US Snowstorm: અમેરિકામાં બરફના તોફાને તબાહી મચાવી, લાખો ઘરોમાં વીજળી કટ, 2400 ફ્લાઈટ્સ રદ

US winter Snowstorm: અમેરિકામાં બરફના તોફાનના કારણે સામાન્ય જનજીવન ખરાબ રીતે પ્રભાવિત થયું છે. ભારે હિમવર્ષા અને બર્ફીલા વરસાદને કારણે લાખો લોકો તેમના ઘરોમાં કેદ છે. રસ્તાઓ પર બરફ જમા થયો છે જેના કારણે અકસ્માતમાં લોકોના મોત થયા છે. અમેરિકાના એક ડઝનથી વધુ રાજ્યોમાં બરફનું તોફાન ત્રાટક્યું છે. મધ્ય અમેરિકાના કેન્સાસથી લઈને પૂર્વ કિનારે ન્યુ જર્સી સુધી 60 મિલિયનથી વધુ લોકો પ્રભાવિત થયા છે.

સામાન્ય જીવન પ્રભાવિત

ટ્રેકિંગ વેબસાઇટ્સ Poweroutage.us અને FlightAware અનુસાર, સોમવારે બપોર સુધીમાં મિઝોરીથી વર્જિનિયા સુધીના 175,000થી વધુ લોકો વીજળી વિના હતા. બરફના તોફાનને કારણે 2,400થી વધુ ફ્લાઇટ્સ રદ કરવામાં આવી હતી અને હજારો વિમાનો મોડા પડ્યા હતા. તોફાનના કારણે રેલ યાત્રાને પણ માઠી અસર થઈ હતી. નેશનલ રેલ્વે પેસેન્જર કોર્પોરેશને 50 થી વધુ ટ્રેનો રદ કરી છે. તોફાન-સંબંધિત ટ્રાફિક અકસ્માતોમાં ઓછામાં ઓછા ચાર લોકોના મોત થયા છે અને ડઝનેક લોકો ઘાયલ થયા છે.

એલર્ટ જાહેર

સ્થિતિ એવી છે કે ચેપમેન અને સેન્ટ જ્યોર્જ, કેન્સાસમાં 18 ઈંચ સુધીની હિમવર્ષા નોંધાઈ છે, જ્યારે કેમેરોન, મિઝોરી અને મેસન, વેસ્ટ વર્જિનિયામાં 10 ઈંચથી વધુ હિમવર્ષા થઈ છે. હવામાન વિભાગના જણાવ્યા અનુસાર તોફાનના કારણે ઘણા વિસ્તારોમાં તાપમાન -18 ડિગ્રી સુધી જઈ શકે છે. હિમવર્ષા, ઠંડો પવન અને સતત ઘટી રહેલા તાપમાને દેશના કેટલાક ભાગોમાં મુસાફરીની સ્થિતિને જોખમી બનાવી દીધી છે.