'ટેરિફ કે વેપાર પર કોઈ ચર્ચા થઈ નથી', વિદેશ મંત્રાલયે ટ્રમ્પના સીઝફાયરના ખોટા દાવાઓનો આપ્યો વળતો જવાબ

ભારત સરકારે ગુરુવારે (29 મે) ફરી એકવાર અમેરિકાના રાષ્ટ્રપતિ ડોનાલ્ડ ટ્રમ્પના દાવાને ફગાવી દીધો કે તેમણે વેપારના બદલામાં ભારત અને પાકિસ્તાન વચ્ચે યુદ્ધવિરામ કરાવવામાં મદદ કરી હતી. સરકારે સ્પષ્ટપણે જણાવ્યું છે કે તાજેતરના લશ્કરી તણાવ દરમિયાન બંને દેશો વચ્ચેની કોઈપણ ચર્ચામાં વેપારનો મુદ્દો આવ્યો નથી. ભારતીય વિદેશ મંત્રાલય (MEA) એ ગુરુવારે (29 મે) ફરી એકવાર એવા દાવાઓને નકારી કાઢ્યા કે ભારતે પાકિસ્તાન અને પાકિસ્તાન કબજા હેઠળના કાશ્મીર (PoK) માં આતંકવાદી શિબિરો પર 'ઓપરેશન સિંદૂર' શરૂ કર્યા પછી બંને દેશો વચ્ચે થયેલી વાટાઘાટોમાં અમેરિકા સાથે વેપાર પર કોઈ ચર્ચા થઈ હતી.

એક પત્રકાર પરિષદને સંબોધતા, વિદેશ મંત્રાલયના પ્રવક્તા રણધીર જયસ્વાલે કહ્યું, "હું તમને 13 મેના રોજ સ્પષ્ટ કરાયેલા વલણ વિશે જણાવું છું. 7 મેના રોજ 'ઓપરેશન સિંદૂર' શરૂ થયા પછી આ કોઈપણ ચર્ચામાં વેપાર અથવા ટેરિફનો મુદ્દો આવ્યો નથી. વિદેશ પ્રધાન ડૉ. એસ. જયશંકરે પણ સ્પષ્ટતા કરી હતી કે આ સીધા DGMO દ્વારા સ્થાપિત કરવામાં આવ્યું હતું."

જયસ્વાલે વધુમાં જણાવ્યું હતું કે યુદ્ધવિરામની અપીલ ઇસ્લામાબાદથી આવી હતી, ખાસ કરીને પાકિસ્તાનના ડાયરેક્ટર જનરલ ઓફ મિલિટરી ઓપરેશન્સ (DGMO) તરફથી. તેમણે દિલ્હીમાં તેમના સમકક્ષનો સંપર્ક કર્યો હતો. 'ઓપરેશન સિંદૂર' દરમિયાન કોઈ યુએસ હસ્તક્ષેપ થયો ન હતો.

13 મેના રોજ એક બ્રીફિંગમાં, જયસ્વાલે કહ્યું હતું કે,  ભારતનો મક્કમ વલણ છે કે તે પરમાણુ બ્લેકમેલને વશ નહીં થાય અને સરહદ પાર આતંકવાદને કાર્યરત થવા દેશે નહીં. તેમણે કહ્યું કે,"વિવિધ દેશો સાથેની અમારી ચર્ચામાં, અમે તેમને ચેતવણી પણ આપી છે કે આવા દૃશ્યો અપનાવવાથી તેમના ક્ષેત્રમાં તેમને નુકસાન થઈ શકે છે."

યુએસ પ્રમુખ ડોનાલ્ડ ટ્રમ્પે વારંવાર દાવો કર્યો છે કે, તેમણે ભારત અને પાકિસ્તાન વચ્ચેના તણાવને ઓછો કરવામાં મદદ કરી છે. ટ્રમ્પે દાવો કર્યો હતો કે તેમણે પરમાણુ સશસ્ત્ર દક્ષિણ એશિયાઈ પડોશીઓને કહ્યું હતું કે જો તેઓ યુદ્ધ બંધ કરે તો અમેરિકા તેમની સાથે ઘણો વ્યવસાય કરશે. પરંતુ ભારત કહે છે કે પાકિસ્તાનના ડાયરેક્ટર જનરલ ઓફ મિલિટરી ઓપરેશન્સ (DGMO) નો સંપર્ક કરવામાં આવ્યા બાદ લશ્કરી કાર્યવાહી રોકવાનો વિચાર કરવામાં આવ્યો હતો.

આ પણ વાંચો-PayPal in India: ભારતમાં ક્રોસ-બોર્ડર પેમેન્ટ બનશે સરળ, RBIએ PayPalને આપી મંજૂરી

22 એપ્રિલે જમ્મુ અને કાશ્મીરના પહેલગામમાં થયેલા ભયાનક આતંકવાદી હુમલાના લગભગ બે અઠવાડિયા પછી, ભારતે પાકિસ્તાન અને પાકિસ્તાન અધિકૃત કાશ્મીર (Pok) માં આતંકવાદી માળખાને નિશાન બનાવીને 'ઓપરેશન સિંદૂર' શરૂ કર્યું. પહેલગામ આતંકવાદી હુમલામાં 26 નાગરિકો માર્યા ગયા. સરહદ પારથી ચાર દિવસ સુધી ડ્રોન અને મિસાઇલ હુમલાઓ પછી, ભારત અને પાકિસ્તાન 10 મેના રોજ લશ્કરી મુકાબલો બંધ કરવા સંમત થયા.