Nipah Virus: પશ્ચિમ બંગાળમાં નિપાહ વાયરસનો ફફડાટ! 2 શંકાસ્પદ કેસ મળતા કેન્દ્ર સરકાર એલર્ટ, જે.પી. નડ્ડાએ મમતા બેનર્જીને ફોન કરીને કહી આ વાત

Nipah Virus West Bengal: પશ્ચિમ બંગાળમાં ફરી એકવાર ચિંતાજનક સમાચાર સામે આવ્યા છે. રાજ્યમાં નિપાહ વાયરસના બે શંકાસ્પદ કેસ મળતા આરોગ્ય વિભાગ દોડતું થઈ ગયું છે. આ બાબતની ગંભીરતાને ધ્યાનમાં રાખીને કેન્દ્રીય સ્વાસ્થ્ય મંત્રી જે.પી. નડ્ડાએ તરત જ પશ્ચિમ બંગાળના મુખ્યમંત્રી મમતા બેનર્જી સાથે ફોન પર વાતચીત કરી હતી. તેમણે મમતા બેનર્જીને ખાતરી આપી છે કે કેન્દ્ર સરકાર આ મામલે રાજ્યને તમામ પ્રકારની મદદ પૂરી પાડશે.

નિપાહ વાયરસ એક જીવલેણ બીમારી હોવાથી તેના ફેલાવાનો ડર હંમેશા રહેતો હોય છે. તેથી જ સરકાર આ સ્થિતિ પર ચાંપતી નજર રાખી રહી છે અને સાવચેતીના તમામ પગલાં લઈ રહી છે.

ક્યાં મળ્યા આ બંને દર્દીઓ?

મળતી માહિતી મુજબ, ઉત્તર 24 પરગના જિલ્લાના બારાસતમાં આવેલી એક ખાનગી હોસ્પિટલના બે મેલ નર્સના રિપોર્ટમાં નિપાહ વાયરસ હોવાની શંકા છે. રાજ્ય સરકારના સૂત્રોના જણાવ્યા અનુસાર, આ બંને સંક્રમિત લોકોનો બીજા કોઈ રાજ્યમાં જવાનો રેકોર્ડ મળ્યો નથી. જોકે, તપાસમાં એવું સામે આવ્યું છે કે તેઓ વર્ધમાન (બર્દવાન) ગયા હતા.

5 જાન્યુઆરીથી બીમાર હતા દર્દીઓ

સૂત્રો પાસેથી મળતી વિગત મુજબ, આ બંને દર્દીઓ 5 જાન્યુઆરીથી બીમાર હતા. કલ્યાણી AIIMS માં થયેલા ટેસ્ટ બાદ તેમના શરીરમાં નિપાહ વાયરસ હોવાની પુષ્ટિ થઈ હતી. હવે વધુ તપાસ અને કન્ફર્મેશન માટે તેમના સેમ્પલનું ફરીથી ટેસ્ટિંગ કરવામાં આવશે. આ બંને લોકો રાજ્યના બે અલગ-અલગ જિલ્લાના રહેવાસી હોવાનું જાણવા મળ્યું છે. સરકારે લોકોની મદદ માટે હેલ્પલાઇન નંબર પણ જાહેર કર્યા છે.

હેલ્પલાઇન નંબર:

જો કોઈને શંકાસ્પદ લક્ષણો દેખાય અથવા માહિતી જોઈતી હોય તો નીચેના નંબર પર સંપર્ક કરી શકે છે:

033-23330180

9874708858

9836046212

કેવી રીતે ફેલાય છે નિપાહ વાયરસ?

નિપાહ વાયરસ મૂળભૂત રીતે ચામાચીડિયામાંથી ફેલાય છે. આ વાયરસની શરૂઆત મલેશિયાથી થઈ હતી. સામાન્ય રીતે આ વાયરસ પહેલા ભૂંડમાં ફેલાય છે અને ત્યાંથી તે માણસોમાં આવે છે. આ સિવાય, ચામાચીડિયાએ ખાધેલા ફળો ખાવાથી અથવા સંક્રમિત પ્રાણીઓના સંપર્કમાં આવવાથી પણ આ રોગ થઈ શકે છે. સૌથી જોખમી બાબત એ છે કે સંક્રમિત વ્યક્તિની નજીક રહેવાથી આ વાયરસ એક માણસમાંથી બીજા માણસમાં પણ ફેલાઈ શકે છે.

નિપાહ વાયરસના મુખ્ય લક્ષણો

જો કોઈ વ્યક્તિ નિપાહ વાયરસથી સંક્રમિત થાય તો તેના શરીરમાં નીચે મુજબના લક્ષણો જોવા મળે છે:

ખૂબ તેજ તાવ આવવો અને માથામાં અસહ્ય દુખાવો થવો.

સ્નાયુઓમાં ખેંચાણ અને શરીરમાં દુખાવો.

વારંવાર ઉલટી થવી અને જીવ ગભરાવવો.

પેટ ખરાબ રહેવું.

શ્વાસ લેવામાં તકલીફ થવી અને છાતીમાં જકડાશ અનુભવવી.

વધુ ગંભીર કિસ્સામાં દર્દીને ન્યુમોનિયા પણ થઈ શકે છે.

શું છે આનો ઈલાજ?

કોરોના વાયરસની જેમ જ નિપાહ વાયરસની પણ હજુ સુધી કોઈ ચોક્કસ દવા કે રસી શોધાઈ નથી. વૈજ્ઞાનિકો આ દિશામાં સતત સંશોધન કરી રહ્યા છે. હાલમાં ડોક્ટરો દર્દીના લક્ષણોને ધ્યાનમાં રાખીને તેની સારવાર કરે છે. આ વાયરસ સામે લડવા માટે દર્દીની રોગપ્રતિકારક શક્તિ મજબૂત હોવી ખૂબ જરૂરી છે. જે લોકોની ઈમ્યુનિટી સારી હોય છે, તેઓ આ વાયરસને મ્હાત આપી શકે છે.

આ પણ વાંચો-Amit Shah Gujarat Visit: કેન્દ્રીય ગૃહમંત્રી અમિત શાહ ગુજરાત પ્રવાસે, માણસામાં રુપિયા 267 કરોડથી વધુના વિવિધ વિકાસકાર્યોનું કર્યું લોકાર્પણ અને ખાતમુહૂર્ત