Artificial Intelligence Jobs: AIના કારણે 80% નોકરીઓ જશે? વિનોદ ખોસલાનો ચોંકાવનારો દાવો!

Artificial Intelligence Jobs: આર્ટિફિશિયલ ઇન્ટેલિજન્સ (AI) આજે વિશ્વભરમાં ચર્ચાનો વિષય બની ગયું છે. દુનિયાની મોટી ટેક કંપનીઓ પોતાના બિઝનેસમાં AI નો ઉપયોગ ઝડપથી વધારી રહી છે. પરંતુ આની સાથે જ નોકરીઓ ગુમાવવાનો ડર પણ વધી રહ્યો છે. સન માઇક્રોસિસ્ટમ્સના કો-ફાઉન્ડર અને જાણીતા ભારતીય અમેરિકન રોકાણકાર વિનોદ ખોસલાએ AIના આ અસરને ખુલ્લેઆમ સ્વીકાર્યું છે. તેમનું માનવું છે કે આગામી 5 વર્ષમાં 80% નોકરીઓ AI ના કારણે ખતમ થઈ શકે છે.

વિનોદ ખોસલાનો નિખિલ કામત સાથે પોડકાસ્ટમાં ખુલાસો

નિખિલ કામત સાથેના એક પોડકાસ્ટમાં વિનોદ ખોસલાએ આ ચોંકાવનારો દાવો કર્યો. તેમણે કહ્યું કે, "આગામી 5 વર્ષમાં 80% નોકરીઓ ખતમ થઈ જશે, કારણ કે આ નોકરીઓમાં રહેલા કામો હવે AI કરશે." તેમણે વધુમાં જણાવ્યું કે આજે મનુષ્ય જે 80% કામ કરે છે, તે બધું ભવિષ્યમાં AI દ્વારા થશે. આનાથી નોકરીઓ પર મોટી અસર પડશે, પરંતુ તેની સાથે નવી તકો પણ ઊભી થશે.

સ્પેશિયાલિસ્ટ નહીં, જનરલિસ્ટ બનો: વિનોદ ખોસલાની સલાહ

વિનોદ ખોસલાએ વિદ્યાર્થીઓ અને યુવાનોને સલાહ આપી કે આજના ઝડપથી બદલાતા ટેક્નોલોજીના યુગમાં સ્પેશિયાલિસ્ટ બનવાને બદલે જનરલિસ્ટ બનવું વધુ ફાયદાકારક છે. તેમણે કહ્યું, "એક જ વિષયમાં નિપુણતા મેળવવાને બદલે, વિવિધ ક્ષેત્રોનું જ્ઞાન મેળવો. આજના સમયમાં બહુમુખી જ્ઞાન ધરાવનાર વ્યક્તિ વધુ સફળ થશે."

AI નોકરીઓ ખતમ કરશે, પરંતુ નવી તકો પણ લાવશે

વિનોદ ખોસલાનું માનવું છે કે AI ના કારણે નોકરીઓ ખતમ થશે એ સાચું છે, પરંતુ તેની સાથે નવી તકો પણ ઊભી થશે. તેમણે કહ્યું, "AI એવી તકો ઊભી કરશે જેની આપણે હાલમાં કલ્પના પણ નથી કરી શકતા." તેમણે વધુમાં જણાવ્યું કે વર્ષ 2040 સુધીમાં ઘણું બધું બદલાઈ જશે. ઘણા કામો એવા હશે જે માત્ર શોખ પૂરતા કરવામાં આવશે, કારણ કે AI તેની જરૂરિયાત ખતમ કરી દેશે.