જમ્મુ-કાશ્મીરમાં ગોઝારો માર્ગ અકસ્માત, વૈષ્ણોદેવી જતી બસ ખાડામાં ખાબકી, 7ના મોત

Jammu Bus Accident: જમ્મુ-કાશ્મીરમાં આજે સવારે એક મોટો માર્ગ અકસ્માત થયો હતો. જમ્મુ-શ્રીનગર નેશનલ હાઈવે પર ઝજ્જર કોટલી પાસે મુસાફરોથી ભરેલી બસ ખીણમાં પડી હતી. બસ વૈષ્ણોદેવીના દર્શન કરવા મુસાફરોને લઈને અમૃતસરથી કટરા જઈ રહી હતી. આ અકસ્માતમાં 7 મુસાફરોના મોત થયા હતા. જ્યારે 12થી વધુ લોકો ઘાયલ હોવાનું કહેવાય છે. ઘટના બાદ પોલીસ ઘટના સ્થળે પહોંચી ગઈ છે. સ્થાનિક લોકોની મદદથી રાહત અને બચાવ કામગીરી શરૂ કરવામાં આવી છે. મૃત્યુઆંક વધવાની આશંકા છે. તમામ ઘાયલોને નજીકની હોસ્પિટલમાં દાખલ કરવામાં આવ્યા છે.

મીડિયા રિપોર્ટ્સ અનુસાર બસમાં લગભગ 70-75 લોકો સવાર હતા. જેમાંથી કેટલાકનું ઘટનાસ્થળે જ મોત થયું હતું. જ્યારે, કેટલાકને હોસ્પિટલમાં લઈ જવામાં આવ્યા હતા જ્યાં ડૉક્ટરોએ તેમને મૃત જાહેર કર્યા હતા.

બસ 50 ફૂટ ઉંડી ખીણમાં પડી હતી

પંજાબના અમૃતસરથી શ્રી માતા વૈષ્ણો દેવી જઈ રહેલી એક બસ ઝજ્જર કોટલી વિસ્તારમાં પુલ પરથી પડી ગઈ હતી. પુલ પરથી ખાડો લગભગ 50 ફૂટ ઊંડો હોવાનું કહેવાય છે. જેમાં 4 લોકો ગંભીર રીતે ઘાયલ થયા હતા. ઘાયલોને સરકારી મેડિકલ કોલેજ અને હોસ્પિટલમાં દાખલ કરવામાં આવ્યા છે. આ સિવાય 12 અન્ય ઘાયલોને સ્થાનિક પીએચસીમાં મોકલવામાં આવ્યા છે. તેની અહીં સારવાર ચાલી રહી છે. બસમાં સવાર મોટાભાગના શ્રદ્ધાળુઓ બિહારના હતા. એવું કહેવામાં આવી રહ્યું છે કે તેઓ કદાચ કટરાનો રસ્તો ભૂલીને અહીં પહોંચ્યા હતા. ઘાયલોને બહાર કાઢવા માટે રેસ્ક્યુ ઓપરેશન ચાલી રહ્યું છે.