ભારતમાં 10 વર્ષમાં કરોડપતિઓની સંખ્યામાં 85%નો વધારો, પરંતુ આ ત્રણ દેશોએ આપણને છોડ્યા પાછળ

છેલ્લા દસ વર્ષમાં દેશની અર્થવ્યવસ્થા ઝડપથી આગળ વધી છે અને તેની સાથે દેશમાં અમીરોની સંખ્યા પણ ઝડપથી વધી છે. હેનલી પ્રાઈવેટ વેલ્થ માઈગ્રેશન રિપોર્ટ અનુસાર, ભારતમાં 2013 થી 2023 વચ્ચે કરોડપતિઓની સંખ્યામાં 85 ટકાનો વધારો થયો છે. મિલિયોનેર એટલે કે જેની નેટવર્થ 10 લાખ ડોલર એટલે કે રૂપિયા 8,35,76,500 કે તેથી વધુ છે. આંકડાઓ અનુસાર, 2013થી 2023 વચ્ચે ત્રણ દેશોમાં કરોડપતિઓની સંખ્યામાં ભારત કરતાં ઝડપથી વધારો થયો છે. જેમાં વિયેતનામ, ચીન અને મોરેશિયસનો સમાવેશ થાય છે. જોકે વિયેતનામ અને મોરેશિયસની વસ્તી ભારત કરતા ઘણી ઓછી છે. વિયેતનામની વસ્તી 9.82 કરોડ છે અને મોરેશિયસની વસ્તી માત્ર 12.6 લાખ છે.

2013 અને 2023 ની વચ્ચે, વિયેતનામમાં કરોડપતિઓની સંખ્યામાં 98 ટકાનો વધારો થયો છે. ચાઈના પ્લસ વન પોલિસી હેઠળ ઘણી કંપનીઓ ચીનમાંથી બહાર નીકળી ગઈ છે અને તેનો ફાયદો વિયેતનામને મળ્યો છે. આ દસ વર્ષમાં ચીનમાં કરોડપતિઓની વસ્તીમાં 92 ટકાનો વધારો થયો છે, જ્યારે હિંદ મહાસાગરના ટાપુ દેશ મોરેશિયસમાં કરોડપતિઓની સંખ્યામાં 87 ટકાનો વધારો થયો છે. ભારત આ યાદીમાં 85% સાથે ચોથા સ્થાને છે. UAE 77 ટકા સાથે પાંચમા સ્થાને, માલ્ટા (74%) છઠ્ઠા, મોનાકો (68%) સાતમા, સિંગાપોર (64%) આઠમા, અમેરિકા (62%) નવમા અને ન્યૂઝીલેન્ડ (48%) દસમા ક્રમે છે.

અમેરિકાનું વર્ચસ્વ

છેલ્લા દસ વર્ષમાં, તાઇવાનમાં કરોડપતિઓની વસ્તીમાં 42% જ્યારે સ્વિટ્ઝર્લેન્ડમાં તેમની વસ્તીમાં 38%નો વધારો થયો છે. કરોડપતિઓની સંખ્યા ઓસ્ટ્રેલિયામાં 35%, સાઉદી અરેબિયામાં 35%, પોર્ટુગલમાં 32%, કેનેડામાં 29%, દક્ષિણ કોરિયામાં 28%, ઈટાલીમાં 16%, જર્મનીમાં 15%, ફ્રાન્સમાં 14%, 14% છે. ગ્રીસ અને સ્પેનમાં તેમાં છ ટકાનો વધારો થયો છે. વિશ્વના ટોચના અમીરોની યાદી પર નજર કરીએ તો તેમાં અમેરિકાનો દબદબો છે. ટોપ 10માં અમેરિકાના નવ ધનિકોનો સમાવેશ થાય છે. આ યાદીમાં ત્રીજા સ્થાને ફ્રાંસના માત્ર બર્નાર્ડ આર્નોલ્ટ છે. એલોન મસ્ક પહેલા અને જેફ બેઝોસ બીજા ક્રમે છે.

આ પણ વાંચો - અગ્નિવીર ભરતીમાં નવું રિઝર્વેશન! CISF અને BSFમાં તેમના માટે 10% જગ્યાઓ અનામત, શારીરિક અને વયમાં પણ છૂટછાટ