બાબા વેંગાની ભવિષ્યવાણી સાચી પડી? સોના-ચાંદીના ભાવમાં ઉથલપાથલથી દુનિયાભરમાં આર્થિક સંકટનો ડર!

બલ્ગેરિયાના પ્રખ્યાત ભવિષ્યવેત્તા અને 'બાલ્કન નાસ્ત્રેદમસ' તરીકે જાણીતા બાબા વેંગા ફરી એકવાર ચર્ચામાં આવ્યા છે. દુનિયાના શક્તિશાળી દેશો અને મોટી ઘટનાઓ વિશે તેમની ઘણી ભવિષ્યવાણીઓ સાચી સાબિત થઈ ચૂકી છે. હાલમાં સોના અને ચાંદીના ભાવમાં જે ઉથલપાથલ જોવા મળી રહી છે, તેને લઈને બાબા વેંગાની એક ડરામણી ભવિષ્યવાણી ફરીથી લોકોનું ધ્યાન ખેંચી રહી છે. આ ભવિષ્યવાણી વૈશ્વિક આર્થિક સંકટ સાથે જોડાયેલી છે.

બાબા વેંગાએ પહેલા જ ચેતવણી આપી હતી કે દુનિયાને ભયંકર રોકડની અછતનો સામનો કરવો પડશે. તેમણે કહ્યું હતું કે સોનું, ચાંદી અને તાંબુ રોકાણ માટે સૌથી મહત્વના સાધનો બની જશે. હાલમાં માર્કેટમાં જે સ્થિતિ છે તે જોઈને લાગે છે કે તેમની આ વાત સાચી પડી રહી છે.

શું હતી બાબા વેંગાની ભવિષ્યવાણી?

બાબા વેંગાની ભવિષ્યવાણી મુજબ, વર્ષ 2026માં દુનિયા એક મોટા 'કેશ ક્રેશ' (Cash Crash) નો સામનો કરશે. એટલે કે, બેંકની કાગળની નોટોનું મૂલ્ય લગભગ ખતમ થઈ જશે અથવા સાવ ઓછું થઈ જશે. આવી મુશ્કેલ પરિસ્થિતિમાં માત્ર સોનું, ચાંદી અને તાંબુ જ લોકો માટે સુરક્ષિત આશરો બની રહેશે. લોકોનું ધ્યાન હવે કાગળના પૈસાને બદલે કિંમતી ધાતુઓ તરફ વળશે તેવી આગાહી તેમણે કરી હતી.

છેલ્લા કેટલાક મહિનાઓમાં સોના અને ચાંદીના ભાવમાં જબરદસ્ત તેજી જોવા મળી હતી. આંકડાઓ પર નજર કરીએ તો, MCX પર સોનાનો ભાવ 10 ગ્રામ દીઠ 1.80 લાખ રૂપિયા સુધી પહોંચી ગયો હતો. છેલ્લા એક વર્ષમાં સોનામાં લગભગ 70 ટકાનો વધારો નોંધાયો છે.

બીજી તરફ, ચાંદીએ તો તમામ રેકોર્ડ તોડી નાખ્યા હતા. ચાંદીનો ભાવ પ્રતિ કિલો 4 લાખ રૂપિયાને પાર કરી ગયો હતો. રોકાણકારોને ચાંદીએ છેલ્લા એક વર્ષમાં 160 ટકાથી વધુ રિટર્ન આપ્યું છે. બાબા વેંગાના કહેવા મુજબ, આ તેજીના કારણે જ આ ધાતુઓ રોકાણકારો માટે સૌથી સુરક્ષિત વિકલ્પ બની ગઈ છે.

30 જાન્યુઆરીએ બદલાયો આખો ખેલ

સોના-ચાંદીમાં આવેલી આ ભયંકર તેજી બાદ અચાનક 30 જાન્યુઆરીએ બજારની સ્થિતિ બદલાઈ ગઈ. માત્ર એક જ દિવસમાં બંને ધાતુઓના ભાવમાં મોટો ઘટાડો જોવા મળ્યો. આ ઘટાડાનો દોર સતત 3 દિવસ સુધી ચાલ્યો, જેમાં કિંમતો બેહતાશા ગગડી ગઈ હતી.

આ ઘટાડાને કારણે ઘણા લોકોએ ગભરાઈને તેમનું વર્ચ્યુઅલ સોનું અને ચાંદી વેચવાનું શરૂ કરી દીધું. જ્યારે બીજી તરફ, કેટલાક લોકો આ ઘટાડાને તક સમજીને ખરીદી પણ કરી રહ્યા હતા. બાબા વેંગાએ જે આર્થિક સંકટની વાત 2026 માટે કરી હતી, તેની ઝલક જાણે અત્યારથી જ દેખાવા લાગી છે. ડૉલરના ભાવમાં પણ ઘટાડો આવતા વૈશ્વિક સ્તરે આર્થિક કટોકટી જેવો માહોલ સર્જાયો હતો.

લોકોનો બેંકો પરથી ભરોસો ઉઠ્યો?

હવે ફરીથી સોના અને ચાંદીમાં તેજી આવવા લાગી છે. બુધવારે સાંજે એપ્રિલ ડિલિવરી વાળું સોનું 5 હજાર રૂપિયાના ઉછાળા સાથે 1.59 લાખ રૂપિયા પર ટ્રેડ થઈ રહ્યું હતું, જ્યારે માર્ચ ડિલિવરી વાળી ચાંદી 2.84 લાખ રૂપિયા પર હતી.

આ બધી ઘટનાઓ પરથી એક વાત સ્પષ્ટ થાય છે કે બાબા વેંગાની ભવિષ્યવાણી મુજબ, બજારમાં ભલે ચડાવ-ઉતાર આવે, પણ સોનું અને ચાંદી જ લોકો માટે સૌથી સુરક્ષિત રોકાણ બની ગયા છે. હવે લોકો બેંકોની FD કે અન્ય સ્કીમમાં પૈસા રોકવાને બદલે સોના-ચાંદીમાં રોકાણ કરવાનું વધારે પસંદ કરી રહ્યા છે.

આ પણ વાંચો-પ્રાઈવેટ નોકરી કરતા લોકો માટે માઠા સમાચાર: PF ના વ્યાજદરમાં ઘટાડો કરવાની તૈયારી! કરોડો લોકોને લાગશે ઝટકો