અમેરિકામાં ફેલાઈ રહ્યો છે મનુષ્યો અને પશુઓને અસર કરતો H5N1 વાયરસ, રોગચાળાનું વધ્યું જોખમ

અમેરિકામાં H5N1 વાયરસના કેસમાં સતત વધારો થઈ રહ્યો છે, જેને બર્ડ ફ્લૂ તરીકે પણ ઓળખવામાં આવે છે. આ વાયરસ મુખ્યત્વે પક્ષીઓ અને પશુઓને ચેપ લગાડે છે, પરંતુ હવે તે મનુષ્યોને પણ પોતાની ઝપટમાં લઈ રહ્યું છે, જેનાથી રોગચાળાની ચિંતા વધી છે.

H5N1 વાયરસ શું છે?

H5N1 એ એવિયન ઈન્ફલ્યુએન્ઝા વાયરસનો એક પ્રકાર છે, જેને બર્ડ ફ્લૂ તરીકે ઓળખવામાં આવે છે. આ વાયરસ મુખ્યત્વે પક્ષીઓને અસર કરે છે, પરંતુ કેટલાક કિસ્સાઓમાં તે મનુષ્યો અને અન્ય પ્રાણીઓને પણ ચેપ લગાડી શકે છે. તાજેતરમાં અમેરિકામાં H5N1 વાયરસના ફેલાવાના સમાચારે ચિંતા વધારી છે, ખાસ કરીને જ્યારે તે ડેરી ગાયો અને મનુષ્યોમાં પણ જોવા મળ્યો છે.

રોગચાળાનું જોખમ

40થી વધુ દેશોના માનવ અને પશુ વાયરસ વિજ્ઞાનીઓનું પ્રતિનિધિત્વ કરતી સંસ્થા ગ્લોબલ વાયરસ નેટવર્કે વિશ્વભરની સરકારોને H5N1ના પ્રકોપ સામે તાત્કાલિક પગલાં લેવા અને તૈયારી કરવાની અપીલ કરી છે. એક અહેવાલમાં પગલાં લેવાની હાકલ કરતાં આ વૈશ્વિક સંગઠને જણાવ્યું, "અમેરિકામાં ડેરી ગાયો અને મનુષ્યોમાં H5N1 વાયરસનો ચેપ ફેલાવાથી રોગચાળાની શક્યતા વધી છે. 995થી વધુ ડેરી ગાયોના ટોળાં અને ઓછામાં ઓછા 70 મનુષ્યો આનાથી પ્રભાવિત થયા છે."

વાયરસ કેવી રીતે ફેલાય છે?

H5N1 વાયરસ ચેપગ્રસ્ત પક્ષીઓના મળ, થૂંક અથવા પીંછાંના સંપર્કમાં આવવાથી ઝડપથી ફેલાય છે. જો માંસ યોગ્ય રીતે રાંધ્યું ન હોય તો તેના સેવનથી પણ આ વાયરસ ફેલાઈ શકે છે. અહેવાલો અનુસાર, હવે આ વાયરસ ગાયોમાં પણ જોવા મળી રહ્યો છે અને કેટલાક કિસ્સાઓમાં મનુષ્યો સુધી પહોંચ્યો છે.