'કદાચ મારી હત્યા થઈ શકે છે...', ડોનાલ્ડ ટ્રમ્પનો સનસનીખેજ દાવો, કહ્યું- ઈરાનની 'કિલ લિસ્ટ' માં મારું નામ સૌથી ઉપર, જાણો પ્લેન બદલવાનું મોટું રહસ્ય

અમેરિકા અને ઈરાન વચ્ચે ચાલી રહેલા ભીષણ સૈન્ય ટકરાવ વચ્ચે અમેરિકી રાષ્ટ્રપતિ ડોનાલ્ડ ટ્રમ્પે એક ખૂબ જ સનસનીખેજ દાવો કર્યો છે. તુર્કીમાં ચાલી રહેલી નાટો સમિટ દરમિયાન ટ્રમ્પે સ્પષ્ટ શબ્દોમાં કહ્યું કે તેઓ હાલમાં ઈરાનની 'કિલ લિસ્ટ' માં પહેલા નંબરના ટાર્ગેટ છે. વાત માત્ર અહીં જ ન અટકી, ટ્રમ્પે ત્યાં સુધી કહી દીધું કે, "કદાચ મારી હત્યા પણ થઈ શકે છે!"

આ સાથે જ ટ્રમ્પે ઈરાનના નવા શાસકોને ખુલ્લી ધમકી આપતા કહ્યું કે જો તેઓ લડવાનું ચાલુ રાખશે, તો તેમનો અંજામ પણ ઈરાનના જૂના નેતાઓ જેવો જ થશે, જેઓ હવે આ દુનિયામાં નથી.

'હું તેમનો નંબર 1 ટાર્ગેટ છું'

નાટો સમિટમાં પત્રકારો સાથે વાત કરતા ટ્રમ્પ પોતાના જાણીતા આક્રમક અંદાજમાં જોવા મળ્યા હતા. તેમણે અમેરિકા દ્વારા ઈરાન પર થઈ રહેલા બોમ્બમારાનું ખુલ્લીને સમર્થન કર્યું હતું."તેમના પહેલા વાળા નેતાઓ ગયા. પછી બીજા આવ્યા, તે પણ ગયા. હવે તેમની પાસે નવા નેતાઓ છે, તે ક્યારે જશે કોને ખબર! અને જાણો છો શું? કદાચ મારી પણ હત્યા થઈ શકે છે, કારણ કે હું તેમનો નંબર 1 ટાર્ગેટ છું. તેઓ 47 વર્ષથી આવું જ કામ કરી રહ્યા છે, તેઓ કચરો છે. પરંતુ હું મારા દેશ અને આખી દુનિયા માટે જે સાચું છે તે જ કરી રહ્યો છું."

પ્લેન ક્રેશ કે હત્યાનો ડર? છેલ્લી ઘડીએ બદલ્યું વિમાન

આ હાઈ-વોલ્ટેજ ડ્રામા વચ્ચે એક રહસ્યમય ઘટના પણ બની. નાટો સમિટ પૂરી કરીને વોશિંગ્ટન પાછા ફરવા માટે ટ્રમ્પે છેલ્લી ઘડીએ પોતાનો પ્લાન બદલ્યો. તેમણે કતાર દ્વારા ભેટમાં મળેલું પોતાનું બિલકુલ નવું 'એરફોર્સ વન' પ્લેન છોડી દીધું અને અમેરિકાના જૂના રાષ્ટ્રપતિ વિમાનમાં મુસાફરી કરી.

'ધ ન્યૂયોર્ક ટાઇમ્સ' ના રિપોર્ટ મુજબ, અમેરિકન ગુપ્તચર એજન્સી 'સિક્રેટ સર્વિસ' ની વિનંતી પર સુરક્ષાના કારણોસર છેલ્લી ઘડીએ આ વિમાન બદલવામાં આવ્યું હતું. તુર્કીની સરહદ ઈરાન સાથે જોડાયેલી છે અને અમેરિકા ઈરાન પર સતત બોમ્બમારો કરી રહ્યું હોવાથી, રાષ્ટ્રપતિની સુરક્ષામાં કોઈ જોખમ લેવા માંગતું ન હતું. જ્યારે ટ્રમ્પ જૂના પ્લેનમાં ઉડાન ભરી રહ્યા હતા, ત્યારે પત્રકારોને ટેક-ઓફ સમયે બારીઓના પડદા સંપૂર્ણપણે બંધ રાખવાની કડક સૂચના આપવામાં આવી હતી.

કતારવાળા નવા 'એરફોર્સ વન' નો શું છે વિવાદ?

સોશિયલ મીડિયા પ્લેટફોર્મ 'ટ્રુથ સોશિયલ' પર સ્પષ્ટતા કરતા ટ્રમ્પે લખ્યું કે તેમણે નવું પ્લેન બ્રિટિશ એરબેઝ પર સૈનિકોને મળવા માટે આગળ મોકલી દીધું હતું. પરંતુ આ પ્લેન પહેલેથી જ વિવાદોમાં ઘેરાયેલું છે.

ગયા વર્ષે કતારના શાહી પરિવારે આ ચમચમાતું નવું 'Boeing 747-8' વિમાન ટ્રમ્પને ગિફ્ટ કર્યું હતું, જેનો રંગ લાલ, સફેદ અને નેવી બ્લુ છે. ડિફેન્સ એક્સપર્ટ્સનું માનવું છે કે ઉતાવળમાં તૈયાર કરાયેલા આ કતારી પ્લેનમાં હજુ પણ એવા હાઈ-ટેક સિક્યોરિટી અને એન્ટી-મિસાઈલ ફીચર્સ નથી, જે અમેરિકાના મૂળ એરફોર્સ વનમાં હોય છે. આ ઉપરાંત, કોઈ વિદેશી સરકાર પાસેથી કરોડો ડોલરનું પ્લેન ભેટમાં લેવા બદલ ટ્રમ્પને અમેરિકામાં કડક બંધારણીય અને સુરક્ષા વિરોધનો પણ સામનો કરવો પડી રહ્યો છે.

આ પણ વાંચો-ઈરાનનો અમેરિકાને સૌથી મોટો ઝટકો! બહેરીનમાં US નેવીના પાંચમા કાફલા પર મિસાઈલ એટેક, મિડલ ઈસ્ટમાં યુદ્ધના ભણકારા