Tariff Warning: જાપાન જેવી ભૂલ ન કરો... અમેરિકા સાથેની ડીલમાં મોટા વાયદા ખતરનાક: રઘુરામ રાજનની ચેતવણી

India US Trade Deal: રિઝર્વ બેન્કના પૂર્વ ગવર્નર અને જાણીતા અર્થશાસ્ત્રી રઘુરામ રાજનએ અમેરિકા સાથે ચાલી રહેલી વેપાર વાટાઘાટોમાં ભારતને મહત્વની સલાહ આપી છે. તેમણે કહ્યું કે ભારતે 10થી 20 ટકાની વચ્ચે ટેરિફ રાખવું જોઈએ. વધુ પડતા વાયદા કરવાથી અર્થતંત્ર પર ભાર પડી શકે છે.

રાજનએ આપેલા એક ઈન્ટરવ્યુમાં જણાવ્યું કે, ઝીરો ટેરિફ તો શ્રેષ્ઠ હોત, પણ ભારતે પોતાના હરીફ દેશોની સરખામણીમાં પાછળ ન રહેવું જોઈએ. પૂર્વ અને દક્ષિણ એશિયાના ઘણા દેશોએ 19 ટકા આસપાસ ટેરિફ પર સમજૂતી કરી છે. જ્યારે જાપાન અને યુરોપે 15 ટકા, અને સિંગાપુરે 10 ટકા પર સોદો કર્યો છે.

તેમણે જાપાન અને યુરોપના ઉદાહરણ આપતાં કહ્યું કે, તેઓએ મોટા રોકાણના વાયદા કર્યા છે, જેનાથી અમેરિકાને ફાયદો થશે. પણ પોતાની અર્થવ્યવસ્થાને નુકસાન કર્યા વિના આ વાયદા પૂરા કેવી રીતે કરશે?

વધતા ટેરિફની ચિંતા

રાજનએ ખાસ કરીને કપડા જેવા મજૂર-આધારિત ઉદ્યોગોની ચિંતા વ્યક્ત કરી. ભારતીય કપડા ઉત્પાદકો અમેરિકાના મોટા સ્ટોર્સને માલ સપ્લાય કરે છે. જો ટેરિફ વધશે, તો ખરીદદારો બીજા દેશો તરફ વળશે અને પાછા લાવવું મુશ્કેલ થઈ જશે.

અમેરિકામાં ભારતીય કપડાનું બજાર ખોવાઈ જાય તો પાછું મેળવવું ખૂબ મુશ્કેલ છેઃ રઘુરામ રાજન

ઝડપથી નિર્ણય જરૂરી

રાજનનું માનવું છે કે ભારતે ગ્લોબલ સપ્લાય ચેઈનમાં પોતાની જગ્યા જાળવવા માટે ઝડપથી પગલાં લેવાં જોઈએ. ખાસ કરીને મજૂર-આધારિત ઉદ્યોગોમાં ટેરિફ ઝડપથી ઘટાડવો જરૂરી છે. ટેરિફ એટલે આયાતી માલ પર લાગતો ટેક્સ. જેટલો વધુ ટેરિફ, એટલો માલ મોંઘો થાય અને વેચાણ ઘટે. ભારત ઈચ્છે છે કે અમેરિકા ભારતીય માલ પર ઓછો ટેક્સ લગાવે, જેથી વેચાણ વધે. રાજનની આ ચેતવણી ભારત સરકાર માટે મહત્વની છે. જાપાન જેવી ભૂલ ન થાય, એનું ધ્યાન રાખવું જરૂરી છે.

આ પણ વાંચો-વોટ્સએપ ચેટથી 22 કરોડની ટેક્સ નોટિસ! દિલ્હીના વેપારીએ ITATમાં જીતી લડત, આખો કેસ રદ