ટ્રમ્પ ગોલ્ડ કાર્ડ: 9 કરોડ રૂપિયામાં મળશે અમેરિકાની નાગરિકતા? જાણો શું છે નવી વિઝા પોલિસી અને ભારતીયો પર તેની અસર

Trump Gold Card US Visa: અમેરિકાના રાષ્ટ્રપતિ ડોનાલ્ડ ટ્રમ્પે એક એવી જાહેરાત કરી છે જેણે વિશ્વભરના, ખાસ કરીને ભારત અને ચીનના પ્રતિભાશાળી પ્રોફેશનલ્સનું ધ્યાન ખેંચ્યું છે. તેમણે 'ટ્રમ્પ ગોલ્ડ કાર્ડ' નામના એક નવા વિઝા પ્રોગ્રામની શરૂઆત કરી છે, જે અમેરિકામાં કુશળ કામદારો માટે વસવાટના નિયમોને સંપૂર્ણપણે બદલી શકે છે. ટ્રમ્પે દાવો કર્યો છે કે આ યોજના અમેરિકન અર્થતંત્રને મજબૂત બનાવવાની સાથે દેશની ટેક કંપનીઓને પણ મોટી રાહત આપશે.

ટ્રમ્પના જણાવ્યા અનુસાર, આ ગોલ્ડ કાર્ડ વર્તમાન ગ્રીન કાર્ડ જેવું જ છે, પરંતુ તેના કરતાં અનેક રીતે વધુ શ્રેષ્ઠ છે. તેનો મુખ્ય ઉદ્દેશ્ય અમેરિકામાં ભણતા વિદેશી વિદ્યાર્થીઓ અને ઉચ્ચ કૌશલ્ય ધરાવતા પ્રોફેશનલ્સને દેશમાં કાયમ માટે રોકી રાખવાનો છે. હાલની વિઝા પ્રણાલીની જટિલતાને કારણે, ઘણા હોશિયાર યુવાનોને પોતાનું ભણતર પૂરું કર્યા પછી H-1B વિઝાની મર્યાદાઓ અથવા રિન્યુઅલની સમસ્યાઓને કારણે પોતાના દેશ પાછા ફરવું પડે છે. ટ્રમ્પે જણાવ્યું કે એપલ જેવી મોટી કંપનીઓના સીઈઓ ટિમ કુક પણ આ સમસ્યા અંગે તેમની સાથે સતત ચર્ચા કરતા હતા, અને આ નવું કાર્ડ તેમની જેવી કંપનીઓ માટે ખૂબ જ ખુશીના સમાચાર લઈને આવ્યું છે. આ કાર્ડ દ્વારા કંપનીઓ સરળતાથી વૈશ્વિક પ્રતિભાઓને નોકરી પર રાખી શકશે અને તેમને કાયમી ધોરણે અમેરિકામાં સ્થાયી કરી શકશે.

જોકે, આ ગોલ્ડ કાર્ડ મેળવવાની કિંમત સામાન્ય માણસની કલ્પના બહાર છે. આ કાર્ડ માટે અરજી કરનારે અધધધ રકમ ચૂકવવી પડશે. જો કોઈ વ્યક્તિગત રીતે અરજી કરે છે, તો તેણે $1,000,000 (અંદાજે 9 કરોડ રૂપિયા) ચૂકવવા પડશે. જો કોઈ કંપની પોતાના કર્મચારી માટે અરજી કરે છે, તો આ રકમ બમણી એટલે કે $2,000,000 (અંદાજે 18 કરોડ રૂપિયા) થશે. આ સિવાય, $15,000 ની નોન-રિફંડેબલ પ્રોસેસિંગ ફી પણ ભરવાની રહેશે. ટ્રમ્પનું માનવું છે કે આ યોજનાથી અમેરિકાની સરકારી તિજોરીમાં દર વર્ષે અરબો ડોલરની આવક થશે, જે દેશના વિકાસમાં કામ લાગશે.

આ નવી પોલિસીની સૌથી મોટી અસર ભારતીયો પર જોવા મળી શકે છે. અમેરિકામાં વસવાનું સપનું જોતા મોટાભાગના ભારતીયો માટે આ ગોલ્ડ કાર્ડ મેળવવું લગભગ અશક્ય બની જશે. 9 કરોડ રૂપિયાની માતબર રકમ એકસાથે રોકડમાં ચૂકવવી એ સામાન્ય ભારતીય પરિવાર માટે ખૂબ જ મુશ્કેલ છે. અગાઉના EB-5 વિઝા પ્રોગ્રામમાં રોકાણ માટે લોન લેવાનો કે ભાગીદારીમાં પૈસા ભેગા કરવાનો વિકલ્પ હતો, પરંતુ ગોલ્ડ કાર્ડ માટે સંપૂર્ણ રકમ એક જ વારમાં ચૂકવવી પડશે. આથી, જે ભારતીય પ્રોફેશનલ્સ વર્ષોથી ગ્રીન કાર્ડની લાઇનમાં ઉભા છે, તેમની મુશ્કેલીઓ વધી શકે છે. આ સંજોગોમાં, ભારતીયો માટે અમેરિકામાં કામ કરવા અને વસવાટ કરવા માટે H-1B વિઝા જ મુખ્ય અને પસંદગીનો વિકલ્પ રહેશે. જે લોકો H-1B વિઝા પર અમેરિકામાં છે, તેઓ ગોલ્ડ કાર્ડ માટે અરજી કરી શકે છે, પરંતુ તેના માટે તેમની પાસે કરોડો રૂપિયાની સંપત્તિ હોવી અનિવાર્ય છે. આમ, આ ગોલ્ડ કાર્ડ ભારતીયો માટે અમેરિકન નાગરિકતાને એક મોંઘું સપનું બનાવી રહ્યું છે.

આ પણ વાંચો-ભારતમાં 6,000થી વધુ સ્ટાર્ટઅપ બંધ: સપના તૂટ્યા કે બજારનો નિયમ? જાણો ગુજરાત સહિત દેશભરની સ્થિતિ