Qatar court: કતર કોર્ટે ભારતની અરજી સ્વીકારી, મૃત્યુદંડની સજા પામેલા નેવીના 8 ભૂતપૂર્વ અધિકારીઓને રાહતની આશા

Qatar court: ગયા વર્ષે 27 ઓક્ટોબર, 2023 ના રોજ કતરની કોર્ટે કતરમાં ધરપકડ કરાયેલા આઠ ભૂતપૂર્વ ભારતીય નૌકાદળના કર્મચારીઓને મૃત્યુદંડની સજા સંભળાવી ત્યારે બધા ચોંકી ગયા હતા. હવે આ મામલે એક મોટું અપડેટ સામે આવ્યું છે. સૂત્રોના જણાવ્યા અનુસાર, કતર કોર્ટે મૃત્યુદંડની સજા સંભળાવતા ભારતીય નૌકાદળના પૂર્વ જવાનોની અપીલ સ્વીકારી લીધી છે અને આ કેસની આગામી સુનાવણી ટૂંક સમયમાં હાથ ધરવામાં આવશે. આ અપીલ ભારત સરકાર દ્વારા દાખલ કરવામાં આવી હતી.

કતરની એક કોર્ટે ગુરુવારે (23 નવેમ્બર) અપીલના દસ્તાવેજો સ્વીકાર્યા હતા. સૂત્રોના જણાવ્યા અનુસાર, કોર્ટ અપીલનો અભ્યાસ કરી રહી છે અને આગામી સુનાવણી ટૂંક સમયમાં થવાની અપેક્ષા છે. ભારતના વિદેશ મંત્રાલયના પ્રવક્તા અરિંદમ બાગચીએ તેમના છેલ્લા સાપ્તાહિક બ્રીફિંગમાં જણાવ્યું હતું કે ભારતે આ નિર્ણય સામે "પહેલેથી જ અપીલ દાખલ કરી છે".

શું છે સમગ્ર મામલો?

ગયા વર્ષે 25 ઓક્ટોબરે મીતુ ભાર્ગવ નામની મહિલાએ ટ્વીટ કર્યું હતું કે ભારતીય નૌકાદળના આઠ ભૂતપૂર્વ અધિકારીઓ કતરની રાજધાની દોહામાં 57 દિવસથી ગેરકાયદેસર અટકાયતમાં છે. મીતુ ભાર્ગવ કમાન્ડર પૂર્ણેન્દુ તિવારીની બહેન છે. આ અધિકારીઓ પર ઈઝરાયેલ માટે જાસૂસી કરવાનો આરોપ છે. કતરની ન્યૂઝ વેબસાઈટ અલ-જઝીરાના રિપોર્ટ અનુસાર, આ અધિકારીઓ પર ઈઝરાયેલને કતરના સબમરીન પ્રોજેક્ટ સાથે જોડાયેલી માહિતી આપવાનો આરોપ છે.