે.

હલ્દીયામાં નેવીનો નવો બેઝ બની રહ્યો છે, તો આર્મી આસામ, બિહાર અને બંગાળમાં નવા કેમ્પ સ્થાપી રહી છે. શિલોંગમાં એરફોર્સ તો પહેલાથી જ તૈનાત છે. આવો જાણીએ ભારતની આ અભેદ કિલ્લેબંધી વિશે વિગતે.

બાંગ્લાદેશ અને ચીનની મેલી મુરાદ

બાંગ્લાદેશમાં 2024માં સત્તા પલટો થયો ત્યારથી ભારત વિરોધી ગતિવિધિઓ વધી છે. ત્યાંની નવી સરકાર પર કટ્ટરપંથીઓના દબાણના આરોપ છે. આ અસ્થિરતાનો લાભ ઉઠાવીને ચીન પોતાની ચાલ રમી રહ્યું છે. બાંગ્લાદેશની વર્તમાન સરકારે ચીનને જુના એરબેઝ જોવાના બહાને બોલાવીને ભારતને ડરાવવાનો પ્રયાસ કર્યો હતો. એટલું જ નહીં, સિલીગુડી કોરિડોર (ચિકન નેક)ને લઈને પણ ભારતને ધમકાવવાના પ્રયાસો થયા છે. ચીન ચોરીછૂપીથી બંગાળની ખાડીમાં પણ પગપેસારો કરવાની ફિરાકમાં છે. પરંતુ ભારતે હવે આ તમામ નાપાક ઈરાદાઓ પર પાણી ફેરવવાની તૈયારી કરી લીધી છે.

ભારતીય નેવીનું ઈસ્ટર્ન કમાન્ડનું હેડક્વાર્ટર વિશાખાપટ્ટનમમાં છે અને અંદમાન-નિકોબારમાં પણ નેવીનો બેઝ છે. પરંતુ હવે પશ્ચિમ બંગાળના હલ્દીયામાં નવો નેવલ બેઝ બનાવવાની તૈયારીઓ જોરશોરથી ચાલી રહી છે. હલ્દીયામાં કોસ્ટ ગાર્ડનું સ્ટેશન તો છે જ, પણ હવે અહીં નેવીના આવવાથી ભારતને મોટી વ્યૂહાત્મક તાકાત મળશે.

હલ્દીયા બાંગ્લાદેશ અને મ્યાનમારની નજીક હોવાથી, અહીં નેવલ બેઝ બનવાનો સીધો અર્થ એ છે કે ભારત બંગાળની ખાડીના ઉપરના ભાગમાં પોતાની પકડ મજબૂત કરશે. અહીં ભારતીય નેવીના આધુનિક યુદ્ધ જહાજો હંમેશા તૈયાર રહેશે, જેથી દુશ્મનની કોઈપણ હિલચાલ પર તુરંત જડબાતોડ જવાબ આપી શકાય.

આસામ, બંગાળ અને બિહારમાં આર્મીની નવી તૈયારી

બાંગ્લાદેશમાં ભારત વિરોધી માહોલ, ISI અને ચીનની વધતી જતી સક્રિયતાને જોતા ભારતીય આર્મીએ પણ પોતાની રણનીતિ બદલી છે. ભારતે પશ્ચિમ બંગાળ, બિહાર અને આસામ જેવા સરહદી રાજ્યોમાં નવા આર્મી કેમ્પ બનાવવાનું કામ શરૂ કરી દીધું છે.

આસામ: ધુબરી જિલ્લામાં 'લાચિત બોરફુકન મિલિટરી સ્ટેશન' બની રહ્યું છે.

બિહાર: કિશનગંજમાં નવો બેઝ તૈયાર થઈ રહ્યો છે.

પશ્ચિમ બંગાળ: ચોપરામાં નવો ફોરવર્ડ બેઝ બનાવવામાં આવી રહ્યો છે.

આ નવા કેમ્પોથી સેના સરહદ પર વધુ ઝડપથી અને સચોટ રીતે ઓપરેશન પાર પાડી શકશે.

રાફેલ અને બ્રહ્મોસ મિસાઈલ તૈનાત

સૈન્ય નિષ્ણાતોના મતે સિલીગુડી કોરિડોરની સુરક્ષા ભારત માટે સૌથી મહત્વની છે. સિક્કિમથી લઈને સિલીગુડી કોરિડોર સુધીની સુરક્ષાની જવાબદારી ભારતીય સેનાની 'ત્રિશક્તિ કોર' પાસે છે, જેણે પોતાની તૈનાતી વધુ કડક કરી દીધી છે. દુશ્મનોને ડરાવવા માટે નજીકના હાશીમારા એરબેઝ પર રાફેલ જેટ, બ્રહ્મોસ મિસાઈલ અને એડવાન્સ એર-ડિફેન્સ સિસ્ટમ પણ તૈનાત કરી દેવામાં આવી છે.

શિલોંગથી આકાશ પર 'બાજ નજર'

ભારતીય વાયુસેનાનું ઈસ્ટર્ન કમાન્ડ મેઘાલયના શિલોંગમાં આવેલું છે. આ કમાન્ડ ચીન સાથેની 6,300 કિલોમીટર લાંબી સરહદ (LAC) ની દેખરેખ રાખે છે. આ ઉપરાંત નેપાળ, ભુતાન, મ્યાનમાર અને બાંગ્લાદેશ સરહદ પર પણ તેની બાજ નજર છે. ઈસ્ટર્ન કમાન્ડના દાયરામાં પૂર્વોત્તરના સાત રાજ્યો સહિત 12 રાજ્યો આવે છે, જેથી આકાશ માર્ગે આવતા કોઈપણ ખતરાને પહોંચી વળવા એરફોર્સ હંમેશા સજ્જ રહે છે. આમ, ભારતે જમીન, પાણી અને આકાશ એમ ત્રણેય રીતે એવી જાળ બિછાવી છે કે હવે ચીન કે પાકિસ્તાન પ્રેરિત કોઈ પણ તાકાત ભારત સામે આંખ ઉઠાવતા પહેલા સો વાર વિચારશે.

આ પણ વાંચો-ભારતનો 'માસ્ટરસ્ટ્રોક': પાકિસ્તાનના શ્વાસ અધ્ધર! કાશ્મીરમાં 4 મોટા ડેમનું કામ ફૂલ સ્પીડમાં, જાણો શું છે પ્લાન?