રશિયામાં યુક્રેનનો મોટો હુમલો: મોસ્કોની ઓઈલ રિફાઈનરી ખાખ, 4 મુખ્ય એરપોર્ટ બંધ કરવા પડ્યા

નિયાને હજુ મિડલ ઈસ્ટમાં ચાલી રહેલા ભયંકર યુદ્ધમાંથી થોડી રાહત મળી હતી ત્યાં રશિયા અને યુક્રેન વચ્ચે ફરી એકવાર યુદ્ધ ભડકી ઉઠ્યું છે. બંને દેશો વચ્ચે તબાહી અને વિનાશનો દોર સતત વધી રહ્યો છે. ગુરુવારે યુક્રેને રશિયાની રાજધાની મોસ્કોમાં આવેલી એક મોટી ઓઈલ રિફાઈનરી પર આ સપ્તાહનો બીજો સૌથી મોટો ડ્રોન હુમલો કર્યો છે. આ હુમલા બાદ રિફાઈનરીમાંથી કાળા ધુમાડાના ગોટેગોટા અને ભયંકર જ્વાળાઓ ઉઠતી જોવા મળી હતી. યુક્રેનના રાષ્ટ્રપતિ વોલોદિમિર ઝેલેન્સ્કીએ આ હુમલાને સંપૂર્ણપણે યોગ્ય ગણાવ્યો છે અને તેને યુક્રેન તરફથી અત્યાર સુધીના સૌથી મોટા અભિયાનોમાંનું એક માનવામાં આવી રહ્યું છે.

રશિયાની 'વૉર મશીન' ને તોડવાનો પ્રયાસ

હુમલાની જવાબદારી સ્વીકારતા યુક્રેનના રાષ્ટ્રપતિ ઝેલેન્સ્કીએ પોતાના સૈનિકોના ભારે વખાણ કર્યા છે. તેમણે સ્પષ્ટ શબ્દોમાં કહ્યું કે અમારા શહેરો અને નાગરિકો પર તાજેતરમાં થયેલા રશિયન હુમલાઓનો આ એકદમ વ્યાજબી જવાબ છે. યુક્રેનના સૈનિકો હવે એવા સ્થળોને સીધા નિશાન બનાવી રહ્યા છે જે રશિયાની સૈન્ય તાકાત અને તેમની વૉર મશીનને ઈંધણ પૂરું પાડે છે.

યુક્રેને કેમ લીધો આ મોટો બદલો?

આ જવાબી હુમલો આ સપ્તાહની શરૂઆતમાં કિવ પર થયેલા રશિયન હવાઈ હુમલાઓનું પરિણામ છે. રશિયાના તે હુમલાઓમાં ઓછામાં ઓછા 11 લોકોના કરુણ મોત થયા હતા. રશિયાના બોમ્બમારામાં યુનેસ્કોની વર્લ્ડ હેરિટેજ લિસ્ટમાં સામેલ 'કિવ-પેચેર્સ્ક લાવરો' મઠ સંકુલના એક ભાગને પણ ભારે નુકસાન પહોંચ્યું હતું. યુક્રેનના અધિકારીઓએ તેને દેશની સાંસ્કૃતિક સંપત્તિ પર થયેલો અત્યાર સુધીનો સૌથી ક્રૂર હુમલો ગણાવ્યો હતો અને તેથી જ આ બદલો લેવામાં આવ્યો છે.

555 ડ્રોન તોડી પાડ્યા અને 4 એરપોર્ટ બંધ

બીજી તરફ રશિયન અધિકારીઓએ એવો દાવો કર્યો છે કે તેમણે અલગ અલગ વિસ્તારોમાં યુક્રેનના ઓછામાં ઓછા 555 ડ્રોનને હવામાં જ તોડી પાડ્યા છે. રશિયાના સંરક્ષણ મંત્રાલયના જણાવ્યા મુજબ આમાંથી લગભગ 200 ડ્રોન માત્ર રાજધાની મોસ્કો તરફ આગળ વધી રહ્યા હતા જેને સફળતાપૂર્વક નષ્ટ કરી દેવામાં આવ્યા છે.