મેઘરાજા ફરી ધડબડાટી બોલાવશે, 15 ઓગસ્ટ સુધી આ રાજ્યોમાં ભારે વરસાદનું એલર્ટ, જાણો ગુજરાત અને દેશના હવામાનની લેટેસ્ટ અપડેટ

IMD Weather Update : થોડા દિવસના વિરામ બાદ દેશના અનેક રાજ્યોમાં મેઘરાજા ફરીથી મહેરબાન થવા જઈ રહ્યા છે. ભારત હવામાન વિજ્ઞાન વિભાગની લેટેસ્ટ આગાહી મુજબ, 9 થી 15 ઓગસ્ટ સુધી ઉત્તર ભારતથી લઈને પશ્ચિમ અને દક્ષિણ ભારતમાં ભારેથી અતિ ભારે વરસાદની શક્યતા છે. રાજધાની દિલ્હીમાં પણ ચોમાસાનો વરસાદ સતત ચાલુ રહેશે.

13 ઓગસ્ટથી કેમ બદલાશે વાતાવરણ?

હવામાન વિભાગના જણાવ્યા અનુસાર, સૌથી મોટો ફેરફાર 13 ઓગસ્ટની આસપાસ જોવા મળશે. 11 ઓગસ્ટના રોજ બંગાળની ખાડી અને પશ્ચિમ બંગાળ-બાંગ્લાદેશના દરિયાકાંઠે એક સાયક્લોનિક સર્ક્યુલેશન બનવાની સંભાવના છે. જેના પરિણામે 13 ઓગસ્ટની આસપાસ લો-પ્રેશર સિસ્ટમ બનશે. આ સિસ્ટમની સીધી અસરને લીધે 13 ઓગસ્ટથી પશ્ચિમ બંગાળ, ઓડિશા, ઝારખંડ, છત્તીસગઢ અને બિહારમાં વરસાદનું જોર અચાનક વધી જશે.

ઉત્તર ભારતમાં 15 ઓગસ્ટ સુધી કેવો રહેશે માહોલ?

ઉત્તર-પશ્ચિમ ભારતમાં આ આખું અઠવાડિયું વરસાદી માહોલ રહેશે. હિમાચલ પ્રદેશ, જમ્મુ-કાશ્મીર, લદ્દાખ અને ઉત્તરાખંડમાં 9 થી 15 ઓગસ્ટ સુધી ભારે વરસાદની આગાહી છે. ખાસ કરીને જમ્મુ-કાશ્મીર અને લદ્દાખમાં 11 ઓગસ્ટે અને ઉત્તરાખંડમાં 9-10 ઓગસ્ટે અતિ ભારે વરસાદ પડી શકે છે. પંજાબમાં 10-11 અને 13-14 ઓગસ્ટે વરસાદ પડશે. હરિયાણા અને ચંદીગઢમાં પણ 10-11 અને 13 ઓગસ્ટે સારો વરસાદ થવાની સંભાવના છે. પૂર્વ ઉત્તર પ્રદેશમાં 13-14 ઓગસ્ટ અને પૂર્વ રાજસ્થાનમાં 9 થી 13 ઓગસ્ટ સુધી મેઘમહેર ચાલુ રહેશે.

ગુજરાત અને પશ્ચિમ ભારતમાં શું છે આગાહી?

ગુજરાતના લોકો માટે પણ સારા સમાચાર છે. 10 થી 12 ઓગસ્ટ દરમિયાન રાજ્યમાં વરસાદનું જોર વધશે. ખાસ કરીને 11 ઓગસ્ટના રોજ ગુજરાતના કેટલાક વિસ્તારોમાં ભારે વરસાદ ખાબકી શકે છે. કોંકણ અને ગોવામાં 9 થી 15 ઓગસ્ટ સુધી સતત વરસાદ પડી શકે છે. મધ્ય મહારાષ્ટ્ર અને મરાઠવાડામાં પણ ગાજવીજ સાથે વરસાદની આગાહી છે.