ઇલેક્ટ્રિક વાહનોએ રચ્યો ઇતિહાસ: ભારતમાં વેચાણનો આંકડો પ્રથમવાર 20 લાખને પાર

EV Sales India: ભારતના ઓટોમોબાઈલ સેક્ટરમાં ઇલેક્ટ્રિક વાહનો (EV) એક નવી ક્રાંતિ લાવી રહ્યા છે. ફેડરેશન ઓફ ઓટોમોબાઈલ ડીલર્સ એસોસિએશન (FADA) દ્વારા જાહેર કરાયેલા આંકડા મુજબ, વર્તમાન કેલેન્ડર વર્ષના પ્રથમ 11 મહિનામાં જ ઇલેક્ટ્રિક વાહનોનું રજિસ્ટ્રેશન 20 લાખના ઐતિહાસિક આંકને પાર કરી ગયું છે. આ પહેલીવાર બન્યું છે કે આટલા ટૂંકા ગાળામાં EV વેચાણે આટલી મોટી સિદ્ધિ મેળવી હોય.

વાર્ષિક ધોરણે જોવામાં આવે તો EVના કુલ વેચાણમાં 14.30%નો મજબૂત વધારો નોંધાયો છે, જે દર્શાવે છે કે ભારતીય ગ્રાહકો હવે પેટ્રોલ-ડીઝલના વિકલ્પ તરીકે ઇલેક્ટ્રિક વાહનોને ઝડપથી અપનાવી રહ્યા છે.

કયા સેગમેન્ટમાં કેટલું વેચાણ?

આ ઐતિહાસિક વૃદ્ધિ પાછળ મુખ્યત્વે ઇલેક્ટ્રિક ટુ-વ્હીલર અને પેસેન્જર વાહનોની વધતી માંગ જવાબદાર છે. ચાલો આંકડા પર એક નજર કરીએ:

ઇલેક્ટ્રિક ટુ-વ્હીલર્સ: જાન્યુઆરીથી નવેમ્બર દરમિયાન કુલ 11.81 લાખ યુનિટ્સનું વેચાણ થયું, જે ગયા વર્ષની સરખામણીમાં 9.80% વધુ છે.

ઇલેક્ટ્રિક થ્રી-વ્હીલર્સ: આ સેગમેન્ટમાં 12.30% ની વૃદ્ધિ સાથે કુલ 709,510 યુનિટ્સ વેચાયા છે.

પેસેન્જર વાહનો (કાર): આ સેગમેન્ટે સૌથી મોટો ઉછાળો માર્યો છે. 77% થી વધુની જંગી વૃદ્ધિ સાથે કુલ 160,894 ઇલેક્ટ્રિક કારનું વેચાણ થયું છે.