નાણા મંત્રાલય 4 માર્ચે જાહેર ક્ષેત્રની બેન્કોના વડાઓ સાથે કરશે મહત્વની બેઠક, જાણો કયા મુદ્દાઓ પર થશે ચર્ચા

નાણા મંત્રાલય દ્વારા જાહેર ક્ષેત્રની બેન્કો (PSBs)ના વડાઓને 4 માર્ચે બોલાવવામાં આવ્યા છે. મંત્રાલય તેમની સાથે એક ખાસ બેઠક યોજશે, જેમાં બેન્કોના નાણાકીય પ્રદર્શન અને નાણાકીય સમાવેશ યોજનાઓની પ્રગતિની સમીક્ષા કરવામાં આવશે. પીટીઆઈના સમાચાર અનુસાર, આ બેઠકની અધ્યક્ષતા નાણાકીય સેવાઓ સચિવ એમ નાગરાજુ કરશે. આ બેઠકમાં પીએમ સ્વાનિધિ યોજના સહિત વિવિધ નાણાકીય સમાવેશ યોજનાઓની પ્રગતિની પણ ચર્ચા અને સમીક્ષા કરવામાં આવશે તેવું જાણવા મળ્યું છે. સંસદમાં કેન્દ્રીય બજેટ 2025-26 રજૂ થયા પછી આ પહેલી બેઠક હશે.

અત્યાર સુધીનો સૌથી વધુ ચોખ્ખો નફો

સમાચાર અનુસાર, ચાલુ નાણાકીય વર્ષના એપ્રિલ-ડિસેમ્બર સમયગાળામાં, સરકારી બેન્કોએ અત્યાર સુધીનો સૌથી વધુ 1.29 લાખ કરોડ રૂપિયાનો ચોખ્ખો નફો નોંધાવ્યો છે, જે વાર્ષિક ધોરણે 31.3 ટકાનો વધારો દર્શાવે છે. સમીક્ષા હેઠળના સમયગાળા દરમિયાન જાહેર ક્ષેત્રની બેન્કોના પ્રદર્શનમાં રેકોર્ડ ચોખ્ખા નફામાં ગ્રોથ, સુધારેલી સંપત્તિ ગુણવત્તા અને પર્યાપ્ત મૂડી બફરના નિર્માણ જેવા મુખ્ય નાણાકીય પરિમાણોમાં નોંધપાત્ર સુધારો જોવા મળ્યો છે.

જાહેર ક્ષેત્રની 12 બેન્કોએ 31.3 ટકા ચોખ્ખા નફામાં ગ્રોથ નોંધાવી

અહેવાલ મુજબ, 12 જાહેર ક્ષેત્રની બેન્કોએ નાણાકીય વર્ષના નવ મહિનામાં 31.3 ટકા (વર્ષ-દર-વર્ષે) ચોખ્ખો નફો નોંધાવ્યો હતો, જેના પરિણામે અત્યાર સુધીનો સૌથી વધુ કુલ ચોખ્ખો નફો રુપિયા 1,29,426 કરોડ અને કુલ રુપિયા 2,20,243 કરોડનો એકંદર ઓપરેટિંગ નફો થયો હતો. નાણા મંત્રાલયે એક નિવેદનમાં જણાવ્યું હતું કે, 0.59 ટકાનો નોંધપાત્ર ઘટાડો (કુલ બાકી NPA રુપિયા 61,252 કરોડ) પણ સુધારેલી સંપત્તિ ગુણવત્તાને દર્શાવે છે. બેન્કોએ 9.8 ટકાની સારી કુલ ડિપોઝિટ ગ્રોથ સાથે 11 ટકા (y-o-y) ની કુલ બિઝનેસ ગ્રોથ નોંધાવી છે. આ સમયગાળા દરમિયાન PSBsનો કુલ બિઝનેસ રુપિયા 242.27 લાખ કરોડે પહોંચ્યો હતો.

સુધારેલી કામગીરી આધારિત પ્રોત્સાહન યોજના

સરકારે તાજેતરમાં જાહેર ક્ષેત્રની બેન્કોમાં વરિષ્ઠ અધિકારીઓ માટે સુધારેલી કામગીરી આધારિત પ્રોત્સાહન યોજના રજૂ કરી છે. તેના માપદંડોમાં સંપત્તિ પર વળતર અને બિન-કાર્યક્ષમ સંપત્તિનું સ્તર વગેરેનો સમાવેશ થાય છે. આ યોજના માટે બેન્કોની પાત્રતાનું મૂલ્યાંકન સરકાર દ્વારા નિયુક્ત સમિતિ દ્વારા ચાર પરિમાણોના આધારે કરવામાં આવશે.