અમેરિકી રાષ્ટ્રપતિ ટ્રમ્પના સૂર બદલાયા, કહ્યું- મોદી મારા ખૂબ સારા મિત્ર, ટ્રેડ ડીલ અંગે આપ્યા આ સંકેત

President Trump and PM Modi: અમેરિકી રાષ્ટ્રપતિ ડોનાલ્ડ ટ્રમ્પે ભારત અને વડાપ્રધાન નરેન્દ્ર મોદી પ્રત્યેના પોતાના વલણમાં અચાનક ફેરફાર કર્યો છે. વ્હાઇટ હાઉસમાં ટ્રમ્પે કહ્યું, "વડાપ્રધાન મોદી તાજેતરમાં અહીં આવ્યા હતા અને અમે હંમેશાંથી ખૂબ સારા મિત્રો રહ્યા છીએ." આ નિવેદન એવા સમયે આવ્યું છે જ્યારે અમેરિકા 2 એપ્રિલથી ભારત સહિત અનેક દેશો પર જવાબી સીમા શુલ્ક લાગુ કરવાની તૈયારીમાં છે.

ટ્રમ્પે વડાપ્રધાન મોદીને "ખૂબ જ બુદ્ધિશાળી વ્યક્તિ" અને "મારા ખૂબ સારા મિત્ર" ગણાવતા કહ્યું કે, અમેરિકા અને ભારત વચ્ચે ચાલી રહેલી વેપારી શુલ્કની વાટાઘાટોના ખૂબ સારા પરિણામો આવશે. આ ટિપ્પણી ભારતના વિદેશ સચિવ વિક્રમ મિસ્ત્રી અને અમેરિકી ઉપ વિદેશ મંત્રી ક્રિસ્ટોફર લેન્ડો વચ્ચે દ્વિપક્ષીય વેપાર અંગેની ચર્ચાના દિવસે જ આવી છે. આ ચર્ચામાં સંતુલિત વેપારી સંબંધો માટે અવરોધો ઘટાડવાનો મુદ્દો પણ સામેલ હતો.

"અમે હંમેશાંથી સારા મિત્રો"

ટ્રમ્પે કહ્યું, "ભારત વિશ્વના સૌથી વધુ શુલ્ક લગાવનારા દેશોમાંથી એક છે. તેઓ ખૂબ બુદ્ધિશાળી છે. મોદી ખૂબ જ બુદ્ધિશાળી વ્યક્તિ છે અને મારા ખૂબ સારા મિત્ર છે. અમારી વાતચીત ખૂબ સારી રહી. મને લાગે છે કે આ ભારત અને અમારા દેશ વચ્ચે ખૂબ સારું કામ કરશે." તેમણે વધુમાં મોદી તરફ ઇશારો કરતા કહ્યું, "હું કહેવા માંગું છું કે તમારી પાસે એક મહાન વડાપ્રધાન છે." ઉલ્લેખનીય છે કે વડાપ્રધાન મોદીએ ફેબ્રુઆરીમાં અમેરિકાની મુલાકાત લીધી હતી અને ટ્રમ્પ સાથે દ્વિપક્ષીય ચર્ચા કરી હતી. આ દરમિયાન બંને પક્ષોએ પરસ્પર લાભદાયી, બહુ-ક્ષેત્રીય દ્વિપક્ષીય વેપાર સમજૂતી પર વાટાઘાટો કરવાની યોજનાની જાહેરાત કરી હતી.

બંને દેશો વચ્ચે વાતચીત ચાલુ

ટ્રમ્પે અગાઉ પણ ભારત પર અત્યંત ઊંચા સીમા શુલ્ક લગાવવાનો આરોપ લગાવ્યો હતો અને કહ્યું હતું કે હવે અમેરિકા પણ જવાબી શુલ્ક લાદશે. આ દરમિયાન, ભારતના વિદેશ મંત્રાલયે જણાવ્યું કે મિસ્ત્રી અને લેન્ડોએ વધતા દ્વિપક્ષીય વેપાર, સંરક્ષણ અને ટેકનોલોજી સહયોગ તેમજ આવાગમન અને સ્થળાંતર સંબંધિત મુદ્દાઓ પર ચર્ચા કરી. અમેરિકી વિદેશ વિભાગના પ્રવક્તા ટેમી બ્રૂસે જણાવ્યું કે બંને અધિકારીઓએ "ન્યાયી અને સંતુલિત દ્વિપક્ષીય વેપાર સંબંધો હાંસલ કરવા માટે અવરોધો ઘટાડવાના ચાલી રહેલા પ્રયાસો" અને સંરક્ષણ તેમજ ટેકનોલોજીમાં સહયોગને મજબૂત કરવા પર ચર્ચા કરી. અમેરિકાના સહાયક વેપાર પ્રતિનિધિ બ્રેન્ડન લિંચ હાલ ભારતના પ્રવાસે છે અને તેઓ પ્રસ્તાવિત દ્વિપક્ષીય વેપાર સમજૂતી (બીટીએ)ની રૂપરેખા અને જોગવાઈઓ અંગે ભારતીય વાટાઘાટકારો સાથે ચર્ચા કરી રહ્યા છે.

આ પણ વાંચો- 1 મે થી એટીએમથી પૈસા ઉપાડવા થશે મોંઘા, RBI એ વધારી ફીઝ, જાણો નવા નિયમ