Davos 2026: ‘2024માં 60 યુદ્ધ થયા, જેમાંથી અમુક તો ફિક્સ હતા!’ મેક્રોંએ ટ્રમ્પને આડે હાથ લીધા; ગ્રીનલેન્ડ અને ટેરિફ મુદ્દે દાવોસમાં ગરમાવો

Davos 2026: વર્લ્ડ ઈકોનોમિક ફોરમ (WEF) 2026ના મંચ પરથી ફ્રાન્સના રાષ્ટ્રપતિ ઈમેન્યુઅલ મેક્રોંએ અમેરિકી રાષ્ટ્રપતિ ડોનાલ્ડ ટ્રમ્પનું નામ લીધા વિના તેમના પર જોરદાર શાબ્દિક પ્રહારો કર્યા છે. પોતાના ભાષણમાં મેક્રોંએ કટાક્ષ કરતા કહ્યું કે આ સમય 'શાંતિ અને સ્થિરતા'નો છે, જેના પર હોલમાં બેઠેલા લોકો હસી પડ્યા હતા. તેમણે ટ્રમ્પની ગ્રીનલેન્ડ ખરીદવાની જિદ અને ફ્રેન્ચ દારૂ (વાઈન) પર ટેક્સ વધારવાની ધમકીનો જડબાતોડ જવાબ આપ્યો હતો.

‘2024માં થયેલા યુદ્ધોમાંથી કેટલાક ફિક્સ હતા’

મેક્રોંએ દુનિયામાં વધી રહેલી અસ્થિરતા તરફ ઈશારો કરતા કહ્યું કે, વર્ષ 2024માં દુનિયાભરમાં 60થી વધુ યુદ્ધો થયા હતા. તેમણે હળવા અંદાજમાં કટાક્ષ કરતા કહ્યું કે, "મને તો એવું પણ જાણવા મળ્યું છે કે આમાંથી અમુક યુદ્ધ તો 'ફિક્સ' હતા." મેક્રોંનો આ ઈશારો ગાઝા અને અન્ય સંઘર્ષો તરફ હતો. ઉલ્લેખનીય છે કે, જ્યારે મેક્રોંએ ટ્રમ્પના ગાઝા માટેના 'બોર્ડ ઓફ પીસ'માં જોડાવાની ના પાડી હતી, ત્યારે ટ્રમ્પે ગુસ્સે થઈને ફ્રેન્ચ વાઈન પર 200% ટેરિફ લગાવવાની ધમકી આપી હતી.

નવા સંસ્થાનવાદ અને ગ્રીનલેન્ડ મુદ્દે વિરોધ

ટ્રમ્પ દ્વારા ગ્રીનલેન્ડ પર કબ્જો જમાવવાની કે ખરીદવાની વાતોને મેક્રોંએ 'નવો સંસ્થાનવાદ' ગણાવીને ફગાવી દીધી હતી. તેમણે સ્પષ્ટ શબ્દોમાં કહ્યું કે, "કોઈપણ દેશ બીજા દેશની સંપ્રભુતા પર હુમલો ન કરી શકે. યુરોપિયન યુનિયન (EU) એ એકજૂથ થઈને આનો વિરોધ કરવો જોઈએ." તેમણે ઉમેર્યું કે આ સમય કોઈ નવા સામ્રાજ્યવાદ કે પંડારા બોક્સ ખોલવાનો નથી, પરંતુ ક્લાઈમેટ ચેન્જ અને વિકાસ પર ધ્યાન આપવાનો છે.

સાથી દેશો વચ્ચે ટેરિફ વૉર 'ગાંડપણ' સમાન

અમેરિકા દ્વારા ફ્રાન્સ સહિત 8 દેશો પર ટેરિફ લગાવવાની ધમકી પર મેક્રોં નારાજ દેખાયા હતા. તેમણે કહ્યું કે, મિત્ર દેશો અને સહયોગીઓ વચ્ચે ટેરિફ લગાવવા અને ભાગલા પાડવા એ સમજદારી નથી. EU એ પોતાના જ સાથી અમેરિકા સામે વળતી કાર્યવાહી કરવી પડે, તે વિચારવું પણ એક પ્રકારનું 'ગાંડપણ' છે. તેમણે કહ્યું કે આ બધું બિનજરૂરી આક્રમકતાનું પરિણામ છે.