યુટ્યુબે ખોટા વીડિયો બતાવ્યા, રશિયન કોર્ટે ગૂગલ પર લગાવ્યો 36 લાખનો દંડ, જાણો આખો મામલો

યુટ્યુબ પર ખોટા વીડિયો બતાવવાનું ગુગલ માટે મોંઘુ સાબિત થયું છે. રશિયાની એક કોર્ટે ગૂગલ પર 38 લાખ રુબેલ્સ (લગભગ 36 લાખ રૂપિયા)નો દંડ લગાવ્યો છે. આ દંડ કેટલાક યુટ્યુબ વીડિયોને કારણે લાદવામાં આવ્યો છે. રોઇટર્સના અહેવાલ મુજબ, આ વીડિયોમાં કથિત રીતે રશિયન સૈનિકોને શરણાગતિ કેવી રીતે આપવી તે બતાવવામાં આવ્યું હતું. રશિયા વિદેશી ટેક કંપનીઓ પર દબાણ લાવી રહ્યું છે. તે ઇચ્છે છે કે આ કંપનીઓ તે સામગ્રી દૂર કરે જે તેને ગેરકાયદેસર લાગે છે. આમાં યુક્રેન યુદ્ધ વિશે ખોટી માહિતી પણ શામેલ છે. આ દંડ આ પ્રયાસનો એક ભાગ છે. ગુગલે હજુ સુધી આ દંડ અંગે કોઈ સત્તાવાર નિવેદન આપ્યું નથી.

રશિયન અધિકારીઓ સામે આરોપો

કેટલાક ટીકાકારો દાવો કરે છે કે રશિયન સત્તાવાળાઓ જાણી જોઈને YouTube ડાઉનલોડ સ્પીડ ધીમી કરી રહ્યા છે. રોઇટર્સના જણાવ્યા અનુસાર, રાષ્ટ્રપતિ વ્લાદિમીર પુતિન અને તેમની સરકારની ટીકા કરતી સામગ્રીને લોકો સુધી પહોંચાડવાનું મુશ્કેલ બનાવવા માટે આ કરવામાં આવી રહ્યું છે.

જોકે, રશિયાએ આ આરોપને નકારી કાઢ્યો છે. રશિયા કહે છે કે આ સમસ્યા ગૂગલ દ્વારા તેના સાધનોને અપગ્રેડ કરવામાં નિષ્ફળતાને કારણે છે. ગૂગલ અને અન્ય ટેકનોલોજી નિષ્ણાતોએ આ દાવાનું ખંડન કર્યું છે.