મારુતિ સુઝુકીની ચિંતા: નાની કારનું સેલિંગ ઘટ્યું, સરકાર પાસે મદદની અપીલ

દેશની સૌથી મોટી પેસેન્જર વ્હીકલ ઉત્પાદક કંપની મારુતિ સુઝુકી ઇન્ડિયા (Maruti Suzuki India)એ નાની કારોના સેલમાં સતત ઘટાડો થવા અંગે ચિંતા વ્યક્ત કરી છે. કંપનીનું કહેવું છે કે સખત નિયમો અને ઉત્પાદન ખર્ચમાં વધારો થવાને કારણે એન્ટ્રી-લેવલ કારની કિંમતો એટલી વધી ગઈ છે કે તે સામાન્ય કસ્ટમર્સની પહોંચની બહાર થઈ રહી છે. આ સમસ્યાને ઉકેલવા માટે કંપનીએ સરકારને આ સેગમેન્ટને પ્રોત્સાહન આપવા માટે ખાસ પોલિસી બનાવવાની વિનંતી કરી છે.

નાની કારોનું માર્કેટ ઘટ્યું

મારુતિ સુઝુકીના જણાવ્યા અનુસાર, નાની કારોનું સેલ ગયા દાયકામાં નોંધપાત્ર રીતે ઘટ્યું છે. નાણાકીય વર્ષ 2016 (FY16)માં 5 લાખ રૂપિયાથી ઓછી કિંમતની એન્ટ્રી-લેવલ કારોનું સેલ 9.34 લાખ યુનિટ હતું, જે FY25માં ઘટીને માત્ર 25,402 યુનિટ રહી ગયું છે. આ સેગમેન્ટ હવે દેશના કુલ પેસેન્જર વ્હીકલ માર્કેટનો 30%થી પણ ઓછો હિસ્સો ધરાવે છે.

Alto અને S-Pressoનું સેલ ઘટ્યું

કંપનીના લોકપ્રિય એન્ટ્રી-લેવલ મોડલ જેવા કે Alto અને S-Pressoનું સેલ પણ ઘટ્યું છે. મે 2025માં આ બંને મોડલનું કુલ સેલ 6,776 યુનિટ હતું, જે ગયા વર્ષે મે 2024માં 9,902 યુનિટ હતું. આ ઉપરાંત, કોમ્પેક્ટ સેગમેન્ટની કારો જેમ કે Baleno, Celerio, Dzire, Ignis, Swift અને WagonRનું સંયુક્ત સેલ પણ ઘટીને 61,502 યુનિટ રહ્યું, જે ગયા વર્ષે 68,206 યુનિટ હતું.

ટૂ-વ્હીલરથી ફોર-વ્હીલરમાં અપગ્રેડ મુશ્કેલ

 મારુતિ સુઝુકીના સિનિયર એક્ઝિક્યુટિવ ઓફિસર (માર્કેટિંગ એન્ડ સેલ્સ) પાર્થો બેનર્જીએ એક વર્ચ્યુઅલ પ્રેસ કોન્ફરન્સમાં જણાવ્યું કે, “સખત રેગ્યુલેશન અને સેફ્ટી નોર્મ્સના કારણે નાની કારોની કિંમતોમાં નોંધપાત્ર વધારો થયો છે. આની સીધી અસર એવા કસ્ટમર્સ પર પડી છે જેઓ ટૂ-વ્હીલરથી ફોર-વ્હીલર તરફ અપગ્રેડ કરવા માગે છે.” તેમણે ઉમેર્યું, “જો સરકાર ઓટો ઇન્ડસ્ટ્રીની ગ્રોથ ઇચ્છે છે, તો તેના માટે નાના કાર સેગમેન્ટને બૂસ્ટ આપવા ઇન્સેન્ટિવ આપવા જરૂરી છે. આવા ઇન્સેન્ટિવથી એવા કસ્ટમર્સ પણ કાર ખરીદી શકશે જેઓ હાલમાં તેને અફોર્ડ નથી કરી શકતા.”