બહેન પ્રિયંકા ગાંધીના હાથના બનેલા 'છોલે-ભટૂરે' ના દિવાના થયા રાહુલ ગાંધી, જાણો પોસ્ટમાં શું લખ્યું અને કોની સાથે કરી ખાસ મુલાકાત

કોંગ્રેસ નેતા અને લોકસભામાં વિપક્ષના નેતા રાહુલ ગાંધી પોતાની એક લેટેસ્ટ સોશિયલ મીડિયા પોસ્ટને લઈને ભારે ચર્ચામાં છે. રવિવારે તેમણે પોતાના વ્યસ્ત રાજકીય કાર્યક્રમો વચ્ચે ભારતીય ખાનપાનને લઈને એક રસપ્રદ પોસ્ટ શેર કરી છે, જેમાં તેમણે પોતાની બહેન પ્રિયંકા ગાંધી વાડ્રાના હાથની રસોઈના ખુલ્લામને વખાણ કર્યા છે.

રાહુલ ગાંધીને ભાવ્યા બહેનના હાથના 'છોલે-ભટૂરે'

રાહુલ ગાંધીએ સોશિયલ મીડિયા પ્લેટફોર્મ 'X' પર સ્વાદિષ્ટ 'છોલે-ભટૂરે' ની એક તસવીર શેર કરી હતી. આ પોસ્ટની કેપ્શનમાં તેમણે ભારતીયોના ખાનપાન વિશે લખ્યું કે, "જાણકારી માટે જણાવી દઉં કે 80% ભારતીયો માંસાહારી છે. ભારતીય માંસાહારી ભોજન ખૂબ જ સ્વાદિષ્ટ હોય છે. અને મારી બહેને બનાવેલા છોલે-ભટૂરે પણ." આ પોસ્ટ પરથી સ્પષ્ટ થાય છે કે રવિવારની રજામાં કોંગ્રેસ સાંસદ પ્રિયંકા ગાંધીએ પોતાના ભાઈ રાહુલ માટે ખાસ પોતાના હાથે છોલે-ભટૂરે બનાવ્યા હતા.

મલેશિયાના વડાપ્રધાન સાથે રાહુલ-પ્રિયંકાની ખાસ મુલાકાત

રાજકારણના મોરચે જોઈએ તો, આ જ દિવસે સવારે રાહુલ ગાંધી અને પ્રિયંકા ગાંધી વાડ્રાએ મલેશિયાના વડાપ્રધાન અનવર ઇબ્રાહિમ સાથે ખાસ મુલાકાત કરી હતી. નાસ્તાના ટેબલ પર થયેલી આ મીટિંગમાં ભારત અને મલેશિયા વચ્ચેના સંબંધોને વધુ મજબૂત કરવા અંગે ચર્ચા થઈ હતી. કોંગ્રેસ પાર્ટીએ આ મુલાકાતની તસવીરો પોતાના ઓફિશિયલ સોશિયલ મીડિયા હેન્ડલ પર શેર કરી છે.

નોંધનીય છે કે, મલેશિયા BRICS સમૂહનો ભાગીદાર દેશ છે. આ મીટિંગના એક દિવસ પહેલા જ ભારતના વડાપ્રધાન નરેન્દ્ર મોદી અને મલેશિયાના પીએમ વચ્ચે નવી દિલ્હીમાં દ્વિપક્ષીય વાટાઘાટો થઈ હતી. જેમાં બંને દેશો વચ્ચે વેપાર, સેમિકન્ડક્ટર, ઇન્ફ્રાસ્ટ્રક્ચર અને સંરક્ષણ ક્ષેત્રે સહયોગ વધારવા પર ભાર મૂકવામાં આવ્યો હતો.

BRICS સમિટ: વિદેશી મહેમાનોને પીરસાયું શુદ્ધ શાકાહારી ભોજન

નવી દિલ્હીના ભારત મંડપમ ખાતે ચાલી રહેલા BRICS શિખર સંમેલનનો આજે બીજો અને અંતિમ દિવસ છે. સમિટના પહેલા દિવસે રાત્રે તમામ વિદેશી મહેમાનો અને રાષ્ટ્ર્રાધ્યક્ષોના સન્માનમાં ભવ્ય ગાલા ડિનરનું આયોજન કરવામાં આવ્યું હતું. આ ડિનરમાં ભારતીય સંસ્કૃતિ અને વિવિધતાની ઝલક જોવા મળી હતી.

વિદેશી મહેમાનો માટે ખાસ શુદ્ધ શાકાહારી મેનૂ તૈયાર કરવામાં આવ્યું હતું, જેમાં કાશ્મીરથી લઈને કન્યાકુમારી સુધીના સ્વાદનો સંગમ હતો.

સ્ટાર્ટર્સ: ગુજરાતની પ્રખ્યાત 'ખાંડવી' ને રાઈ, નાળિયેર અને મીઠા લીમડાનો વઘાર આપીને આધુનિક રીતે કેરી અને દહીંના ડ્રેસિંગ સાથે પીરસવામાં આવી. સાથે જ અવધ સ્ટાઈલના મશરૂમના 'ખુંબ ગલૌટી કબાબ' ને ફુદીનાની ગોળીઓ અને શીરમાંલ બ્રેડ સાથે સર્વ કરાયા હતા.

મેન કોર્સ : પનીર લબાબદાર, ગુચ્છી માર્મિક, કેરેટ બીન પોરિયલ (સાઉથ ઇન્ડિયન ડીશ), તક્કાલી બેલે સારુ, મિલેટ પુલાવ (બાજરી-જુવારનો પુલાવ), બીટરૂટ રાયતું અને વિવિધ પ્રકારની ભારતીય રોટલી તેમજ નાનનું બાસ્કેટ પીરસવામાં આવ્યું હતું.

આ પણ વાંચો-BRICS Summit 2026: 'ટેક્નોલોજી અને ખનિજોને હથિયાર ન બનાવો', સમિટમાં પીએમ મોદીએ દુનિયાને આપ્યો કડક સંદેશ