Pharmaceutical: ભારતીય ફાર્મા કંપનીઓએ અમેરિકામાંથી દવાઓ પાછી મગાવી, જાણો શું છે કારણ?

Pharmaceutical: ભારતની અગ્રણી ફાર્માસ્યુટિકલ કંપનીઓ ગ્લેનમાર્ક, ગ્રેન્યૂલ્સ ઇન્ડિયા, સનફાર્મા, જાયડસ અને યુનિકેમે અમેરિકન બજારમાંથી તેમની દવાઓના અમુક લોટ પાછા મગાવ્યા છે. યુએસ ફૂડ એન્ડ ડ્રગ એડમિનિસ્ટ્રેશન (USFDA)ની તાજેતરની એન્ફોર્સમેન્ટ રિપોર્ટ અનુસાર, આ રિકોલ ગુણવત્તા અને લેબલિંગ સંબંધિત ખામીઓને કારણે કરવામાં આવ્યું છે.

ગ્લેનમાર્કનું રિકોલ: ટેક્સ્ચરની ફરિયાદ

મુંબઈ સ્થિત ગ્લેનમાર્ક ફાર્માસ્યુટિકલ્સની અમેરિકન સબસિડિયરી, ન્યૂ જર્સી સ્થિત ગ્લેનમાર્ક ફાર્માસ્યુટિકલ્સ ઇન્ક, યુએસએએ 17 સપ્ટેમ્બરે ક્લાસ-II રિકોલ શરૂ કર્યું. આ રિકોલ હેઠળ, ગોવાના પ્લાન્ટમાં બનેલી 13,824 એઝેલેઇક એસિડ જેલની ટ્યૂબ પાછી મગાવવામાં આવી, કારણ કે આ જેલના ટેક્સ્ચરમાં ખરબચડાપણાની ફરિયાદો મળી હતી. USFDA અનુસાર, ક્લાસ-II રિકોલ ત્યારે થાય છે જ્યારે ઉત્પાદનના ઉપયોગથી અસ્થાયી અથવા ઉલટાવી શકાય તેવી આરોગ્ય સમસ્યાઓ થઈ શકે, અથવા ગંભીર આડઅસરોની શક્યતા નહિવત હોય.

ગ્રેન્યૂલ્સ ઇન્ડિયા: અશુદ્ધિઓનું કારણ

હૈદરાબાદ સ્થિત ગ્રેન્યૂલ્સ ઇન્ડિયાએ અશુદ્ધિઓ અને ગુણવત્તાના ધોરણોમાં નિષ્ફળતાને કારણે 49,000થી વધુ બોટલ ડેક્સ્ટ્રો એમ્ફેટામાઇન સેકરેટ, એમ્ફેટામાઇન એસ્પાર્ટેટ મોનોહાઇડ્રેટ, ડેક્સ્ટ્રો એમ્ફેટામાઇન સલ્ફેટ અને એમ્ફેટામાઇન સલ્ફેટના એક્સટેન્ડેડ-રિલીઝ કેપ્સ્યૂલ પાછા મગાવ્યા છે.

સનફાર્મા અને જાયડસનું રિકોલ

સનફાર્માની અમેરિકન સબસિડિયરીએ 1,870 રેનલ ઇમેજિંગ એજન્ટ કિટ પાછી મગાવી છે. તેવી જ રીતે, અમદાવાદ સ્થિત જાયડસ ફાર્માસ્યુટિકલ્સ (યુએસએ) ઇન્કે એન્ટીવાયરલ દવા એન્ટેકાવિર ટેબ્લેટની 8,784 બોટલ પાછી મગાવી છે.