iPhone Duo on Blinkit: એપલનો પહેલો ફોલ્ડેબલ ફોન 'iPhone Duo' બ્લિંકિટ પર થયો લોન્ચ, માત્ર 5 મિનિટમાં જ બધો સ્ટોક વેચાઈ ગયો

iPhone Duo on Blinkit: એપલના ચાહકોમાં હંમેશા તેના નવા પ્રોડક્ટ્સ માટે જબરદસ્ત ક્રેઝ જોવા મળે છે. આ વખતે પણ કંઈક આવું જ બન્યું છે. ક્વિક કોમર્સ પ્લેટફોર્મ બ્લિંકિટ પર એપલના પહેલા ફોલ્ડેબલ સ્માર્ટફોન 'iPhone Duo' ની શાનદાર એન્ટ્રી થઈ છે. શુક્રવારે સવારે આ ફોનનું સેલ શરૂ થતાં જ માત્ર 5 મિનિટમાં તેનો બધો જ સ્ટોક વેચાઈ ગયો હતો.

માત્ર 5 મિનિટમાં આઉટ ઓફ સ્ટોક

બ્લિંકિટના કો-ફાઉન્ડર અને CEO અલ્બિન્દર ઢીંડસાએ સોશિયલ મીડિયા પ્લેટફોર્મ X પર આ અંગેની માહિતી શેર કરી હતી. તેમણે જણાવ્યું કે, શુક્રવારે સવારે 8:15 વાગ્યે બ્લિંકિટ પ્લેટફોર્મ પર iPhone Duo નું સેલ લાઈવ કરવામાં આવ્યું હતું. શરૂઆતમાં આ સુવિધા માત્ર દિલ્હી-NCR ના ગ્રાહકો માટે જ ઉપલબ્ધ હતી. પરંતુ, ગ્રાહકોની ડિમાન્ડ એટલી તોતિંગ હતી કે, 5 જ મિનિટમાં તમામ ફોન વેચાઈ ગયા. કંપની હવે ગ્રાહકોની માંગને પહોંચી વળવા આગામી અઠવાડિયામાં વધુ સ્ટોક લાવવાની તૈયારી કરી રહી છે.

ગ્લોબલ માર્કેટમાં પણ ભારે ડિમાન્ડ અને લાંબી લાઈનો

રોયટર્સના રિપોર્ટ મુજબ, શુક્રવારથી વૈશ્વિક સ્તરે પણ આ ફોનનું વેચાણ શરૂ થઈ ગયું છે. એપલના નવા CEO જ્હોન ટર્નસ માટે આ લોન્ચ એક મોટી પરીક્ષા સમાન છે. તેમણે સપ્ટેમ્બરમાં પોતાનો કાર્યભાર સંભાળ્યાના બરાબર એક અઠવાડિયા પછી જ આ ફોન પરથી પડદો ઉઠાવ્યો હતો. આ ફોન દ્વારા એપલે સેમસંગ અને હુઆવેઇ જેવી કંપનીઓના દબદબાવાળા ફોલ્ડેબલ માર્કેટમાં સત્તાવાર એન્ટ્રી કરી લીધી છે.

આ લક્ઝરી ફોન ખરીદવા માટે સિડનીથી લઈને શાંઘાઈ સુધી દુનિયાભરના એપલ સ્ટોર્સ બહાર ગ્રાહકોની લાંબી લાઈનો જોવા મળી હતી. જોકે, લિમિટેડ સ્ટોક હોવાથી ઘણા દેશોમાં ગ્રાહકોને નિરાશ થવું પડ્યું છે. એપલે સ્પષ્ટ કર્યું છે કે ભારત, ચીન, ફ્રાન્સ, હોંગકોંગ અને જાપાનમાં આ ફોન હાલ પૂરતો માત્ર એ જ ગ્રાહકોને મળશે જેમણે અગાઉથી ઓનલાઈન ઓર્ડર કર્યો હતો.

કેવા છે ફીચર્સ અને એક્સપર્ટ્સના રિવ્યૂ?