રામ મંદિર ચંદા ચોરી કેસ: તપાસ માટે નવી SIT ની રચના, આઈજી કિરણ એસ કરશે નેતૃત્વ, ટીમમાં CA પણ સામેલ

અયોધ્યામાં ભવ્ય રામ મંદિરના નિર્માણ અને વ્યવસ્થાપન વચ્ચે એક મોટા સમાચાર સામે આવ્યા છે. રામ મંદિરમાં ચંદા ચોરીના કેસની ઊંડાણપૂર્વક તપાસ કરવા માટે એક નવી સ્પેશિયલ ઇન્વેસ્ટિગેશન ટીમની રચના કરવામાં આવી છે. ઉત્તર પ્રદેશ સરકાર વતી સુપ્રીમ કોર્ટમાં હાજર રહેલા સોલિસિટર જનરલ (SG) તુષાર મહેતાએ આ અંગેની સત્તાવાર માહિતી આપી છે.

કોણ-કોણ છે આ નવી SITમાં?

એસજી તુષાર મહેતાએ સુપ્રીમ કોર્ટને જણાવ્યું કે 25 જુલાઈના રોજ આ નવી SIT બનાવવામાં આવી છે. આ તપાસ ટીમમાં કુલ 4 સભ્યોનો સમાવેશ કરવામાં આવ્યો છે. ટીમના વડા તરીકે આઈજી કિરણ એસ.ને જવાબદારી સોંપવામાં આવી છે. તેમની સાથે DIG અને SP રેન્કના બે ઉચ્ચ પોલીસ અધિકારીઓ છે. આર્થિક મામલાની બારીકાઈથી તપાસ કરવા માટે એક ચાર્ટર્ડ એકાઉન્ટન્ટને પણ ટીમનો હિસ્સો બનાવવામાં આવ્યા છે. સુનાવણી દરમિયાન સુપ્રીમ કોર્ટે એક મહત્વનું સૂચન કર્યું હતું કે આ SIT માં એક 'ફોરેન્સિક ઓડિટર' ને પણ સામેલ કરવા જોઈએ. યુપી સરકાર વતી તુષાર મહેતાએ કોર્ટના આ સૂચન સાથે સહમતિ દર્શાવી છે. સુપ્રીમ કોર્ટે આ નવી ટીમને 2 સપ્તાહની અંદર પોતાનો સ્ટેટસ રિપોર્ટ (યથાસ્થિતિ રિપોર્ટ) દાખલ કરવાનો આદેશ આપ્યો છે.

આ કેસની અગાઉની સુનાવણી 20 જુલાઈએ થઈ હતી. તે સમયે અગાઉની SIT માં લખનૌના કમિશનર, નાણાં વિભાગના વિશેષ સચિવ અને એક સિનિયર IPS અધિકારી સામેલ હતા. સોલિસિટર જનરલે કોર્ટને જણાવ્યું હતું કે જૂની SIT નું કામ માત્ર પ્રાથમિક તપાસ કરવાનું હતું. તેમની તપાસમાં ગુનો નોંધાયો હોવાનું સામે આવ્યું અને ત્યારબાદ FIR દાખલ કરવામાં આવી હતી. જ્યારે કોર્ટે પૂછ્યું કે શું હવે આખા કેસની તપાસ માટે નવી ટીમ બની રહી છે? ત્યારે નાકારાત્મક જવાબ મળતા કોર્ટે પોતે જ જૂની ટીમના સિનિયર IPS અધિકારીના નેતૃત્વમાં એક નવી જ SIT બનાવવાનો આદેશ આપ્યો હતો.

પૂજા-પાઠ અને ધાર્મિક બાબતો માટે નવી 9 સભ્યોની સમિતિની રચના

ચકાસણી અને તપાસ સિવાય, શ્રી રામ જન્મભૂમિ તીર્થ ક્ષેત્ર ટ્રસ્ટે મંદિરના ધાર્મિક કાર્યોને સુવ્યવસ્થિત કરવા માટે પણ મોટો નિર્ણય લીધો છે. 22 જુલાઈએ ટ્રસ્ટના અધ્યક્ષ મહંત નૃત્ય ગોપાલ દાસની અધ્યક્ષતામાં મળેલી બેઠકમાં 9 સભ્યોની એક 'સ્થાયી ધાર્મિક સમિતિ' ને મંજૂરી આપવામાં આવી છે.

આ સમિતિ શું કામ કરશે?

આ સમિતિ મંદિરમાં રોજબરોજની પૂજા, મોટા ધાર્મિક તહેવારો, વૈદિક રીતિ-રિવાજો, પૂજારીઓની નિમણૂક અને તેમની ટ્રેનિંગ તેમજ મંદિરની પરંપરાગત પૂજા પદ્ધતિ જાળવી રાખવા જેવા તમામ મહત્વના નિર્ણયો લેશે.

સમિતિમાં કોનો સમાવેશ થાય છે?

આ સમિતિના અધ્યક્ષ ટ્રસ્ટના ખજાનચી મહંત ગોવિંદ દેવ ગિરિ રહેશે. આ ઉપરાંત દેશના પ્રમુખ સંતો અને વિદ્વાનો આ ટીમમાં સામેલ છે:

જગતગુરુ શંકરાચાર્ય વાસુદેવાનંદ સરસ્વતી

કર્ણાટક પેજાવર મઠના સ્વામી વિશ્વ પ્રસન્નતીર્થ

નિર્મોહી અખાડાના મહંત દિનેન્દ્ર દાસ

મણિરામ છાવણીના મહંત કમલ નયન દાસ

રામવલ્લભ કુંજના મહંત રાજકુમાર દાસ

રામ કથા કુંજના સ્વામી રામાનંદ દાસ

મહંત મિથિલેશ નંદિની શરણ

હરિદ્વાર અખંડ પરમધામ આશ્રમના સ્વામી પરમાનંદ ગિરિ

આ પણ વાંચો-મન કી બાત: PM મોદીની 'હર ઘર તિરંગા' ની અપીલ, કારગિલ, વિક્રમ-1 અને સ્પોર્ટ્સ અંગે કહી આ મોટી વાતો